Patui Danak dak mbang nyaom ka 4, Quốc hội mbang 15, harei ini (7/11) Quốc hội yam tapa adit ngak bruk ka 3. Bruk praong dalam adit ngak bruk ini, lac Quốc hội ginum biai ka bruk pacang caga tham nhũng thun 2022. Dalam adit ngak bruk ini, Quốc hội hu ginum biai ka dom danak dak Hukum Hợp tác xã (pasiam veik); danak dak Hukum pacang caga dân sự; danak dak Hukum khik caga quyen di urang blei pandar (pasiam veik); danak dak Hukum Giao dịch online (pasiam veik), danak dak Hukum yaom kaom (pasiam veik) saong danak dak Hukum to yaom (pasiam veik).

Harei pataom ilamu thể thao du lịch bhap bini Khmer Nam bộ mbang ka VIII saong Harei Oóc Om Bóc – pakacah ghe Ngo Sóc Trăng, bhum ĐBSCL mbang ka V thun 2022 hu peih tabiak tuk melam kabroi 6/1 di tỉnh Sóc Trăng. Di tuk peih mbaok, ong Tạ Quang Đông, Thứ trưởng Mintri ilamu, Thể thao saong Du lịch ndom lac, ini bruk hu makna praong dalam, piah pok meyaom ilamu di urang Khmer Nam Bộ, patagok bruk jum pataom bhap bini, rik daong yaih khan, pambak tabiak dom yaom glaong ilamu meng kan di bhap bini Khmer Nam Bộ tal ayut sahabat dalam taneh ia saong mangaok dunya.

Urak ini dalam abih tih 17 labik Chế xuất saong labik ngak kong di ban raya TP HCM hu 51 doanh nghiệp pathau khan lac trun đơn hàng ngak ka jaik 6.000 urang ngak gaok kan kandah. Makna lac kayua pambak meng bruk mesuh gauk di Nga haong Ukraina, bruk an ninh chính trị rilo labik di dunya daok sarau kadhau; yaom pandap panda, xang manjek, khí đốt tagok glaong, dalam tuk daok tame bilan laar di Châu Âu. Nyaom đơn hàng njauk kan kandah trak abih lac dom gah yau ye nữ trang, thời trang cao cấp.

Meng akaok thun tal ini, hu jaik 1.000 urang jakar, urang y tế karja di bhum taneran kraong Cửu Long padeih bruk. Cần Thơ lac labik hu urang y tế padeih bruk rilo abih, lac labaih 200 urang, patui di nan lac AnGiang. Hu rilo makna min praong di abih lac kayua bruk ngak dak harei dak trak, min jien bilan biar. Urang y tế padeih bruk ba tal srau kadau saong ngak kan kandah oh sit tal bruk ngak di rilo labik y tế karja. Pathau khan anak Quốc hội, Akaok Mintri Y tế brei thau, 18 bilan tapa, dalam taneh ia hu 9.680 urang y tế likau padeih bruk, atau klaak bruk.

Tỉnh Ninh Thuận hu 4 pabah lamnge ikan saong 3 labik patok plaih di rabuk. Hadei di labaih 25 thun ba tame pandar, dom pabah lamnge ikan daok tapa prein ngak, rilo labik khut biak trak. Bruk tatua pabah lamnge khut, mbaih mbaoh ngak ka bruk taong mek ikan saong pablei salih di mikva njauk kan kandah. Anak bruk ini, bahrau ini, karja tỉnh daok likau Trung ương rami ramik kadung jien kanja piah ngak pasiam veik pabah lamnge.

Nyaom biai mbang ka 27 dom gah hu mbaok tame Công ước khung di Liên Hợp Quốc ka Biến đổi khí hậu (COP27) hu peih tabiak harei 6/11 di ban Sam En Sếch, Ai Cập saong dui atah tal harei 18/11. Lambaok labaih 195 taneh ia, dom urang pan akaok dom taneh ia, dom kapul nyaom dunya, lambaok dom tổ chức xã hội, doanh nghiệp hu mbaok tame nyaom biai. kapul Việt Nam kayua Akaok Mintri Tài nguyên saong Môi trường Trần Hồng Hà ba akaok hu mbaok tame nyaom biai ngan saong kadha Việt Nam kham merat peih ngak dom sanya ka pacang biến đổi khí hậu saong halan hatian pambuak bruk haong dunya dalam bruk peih ngak dom sanya haong gauk.

Thủ tướng Tanzania Kassim Majaliwa brei thau lac hu takik di nyu 19 uảng metai dalam bala kapar haoh laik trun danao Victoria di Tanzania. Cảnh sát brei thau, dahlau di tuk gaok bala, sruh kapal ahaoh ATR 42-500 pajeng abih tih 43 urang, dalam nan hu 39 tuai saong 3 urang dalam kapul peih kapal ahaoh. Kapul daong duah urang njauk bala daong hu 26 ka urang saong pajeng nao tal sang iek ruak di pak nan. Dom thaot binguk ba tagok mạng xã hội brei mboh sruh ahaoh karam jaik abih trun ia, tok daok banah ku ndong tagok. Dom urang daong duah urang njauk bala kham marat nao jaik sruh kapal ahaoh piah ba tuai tabiak langiu. Dalam tuk nan, kapul dom urang karei daok duah jalan piah ba sruh kapal ahaoh tagok mangaok mbaok ia meng talei katung saong cần cẩu.

Dua thợ mỏ Hàn Quốc patuah hu daong plaih di metai hadei di 9 harei gar di mala haluk labik dalam 190 mét kayua jaleih lubang meng harei 26/10. Gah cứu hộ peih bruk duah dom urang njauk bala meng bruk khoan sa gilaong mangaok mỏ saong ba camera tame piah duah 2 urang gar gah dalam. Bruk kham merat nan hu pabak veik tuk 2 urang gaok bala hu daong ba tagok. Dom thợ mỏ jeng hu prein yava tani tanat saong hu ba tal sang iek ruak./.

Urang lang: Thu Thảo & M. Phương