Diukrai tal umo 80 thun, hu jaik 57 thun umo Đảng, 14 thun ngak Tổng Bí thư, labaih 2 thun ngak Akok negar, labaih 5 thun ngak Akok Quốc hội, ong Nguyễn Phú Trọng tuk halei jeng suh sah dalam hatai sahaneng kuhria  bruk ngak cách mạng di Đảng saong bangsa. Piah hadar ong Tổng Bí thư, bhap bini dalam negar oh var hu thaok binguk sa urang jakar ngak praong salut mbut, mbuan mbiah, abih hatai haong bruk Đảng, haong bhap bini. Tổng Bí thư Nguyễn Phú Trọng  caik veik dalam hatai bhap bini thaok binguk salut mbut, mbuan mbiah, thau khik rup, oh yaih drei, hadah krah, tapak hatai min ngak bruk biak khang kadang. Ngan haong dom urang hu taom gaok, ngak bruk saong ndem meyai haong Tổng Bí thư ye dom thaot binguk ini dak hadar kanal dalam hatai baoh.

Dalam rai ngak bruk di drei, Tổng Bí thư Nguyễn Phú Trọng tuk halei jeng caik hatai anit saong sangka tal urang taha, menuac praong thun, caong khin urang praong thun tuk halei jeng patagok bruk “Umo glaong akaok sahneng dak glaong”, rik daong prein yava, ilamu dak padang taneh ia saong lac kreih camin hadah ka rai ranaih pasang tame, ngak tui. Ong Nguyễn Thanh Bình, akaok kapul urang praong thun Việt Nam khan lac, tuk daok diuk, Tổng Bí thư Nguyễn Phú Trọng biak caik hatai sangka saong pachreih ba, anait ranam saong caik hatai jia tame urang praong thun. Di dom mbang taom mbaok atau dalam nyaom biai, Tổng Bí thư tuk halei jeng caik hatai tangi sua urang praong thun meng panuac ndom bingi pang saong daok jaik haong urang praong thun.

Dalam mbang nao ngak bruk di Ban Cần Thơ thun 2014, Tổng Bí thư Nguyễn Phú Trọng haong kapol urang ngak bruk Trung ương hu caik tukvak mai rivang, ngak bruk haong Đảng ủy, Bộ tư lệnh Quân khu 9. Ngak tui jalan tacei ba di Tổng Bí thư Nguyễn Phú Trọng, dom thun tapa, urang jakar, urang lin tapon nyaom bol pan phao kraong Quân khu 9 tuk halei jeng paglong jalan sahaneng jum pataom; peih ngak brei sumu gauk, siam lagaih dom jalan dak padang Đảng bộ Quân khu khang kajap gah chính trị, jalan sahaneng, jalan diukrai, bruk ngak saong urang jakar. Tui nan, ngan haong bruk kham merat ralo, yam tagok; sami samar, hadah krah dalam tuk ngak bruk, rik tame peih ngak siam bruk dak padang Bol bala naih joi, khang kadang.

Ngan saong mikva dom bangsa di xã Ayun, huyện Chư Sê, tỉnh Gia Lai, Tổng Bí thư Nguyễn Phú Trọng oh lac menuac ba abih rai di drei ka taneh ia, ka bol bhap rahra, bo daok lac menuac ba brei ka mikva raidiuk trei sir. Meng sa bhum palei gam gam pala drak oh hu kayua pandiak bhang, Ayun urak ini hu mblang hamu hijao mekre saong dom bilan pala siam mekre, kein laba, meng hu thủy lợi Plei Keo hu padang ngak hadei meng tacei pato di Tổng Bí thư. Dalam mbang ngak bruk di Gia Lai bilan 4/2017, Tổng Bí thư Nguyễn Phú Trọng hu mai ravang xã Ayun – sa  xã biak kan kandah di huyện Chư Sê. Caik hatai tui pang mikva brei thau hatai caong hu ia piah ngak hamu, Tổng Bí thư hu tacei pato tinh pataom prein yava, jien padai tame samar padang ngak  thủy lợi Plei Keo. 

