Dua rituh lime pluh urang lambaok ka labaih 468.000 bol bhap bangsa takik di TPHCM hu mbaok di Nyaom roya bangsa takik Ban raya mbang IV thun 2024, peih ngak di page ini 6/12. Nyaom roya hu ba tabiak dom bruk praong dalam tukvak anak tal yau: mbiah tal puac thun 2025 oh daok baoh sang kathaot dalam bhap bini bangsa takik tui tanut chuan kathaot dalam negar; 100 % bol bhap bangsa takik hu blei BHYT; 50% urang ngak umo ngak bruk hu bac pasram bruk ngak lagaih;  labaih 95% urang jakar pakat xa hu ilamo chuyen mon pakat trung cap tagok saong hu bac pabak, pato pakai  dom gah, njauk tui bruk ba tabiak.

Yaom lac bruk buh jien tabiak oh ka samu haong bruk caong khin ba tabiak min rilo asal kadha sarak, prein ngak khang, Danak dak pakat negar 1719 hu daong ngak salih mbaok meta bhum palei, bhum ceik di dom labik biak kan kandah; trun kathaot di urang mikva bangsa takik, paglaong raidiuk di rahra. Bruk trun kathaot hu jak jeng rilo abih lac bangsa Xinh Mun di Son La, Dien Bien; patui veik lac bangsa M’nong di Dak Nong, Quang Nam, Dak Lak, Binh Phuoc; bangsa Khang di Lai Chau, Dien Bien; bangsa Raglai di Ninh Thuan, Khánh Hòa…

Tui Akok UBND tinh Tây Ninh Nguyễn Thanh Ngọc, bruk Tây Ninh ba tabiak bruk kham merat  ngak brei patagok GRDP thun 2025 tagok labaih 8% lac pambak tame bruk taong yaom njauk, njauk bruk di thun 2025. Abih di nyu lac  brei mboh dom merat hatai di taong abih pakat chinh tri. Thun ini, Tây Ninh hu 19 dalam 21 bruk ba tabiak saong labaih tui Sarak Nghi quyet; kinh te patagok biak glong, dang ka 3 di bhum ĐNB saong ka 19 dalam 63 tỉnh ban. Mbang akaok meti tỉnh  mek hu jien tame yam tapa 12.000 tỷ đồng, labaih duk haong bruk kuhria lac 105%, patagok labaih 6% dut saong thun dahlau.

Rilo janih baoh kayau di bhum Tây Nam bộ yau durian, thanh long, kruac…laik yaom katuak tuk puac thun. Abih di nyu nan lac hu dom janih baoh kayau oh njauk bilan haong jien buh tame ngak sangka glaong min yaom pablei biar jang dut haong tuk njauk bilan meng dom bilan dahlau. Thanh long janih 1 yaom oh ka tal 15 ribau dong 1kg. Durian daok trun yaom yaok harei, urak ini meyah paik abih tih baoh dalam bein ye yaom tok 85.000 - 90.000 đồng/kg. Kruac sành jeng daok tok dom ribau dong 1kilo. Ini lac tanut yaom biak biar dut haong tuk karei bilan thun blaoh. Bruk baoh kayau trun yaom khang dalam dom harei puac thun ini ngak ka dom po bein gaok rilo kan kandah.

Dom thun tapa, karja bhum palei taphia negar EA Súp, Đăk Lăk peih ngak hu siam lagaih dom jalan tacei ba, sarak di Đảng, Karja, ngak brei salih birau dalam bruk cak rok patagok kinh te xa hoi. Anak meta lac padang ngak hu 56 bruk  ngak mbang cakrok patagok dalam bhap bini; peih yaok pluh tal pato bruk ngak palei pala;  ba urang nao ngak bruk di negar  Hàn Quốc; daong bhap bini hu mesre phun jien  labaih 121 tỷ đồng piah ngak mbang, pablei salih…; brei the BHYT; oh mek jien bac ka anek saih.

Rajaei Thai Lan padang Pasak pasang iek bala negar piah patagok bruk pacang caga haong dom bruk samar chip kayua bala. Thai Lan daok dalam bruk kan kandah tuk ia sua ngak khat lahik rilo labik dalam taneh ia, ngak takik abih 25 urang metai. Pasak pasang iek bala negar brei ngak dom bruk daong urang, daong pasiam veik hadei ia sua, jeng yau patakik khat lahik meng dom bruk bala di langik tasik yau ia sua saong pandiak bhang.

Meng bilan 12 ini, Singapore brei ngak tuk bruk ba tabiak ngan haong dom po ngak mbang pablei salih njauk brei langyah tukvak jien bilan ngak bruk tui hatai caong di urang ngak. Tui bruk birau ba tabiak nan, urang ngak di Singapore caong khin kongti  brei adat ngak bruk tui caong khin di drei. Urak ini hu 80% doanh nghiep  hu kuhria caga blaoh blai la bruk ngak lagaih. Yau nan min, gah po ngak mbang palei salih mboh lac dom kongti sit meda dang anak rilo kan kandah jang tuk peih ngak.

Urang meraik yaom Sotheby's hu peih mbang pablei meraik yaom ka dom dong ho duah pataom hu saong pandap panda di urang me-in mbanh bau dục negar Mỹ Tom Brady dalam melam harei 10/12 anak tal. Dom roh duah pataom oh ka hu ba tabiak ini hu 21 baoh dong ho hu ginup thaik thaot, meng padhih the thao, pandap meng kal, tal dom pandap bahrau. Dom roh duah ini kuhria hu yaom meng 400.000 tal 800.000 đôla Mỹ./.