Ngak bruk haong tỉnh Hậu Giang dalam harei 24/5 ka bruk pato pakai, Phaok akaok Mban Tuyen giao Trung ương Vũ Thanh Mai caong lac, Hậu Giang njauk patui bruk paglong jalan sahaneng di pakat uy, karja ka dom jalan tacei ba di Đảng; peih bruk ngak tui Sarak ka 29; sangka, buh jien tame pato pakai paglaong ilamu ka anek menuac, mek anek manuac ngak pasak, lac prein khang ka bruk cakrok, patagok anek manuac Hậu Giang rilo ilamu chuyen mon, hu ilamu saong ilamu bangsa; peih ngak siam bruk salih pandar so dalam bruk pato saong bac. Hậu Giang njauk brei patagok dom bruk ngak hu dalam pachreih bac, pachreih megru dalam tukvak anak tal piah pabak bruk dak padang XH bac megru; khik bruk khang hatai, năng lượng daok hu di urak ini piah ba gah pato megru  di tỉnh tagok dalam tukvak anak tal.

Di mbang taom gaok di dom urang pan akaok tỉnh Sóc Trăng haong jaik 200 urang ngak saong urang jakar công đoàn, rilo urang ngak hu panuac caong urang pan akaok tỉnh samar drah peih ngak danak dak sang daok xã hội, sang daok ka urang ngak; padang ngak sang bac, labik ma-in ka anek bik di urang ngak; hu chế tài langyah ka doanh nghiệp plaih bruk kak jien bảo hiểm xã hội, tavak saiy bảo hiểm xã hội piah daong khik quyen loi di urang ngak, samar drah buh jien ngak darak pasa piah pablei pandap ka urang ngak di labik ngak kong. Urang pan akaok tỉnh Sóc Trăng hu mboh dom bruk ngak rik tame di kapul urang ngak dalam tukvak tapa, gam tui di nan jeng jak ba urang ngak patui veik patagok hatai pachreih, duah jalan ngak bahrau di dalam bruk ngak, kham merat pakacah gauk dalam bruk ngak.

Gah Y te dunya brei daong jru tavao samar chip  ka dom urang njauk jru mek botulinum daok taong ruak di dom sang iek ruak di Ban raya Ho Chi Minh. 6 klaoh jru ini hu payua meng gilang di Gah Y te dunya di Thụy Sĩ mai tal Thành phố Hồ Chí Minh piah sumu bruk taong ruak ka urang ruak njauk jru mek botulinum. Dahlau di nan, di biar harei 23/5, Akok Mentri Y tế hu ngak bruk tapak haong jabat WHO di Ha Noi saong caong khin gah WHO brei daong jru taong ruak jru mek botulinum ka Việt Nam. 

Meng akaok thun tal urak ini, kapul Công an tỉnh Bình Phước hu taduan 6 khau tin pathau khan kol tội phạm pambuak tal bruk pablei salih manuac. Dalam nan công an hu ba tabiak langyah pasang iek 4 bruk, 21 urang saong hu mboh 7 urang njauk bala. Dom urang njauk pablei salih jeng lac urang kumei, abih tih jeng daok di dom tỉnh miền Tây saong Tây Nguyên. Dom urang nan njauk pablei piah pabak ka bruk main ka dom quan karaoke di Bình Phước.  Kapul chức năng jeng hu mboh 23 urang pachot pagait menuac tapa Campuchia nao ngak bruk hanjul, jien bilan glaong saong hu pasang iek cambaih laih, daong hu ka 7 urang tabiak truh labik njauk bala.

Labaih sa adit tapa, di tỉnh Trà Vinh gam gam hu hajan praong, ngak ka ia dalam danao raong hadang samar salih karei, ralo danao raong hu jit ruak  bimao patih, bhong rup, ruak jalan tung pruac. Kuhria taong abih taneh danao raong njauk khat lahik  jaik 700 ha, tagok jaik 120 ha dut saong adit dahlau di nan. Pataom ralo di dom huyện Cầu Ngang, Duyên Hải, ban sit Duyên Hải. Urak ini, Sở Ngak nong saong Patagok palei tỉnh hu brei rilo urang jakar ky thuat trun daong, tacei pato urang ngak nong peih ngak dom jalan pacang caga ruak ka hadang; daong urang ngak nong dut iek halau ia, ba ia tame danao. Tui nan pachreih dom urang raong hadang juai pandar ilamu cong nghe glong, ngak njauk bruk brei hlang hacih dahlau di tuk ba tame danao.

ASEAN bahrau jao lô pandap daong hu yaom 100.000 USD meng Hệ thống hậu cần samar drah bala di langik tasik daong ka rahra Myanmar njauk kan kandah kayua mbang ribuk nhiệt đới Mocha. Langiu di nan, ASEAN jeng hu jak ba dom taneh dalam kapul gam haong dom taneh ia pambuak bruk di gah langiu, dalam nan hu gam kapul ngak pahla dunya, rik daong pabak piah daong ka dom kham marat di kapul saong klah rabha dom kan kandah haong rahra Myanmar njauk kan kandah kayua ribuk Mocha. Harei 14/5, ribuk Mocha tuh tame Myanmar ngak ka 145 urang metai, 131 urang njauk rambuac saong 912.000 urang njauk panduan ba nao daok di labik karei. Labaih 860 baoh sang, 14 sang iek ruak saong dom labik y tế njauk tayah tayaic.

Yam ndoc điều hành Kadung Jien Dunya (IMF) brei mboh hatai jia lac Mỹ oh plaih hu bruk pacah sraiy di harei 1/6 anak tal. Gam haong nan ndom lac jien đô la Mỹ jeng daok hu pein lac jien khik piah di dunya yaom lac dak harei dak hu rilo bruk ginum biai di dom taneh ia piah trun bruk pambak tame jien hijao. Rajaei Mỹ meda suai bayar jien dom hóa đơn di bilan anak tal saong oh bayar sre hu meyah Quoc hoi oh paglong jien sre 31 ribau 400 tỷ đôla ngan haong paok jien sraiy di rajaei, sa bruk meda ba tal sraw kadau kinh te saong sraw kadau di darak pasar jien padai dunya.

Gah di cư dunya brei thau lac, bruk mesuh gauk biak khang luac labaih 1 bilan tapa di Sudan ngak ka labaih 1 triệu urang klak sang danaok nao tal labik salamat. Bruk mesuh gauk rahtabiak di harei 15/4 hadei di rilo bilan catang tagok di Bol lin Sudan saong nyaom bán quân sự praong di taneh ia ini,  ngak suan jalan maong pasiam veik bruk patui jalan dân chủ daok biak lapih. Tui Liên hợp quốc, hu takik di nyu 863 rahra metai saong labaih 3 ribau 500 urang karei njauk rambuac, dalam nan hu rilo uranaih./.