Taom gaok cử tri hadei di mbang nyaom ka 4, Quoc hoi mbang XV, di huyen bhum taphia negar Tịnh Biên saong ban Châu Đốc, tỉnh An Giang harei 28/11, Phaok Akok negar Võ Thị Ánh Xuân ndom lac, tukvak anak tal, langiu di bruk pataom tame cak rok patagok kinh te - xa hoi, paglong radiuk bhap bini, An Giang brei pataom tame paglong prein ngak bruk di pakat uy Đảng, karja, dom kapol  nyaom dom pakat  jeng yau urang jakar dalam tukvak birau; dak padang urang jakar ngak bruk chinh trị hacih jangaih khang kajap, njuak haong bruk jia tame di bhap bini. Abih di nyu, lac bruk paglong asar, jalan sahaneng chinh tri di kapol urang jakar ngak bruk pacang buon lau, khik caga bhum taphia negar.

 Bruk blei pandap panda di darak pasa Kiên Giang meda tagok khang dalam tuk Tết Nguyên đán 2023, kayua yau nan ye, tui kuhria  abih tih pandap panda pandar ka tuk Tết Nguyên đán thun sak tapai 2023 lac jaik 55.000 tấn, yaom labaih 2.400 tỉ đồng. Urak ini, dom doanh nghiệp praong di tỉnh kham merat patagok bruk ngak piah hu ginup pandap pabak ka darak pasa tết saong caga dahlau ka bruk kurang pandap panda. Dom siêu thị peih praong bruk parabha tal dom puk palei, kaoh pulao, bhum tapen negar, bhum atah biyah piah pabak ginup pandap panda ka bhap bini dalam tuk tết.

Danak dak Jalan Vành đai 3 atah labaih 47 km, nao tapa 4 labik nan lac Ban Thủ Đức, huyện Củ Chi,  Hóc Môn saong Bình Chánh. Tui quy hoach Jalan Vành đai 3 Ban raya HCM, dom baoh sang tavak tame labaih 1.670, dalam nan hu 663 baoh sang njauk yah klaak abih mbong. Bruk kuhria jien ndo kayua karja labik nan  ba tabiak yaom bayar jien taneh meng labaih 18 triệu đồng/m2 tal labaih 40 triệu đồng/m2. Tui bruk ba tabiak, kreh thun  2023, jalan Vành đai 3 hu jao brei 70% mbaok taneh saong jao taong abih hadei 6 bilan. Yau nan  min, Ban raya Ho Chi Minh daok kham merat ngak brei salah aval jang.

Thanh tra tỉnh Bạc Liêu bahrau brei thau bruk pasang ieksang iek ruak Lao saong ruak phổi. Sang iek ruak Lao saong ruak phổi Bạc Liêu hu padang ngak di mblang taneh praong 13.000 m2, hu 100 manieng ndik ka urang ruak, abih tih jien buh tame ngak lac labaih 200 tỉ đồng, hu 143 urang jakar. Min, hadei di jaik 3 thun ngak salah, sang iek ruak jeng ka oh taduan urang ruak. Urak ini, dom pandap panda jamraik rilo meng khut, sét mbang, oh pandar hu, ngak palai pajoa tal kadung jien kanja.

Melam 28/11, Jabat Uy mban salamat jalan mbak pakat negar hu brei thau ka bruk bala ngaok jalan mbak bilan 11 thun 2022. Dalam negar rah tabiak labaih 1.000 mbang bala ngaok jalan mbak, ngak brei 579 urang metai saong 833 urang njuak rambuac. Dut haong bilan ini thun 2021 trun 70 mbang bala, tagok 15  urang metai, trun 7 urang njauk rambuac. Dalam nan, angaok jalan mbak rah tabiak 1.102 mbang, ngak brei 570 urang metai, 831 urang njuak rambuac.

Dah page ini (29/11), di Ấn Độ, hu peih mbang nyaom ka 59 di Đại hội đồng Hiệp hội papar sap, papar binguk châu Á – Thái Bình Dương (ABU). Mbang nyaom ka 59 Đại hội đồng ABU thun ini hu asal kadha lac “Duh ka anek manuac: bruk di Rayo dalam jaman srau kadau”. Mbang nyaom ini langiu di dom bruk chuyên môn, dom mbang ginum biai jeng pataom tame ngak brei cambaih bruk duah thau hatai di manuac sia dalam tukvak sarau kadhau saong bruk njauk ngak di gah rayo  ba  dom jalan pacang veik haong  biến đổi khí hậu. Thun 2022, Rayo sap ndem Viet Nam hu mbaok tame pacacah Jai thuong ABU ngan haong 9 kadha di 3 nyaom pacacah lac papar sap, papar binguk saong Truyền thông số. Tapa mbang pacacah hu 03 kadha mek hu Giải thưởng ABU 2022. 

Jabat cảnh sát châu Âu (Europol) hu pambuak gauk chap mek  kapol urang biak jhak gah matúy pasang iek labaih 1/3 dom bruk pablei salih dalam dom taneh ia châu Âu. Cảnh sát chap khik abih tih 49 urang  dalam dom mbang chap mek di Bỉ, Pháp, Hà Lan, Tây Ban Nha saong  Các Tiểu vương quốc Ả-rập Thống nhất meng harei 8-9/11. Langiu di nan, labaih 30 tấn matúy njuak chap khik dalam tuk duah thau. Europol mboh lac, bruk ba matuy tame  châu Âu  di “ kapol urang biak jhak gah matúy nan biak ralo.

Dalam 9 bilan tapa bahrau hu jaik 600 ribau uranaih hu manek tabiak di Nhật Bản, bier jang 4,9% dut saong tukvak ini thun blaoh. Ini lac kadha njauk duh hatai ka bruk manek trun khang,  mbuan ngak lahik cân bằng rahra di Nhật Bản. Tui kuhria, mayah bruk ini daok rah tabiak yau nan, ye tui kuhria dalam thun ini, Nhật Bản meda lac mbang camriep hu mboh dom uranaih hu manek tabiak yaok thun di tanut mala 800.000 uranaih, bier jang di abih meng di tuk  yaok pataom rahra meng di thun 1899./.