Dalam mbang rivang saong ngak bruk di tỉnh Bình Dương biar harei 29/3, Phaok akok negar  Võ Thị Ánh Xuân hu alin 30 paok pandap ka dom urang dalam sarak karja saong baoh sang urang dalam sarak naih gheih; 20 paok pandap ka anek saih sang kan kathaot di ban sit Bến Cát; alin brei 200 trieu đồng meng Kadung jien daong uranaih Viet Nam ka Kadung jien Daong uranaih tỉnh Bình Dương. Meyaom dom bruk ngak hu siam di Bình Dương dalam thun 2022, Phaok akok negar khan lac, T.Ư hu ba tabiak rilo sarak patagok ngan hoang 6 bhum kinh te di taneh ia, dalam nan hu bhum ĐNB. Bình Dương lac sa tỉnh caong khin hu rilo lagaih patagok. Yau nan ye, tỉnh brei hu dom kịch bản piah lagaih haong bruk di urak ini; patui bruk salih birau jalan sahaneng, ngak jeng bruk praong ka Bình Dương dalam tukvak cak rok patagok birau.

UBND tỉnh Bình Thuận hu jao ka Mban khik ramik dự án padang ngak danak dak ka rahra saong ngak kong tỉnh ngak po buh jien tame dự án di danak dak  patagok gah y tế bhum kan kandah, phun jien masaiy ADB (di Mintri Y tế) ngan haong paok jien jaik 107 tỷ đồng piah padang ngak bahrau saong ramik ngak pasiam veik 25 bilai y tế, dalam nan hu rilo bilai y tế khut, mbiah mbaoh biak rilo… Dom danak dak ngak salah hu ba tame pandar meda pabak hu labik, pandap panda piah duh ka bruk iek ruak, taong ruak, pacang caga jit ruak, brei ka rahra daok di bhum palei pala, bhum atah biyah, bhum mikva bangsa takik.

Meng harei 6/4 tal harei 9/4, di Ban raya HCM  meda peih ngak Harei pataom Du lich  mbang ka 19.  Ngan haong kadha “Labik pasak pataom gauk – Jalan nao chreih chrai”, Harei pataom Du lich Ban raya HCM thun ini hu rilo bruk ngak saong pachreih pambuak bruk cak rok patagok dulich  di ban raya ngan haong jaik 50 tỉnh, ban saong ba mbuan lagaih ka dom bhum palei saong doanh nghiep hu taom gaok, lagaih  dom pandap, pachreih bruk dulich dalam taneh ia dalam dom harei padeih le 30/4 – 1/5 saong bilan hè 2023. Meng nan pasiam pabak veik bruk ngak dulich hadei tuk kan kandah kayua jit ruak COVID-19, rik tame caik rok patagok kinh te di taneh ia.

Mblang kapal haoh Cà Mau daok caga blaoh blai ka bruk peih jalan par nao Hà Nội meng 29/4. Cà Mau meda peih mbang par tapak par nao, par mai Hà Nội – ban Cà Mau (tỉnh Cà Mau) meng hãng kapar haoh Bamboo Airways. Mbang par camriep lac harei 29/4 saong hu 3 mbang sa adit di harei angar, harei jip saong harei sanecar. Mbang par meng Cà Mau tal Hà Nội hu par tagok di maong 9, 55 minitsaong par trun di maong 12, 10 minit. Daok mbang par Hà Nội - Cà Mau hu par tagok di maong 7, 5 minit saong par trun di maong 9, 25 minit. Abih tih tukvak par lac 2 maong, 15 minit.

Kadung jien Dan so LHQ  (UNFPA) di Việt Nam brei thau dân số Việt Nam meda samar hu 100 trieu urang saong tapa nan ba Viet Nam  jeng taneh ia rilo  bhap bini ka 15 di dunya. UNFPA brei thau: Ini lac sa bruk hu makna praong dalam ngan haong Viet Nam. Bhap bini 100 trieu urang, makna lac Viet Nam hu sa darak pasar praong dalam negar, pachreih rilo phun jien jang meng negar langiu buh tame  ngak mbang ngan haong urang ngak bruk prein yawa khang kajap, hu ilamu ngak bruk glong, duah sahaneng tabiak birau jeng yau prein patagok khang di taneh ia.

 Jalan pasei Lào - Trung Quốc hu peih bruk pajeng tuai meng 13/4. Tui nan, tuai meda nao mai Lào - Trung Quốc tapa jalan pasei atah labaih 1.000km pambuak meng ban ine Vientiane di Lào tal ban Côn Minh, tỉnh Vân Nam, Trung Quốc. Tuai jeng daok ngak harak adat tame tabiak di pabah mbang negar dunya min oh salih radaih pui yau urak ini. Ini lac radaih pui pajeng tuai tapa negar Lào - Trung Quốc camriep abih, rikdaong jhul patagok bruk hu rilo tuai nao mai ngan haong yaom jien lap. 

 Ấn Độ hu urang njaom ruak COVID-19 glong abih dalam 5 bilan. Kuhria dalam 24 tuk tapa, taneh ia ini hu abih tih 2.151 mbang urang birau njom ruak, dalam nan  hu 7 urang metai. Mentri Y tế Ấn Độ caong khin dom bang saong bhum taneh pambuak tal psang iek prein khang pacang caga jit ruak di dom jabat y tế, dalam nan hu jru tavao, pandap y te, jeng yau urang ngak bruk brei klauk jru saong ginup pandap panda ngak bruk. Tui nan, brei panuac tacei dom bang saong bhum taneh lien bang  brei ngak njauk tui dom quy định dalam bruk  pacang caga jit COVID-19.

Negar Anh daok hu bruk pachreih brei tame Hiệp định pambuak gauk abih gah saong Tiến bộ tapa Thái Bình Dương (CPTPP) meng taong abih 11 taneh ia dalam kapul. Tui kuhria, dom gah meda samar mek hu dom sanya praong ka bruk pambuak gauk ini. Mayah dom bruk hu rahtabiak siam lagaih, Anh hu jalan jeng taneh ia camriep abih oh lac taneh ia dalam kapul dom taneh ia padang tabiak hu ba tame CPTPP.  Urak ini, Trung Quốc đại lục saong Đài Loan (Trung Quốc) lac dua gah kinh tế hu nộp harak likau tame CPTPP meng bilan 9/2021. Min, bruk pasang iek brei tame 2 taneh ia ini daok hu rilo cuang kandah, tavak tavaiy./.