Bier harei ini, di Sang Quốc hội, hu peih mbaok mbang nyaom ka 32 di Ủy ban Thường vụ Quốc hội (TVQH). Hu peih tabiak dalam 4 harei, di Mbang nyaom ini, Ủy ban TVQH meda pasang iek, brei panuac ka rilo asal kadha praong. Dalam nan, njauk caik hatai lac, Ủy ban TVQH pasang iek ka dom bruk pasang iek di Kapul giám sát di Quốc hội ka “bruk peih ngak Sarak ka 43 di Quốc hội Mbang 15 ka sarak tài khóa, jien padai daong ka Danak dak pasiam veik, cak rok patagok kinh tế - xã hội saong dom sarak di Quốc hội ka dom danak dak praong di negar tal abih thun 2023"; brei panuac camereip ka dự thảo Pathau khan dom pasang iek "ka bruk peih ngak sarak, hukum ka khik tani tanat salamat siam makre jalan mbak meng thun 2009 tal abih thun 2023" saong dom asal pasang iek praong karei karei.

Dom bruk ngak di tết Quân - dân uan Tết Chôl Chnăm Thmây thun 2024 di phường Vĩnh Phước, ban sit Vĩnh Châu, tỉnh Sóc Trăng hu tamat blaoh. Abih tih yaom jien jak ba peih ngak dom bruk tagok tal labaih 6,6 tỷ đồng. Dalam dom thun tapa, dom pakat dom gah tuk halei jeng pataom tame padang ngak dom bruk praong ba jalan patagok ka puk palei, abih di  nyu lac di bhum urang bangsa takik gaok kan kandah. Meng nan, baoh sang Khmer kan kathaot trun daok 3,86%; ilamu bangsa Khmer hu khik ramik, patgaok. 

Cục Thủy lợi, Mintri Ngak nong saong patagok palei pala brei thau lac, bruk njom ia mbak daok ngak kan kandah tal labaih 43 ribau 300 ha bhum pala phun mbang baoh di dom tinh, ban bhum ĐBSCL. Ini lac dom mblang taneh pala bilan Đông Xuân muộn oh tui njauk jalan ba tabiak, di bhum kakei oh trun pajaih hadei di harei 31/12/2023, Kayua yau nan ye, Cục Thủy lợi kakei lac dom bhum palei iek tui bruk ngak di dom danak dak kraong ribaong, praong abih lac khik piah ia, khik brei hu ia piah pandar dalam tukvak mbak njom tagok glaong.

Yaom lac daok di tuk pandiak thu yau urak ini, min rilo bein thanh long di tỉnh Tiền Giang jeng daok brei baoh suan bilan. Yaom baoh thanh long urak ini biak glaong, janih 1 yaom mangaok 40.000 đồng/kg, janih 2 yaom 35 - 38.000 đồng/kg, tagok jang bilan blaoh meng 10-15.000 đồng/kg. Tui yaom ini, yaok kg baoh thanh long, po bein laba hu jaik 20.000 đồng. Yaom thanh long tagok kayua urak ini pandiak thu ngak brei takik baoh, dalam tuk bruk pablei baoh thanh long tabiak negar langiu tagok glaong. 

Gah Maraong negar daok gaok dom harei pandiak bhang dui atah ka oh bhian mboh kuhria meng kan mai. Kuhria tal tukvak ini, hu 65 harei gam gam nhiet do tagok glaong labaih 35 độ C. Langik pandiak dui atah saong khang jang rilo thun. Bilan 2 mboh lac nhiet do glaong abih, ban Biên Hòa, Đồng Nai tagok tal 38 độ C. Bilan 4 daok mboh nhiet do tagok tal 40 độ C, tanut glaong abih ka oh bhian mboh kuhria meng kan mai dalam bhum. Njauk caik hatai lac dalam bilan thu thun ini, oh hu hajan mbang halei. Dalam tukvak anak tal, gah maraong negar daok gaok kan kandah di langik pandiak ngan haong nhiet do meng 35-38 độ C, hu labik nhiet do tagok tal 40 độ C.

Dom urang dang akaok dom taneh ia G7 hu tabiak panuac lên án Iran taong tame Israel, gam haong nan brei mboh hatai pachreih tui Israel saong brei thau veik bruk sanya khik caga an ninh di Israel. Rilo taneh ia jeng tabiak panuac lac bruk catang tagok di Israel haong Iran mbuan ba tal mesruh gauk khang di Trung Đông. Dahlau di nan, saboh mesup harei kabroi, Iran cuh labaih 300 sruh kapal haoh oh hu menuac peih saong tên lửa nao gah Israel.  

Rahra Lào di grauk labik dalam taneh ia chreih chrai peih ngak dom bruk salam uan thun bahrau Bounpimai thun 2567 Phật lịch (daok ieu lac Tet meng kan). Thun ini, tet meng kan rah tabiak meng harei 13 tal abih harei 16/4. Dalam harei camriep di thun bahrau, rahra hu mbaok tame ngak adat raok rup patau Phật di jalan, hadei di nan nao paha ngak adat manei Phật. Sa bruk ma-in bui sambai oh kurang hu dalam dom harei tet ini lac adat thaic ia, hu makna lac piah taco, rao hacih, palao abih dom bruk kanjak jhak, dom ruak kik, dom bruk ngak suan dalam thun klak, uan raok thun bahrau biak rilo bui sambai, chreih chrai, haniem phul.

Hajan praong dui atah rilo harei tapa ngak brei glut jaleih taneh biak khang di pulao Sulawesi, Indonesia. Bruk jaleih taneh ngak brei takik di nyu 15 urang matai saong 2 urang jeng daok lahik. Urang brei panuac di jabat patrun patakik bala meng langik tasik brei thau, langik jhak saong saong jalan khut di dom labik glut jaleih ngak kan kandah tal bruk daong menuac gaok bala. Bilan bloh, ia sua ia dauk saong jaleih taneh ngak brei 26 urang angaok pulao Sumatra matai./.