Biar harei kabroi, Phaok akaok Mentri Bangsa saong Agama Nguyễn Hải Trung gam haong dom urang jakar Mban Agama Rajaei hu var ngak bruk saong pasang iek bruk ramik caga ndap nda labik peih ngak Roya Vesak Lien Hiep Quoc 2025 di Hoc vien Phat giao Viet Nam di Ban raya HCM. Ong Nguyễn Hải Trung caong khin dom mban, dom gah saong Giao hoi Phat giao Viet Nam pataom iek veik taong abih bruk kuhria sap pagap dahlau, piah Roya Vesak 2025 hu peih ngak njauk bruk saong khik brei hu salamat taong abih dom bruk pambuak tal Roya ini. Pakat karja Ban raya HCM jeng brei mboh bruk kham daong hu siam abih bruk piah Roya peih ngak hu siam mekre.

Bilan amriak kalu thun ini daok tame tukvak brei paik ralo asar, ba rilo bui sambai mai ka urang pala nyu di Gia Lai tuk amraik kalu pablei hu 160.000 dong sa kilo. Jaik 100 urang di HTX Ngak nong saong Jitvu Nam Yang, huyen Đăk Đoa caong khin bilan amriak kalu ini meda ba mai yaok pluh ti dong meng bruk pala 50 hecta  amriak kalu brei hu rilo asar. HTX jak ba urang ngak nong  brei pala tui jalan hacih sa-at, tui tanut pablei tabiak negar langiu. Thun ini, yaom lac taneh pala amriak kalu  oh hu peih praong yau dahlau diah, min urang pala amriak kalu  di Gia Lai jien mek tame ralo laba kayua yaom pablei glong saong amriak brei rilo asar tani tanat.

Kapol Dam dara CSHCM Ban Can Tho peih ngak rilo bruk sumu gauk ngan haong kadha “ Harei pataom uranaih ma-in bui siam mekre - Yam tagok tame Đoàn” thun 2025, pachreih labaih 163.000 urang đội dom kapol nyaom hu mbaok tame. Bruk ngak hu makna biak gheih lagaih  piah paglong akaok sahaneng di uranaih hu tame   Kapol Dam dara CSHCM. Var ini, Hoi dong Ban Can Tho hu alin brei 200 blah siuk tanyiak takoi meriak bhong  ka uranaih đội saong 2 paok jien bac, yaok paok yaom 18 trieu dong ka 2 adei metui amaik ame kayua jit COVID-19 daok pak ini.

Anak bruk rah tabiak sraw kadau di jit ruak soi, meng akaok thun tal ini, tinh Dak Lak hu 206 mbang urang njom ruak, tagok do sumu tukvak ini thun dahlau, pataom  tame ralo di huyen Buôn Đôn, Krông Pắc, M’Drắk saong Ea Súp. Dalam nan, 30% mbang dom urang ruak soi di Dak Lak lac uranaih umo meng 1 – 4 thun, ralo lac uranaih oh ka hu klauk jru vaccine caga ruak. Gah y te Dak Lak hu tui iek jit ruak, brei klauk jru pabak veik vaccine ka uranaih oh ka jhu klauk jru ginup, brei ramik hacih dom labik hu urang ruak saong jhul pakhang bruk pathau khan, paglong jalan sahaneng di bhap bini ka bruk caga ruak.

UB bhap bini tinh Dong Nai birau ba tabiak bruk taong phat hanh chinh  dalam gah khik iek alam moi truong ngan haong Kong ty Co phan Sang iek ruak  Dong Nai 2 ka bruk ngak suan “ Oh hu harak gal ka alam moi truong tui bruk ba tabiak  di pakat hu tham quyen  brei sarak di UB bhap bini tinh”. Tui nan, UB bhap bini tinh Dong Nai brei taong phat 300 trieu dong. Dalam 10 harei kuhria meng harei taduan hu harak taong phat, Kong ti Co phan Sang iek ruak Dong Nai 2 brei kak jien yau angaok nan.

Trung Quoc birau atah klak bruk Tong thong Philippines dahlau diah Rodrigo Duterte saong baoh sang di ong likau tị nạn di taneh ia ini saong khan lac oh ka mboh panuac halei dreih yau bruk ini. Tui Phu Tong thong Philippines, canh sat taneh ia ini brei chap mek tui Toa an Hình sự Dunya ngan haong ong Duterte pambak tal bruk pacang caga matuy di ong tuk daok ngak bruk. Urak ini ong Duterte daok kareik di sa pasak di La Hay, Hà Lan, cang tal harei 23/9 ba tabiak langyah.

Australia lac taneh ia hu bruk pato megru salih birau pachreih hu rilo anek saih dunya mai ini bac. Yau nan min di taneh ia ini, anek saih bac tamat tal 12 gilac trun hu biak takik, trun meng 83% di thun 2020 trun daok 79% di thun ini. Oh lac yau nan saoh, 20% anek saih tal bac 10 oh khin bac tagok tal 12. Anak bruk nan, Rajaei Australia daok buh jien padai tame bruk pato megru piah paglong asar siam saong parilo anek saih mai bac.

Karja  Bolivia harei kabroi khan lac, dom ban di karja pak ini brei thau ka bala kayua hajan praong tagok tal taka 90. Rilo labik hu hajan  praong ngak ia sua ia dauk, glut jaleih taneh saong khut tayak rilo jalan mbak, drap ar. Hu labaih 368 ribau baoh sang  gaok kan kandah, hu 50 urang metai. Rajaei Bolivia brei ba mac moc praong tame kuac ribong kraong saong parabha pandap padang ngak brei kajap paga pacang saong kakei dahlau bala mai meng bruk ia kraong mbuan tagok glong katuah./.