Mentri Kong an khan brei thau, bhap bini meda payua panuac klah rabha pandik harao, thau dhar phol, brei thau ka dom bruk hadar kanal Tổng Bí thư Nguyễn Phú Trọng ngaok ung dung VneID tame Sổ tang điện tử. Kong an ban Hà Nội khan lac, piah khik brei salamat di labik  ngak Quốc tang Tổng Bí thư Nguyễn Phú Trọng, bhap bini mai sirah  brei hu thẻ CCCD tau CC atau tame ứng dụng VneID tuk tapa labik pasang khik. Kong an ban Hà Nội hu pagam mac pasang mã Qrcode piah duh ka bhap bini mai rivang sirah Tổng Bí thư Nguyễn Phú Trọng.

Dom taneh ia di dunya daok hu payua harak thư, điện klah rabha pandik harao ka bruk tabiak nao di Tổng Bí thư Nguyễn Phú Trọng:

Harei kabroi, urang pan akaok pakat glaong dom taneh ia ASEAN tabiak harak ndom haong gauk brei klah rabha pandik harao ka bruk Tổng Bí thư Đảng Cộng sản Việt Nam Nguyễn Phú Trọng palang lahik, brei mboh bruk jum pataom di  ASEAN haong Việt Nam anak dom khat lahik saong pandik harao praong ini.  Dalam harak hu labik vak lac: dalam tukvak pandik harao ini, kol dahlak likau payua panuac klah rabha dom pandik harao tal gauk gar di Tổng Bí thư Nguyễn Phú Trọng, Rajaei saong bhap bini taneh ia Cộng hòa Xã hội Chủ nghĩa Việt Nam. Bruk pan akaok ba jalan saong caik abih rai di drei di Tổng Bí thư Nguyễn Phú Trọng brei ka bhap bini saong taneh ia Việt Nam tuk halei jeng hu hadar kanal. Dom rik daong di Tổng Bí thư Nguyễn Phú Trọng ka hòa bình, hữu nghị saong pambuak bruk dunya lac drap ar biak hu yaom glaong saong suai lavik, khang kajap.

Lac dom urang roh duah lavik thun ka Viet Nam, ong Vu Hướng Đông, Akok Viện roh duah Việt Nam di Đại học Trịnh Châu, lac nhân sĩ hữu nghị hu mbaok di Nyaom meyai bhap bini Việt – Trung saong Giáo sư Mễ Lương, Yam ndoc Pasak Nghiên cứu Đông Nam Á, Akok Viện Luật di Đại học Ngoại ngữ Bắc Kinh, Trung Quốc thei jeng pandik harao damen anak bruk plang lahik di Tổng Bí thư Nguyễn Phú Trọng. Ong Vu Hướng Đông brei thau, bruk Tổng Bí thư plang hu dui pachreih bruk caik hatai praong di manuac sia negar Trung Quốc jeng yau di dunya. Gru Mễ Lương taong yaom lac, Tổng Bí thư Nguyễn Phú Trọng oh lac urang jakar ngak praong tacei ba jalan ngak bruk naih joi di Đảng saong Karja Viet Nam, bo daok lac urang ngak praong  hu bhap  bini Trung Quốc biak anit ranam.

Urang pan akaok Thượng viện Úc Sue Lines hu payua panuac klah rabha pandik harao tal Rajaei saong bhap bini Việt Nam. Bruk akaok Thượng viện Sue Lines tapa Việt Nam hu mbaok dalam tuk ngak Quốc tang Tổng Bí thư Nguyễn Phú Trọng brei mboh talei rohim siam mekre di urang dang akaok saong bhap bini 2 taneh ia, brei mboh ka bruk pambuak gauk praong abih gah di Việt Nam - Úc daok cakrok khang kadang. Amuk Chủ tịch jia lac angaok jalan pambuak bruk siam mekre nan, dua taneh ia daok pabak talei pambuak bruk dak harei dak khang kajap yau hatai caong di Tổng Bí thư./.