Tui Phó Akaok negar Võ Thị Ánh Xuân, meng labik lac sa dalam dom tinh kathaot abih dalam taneh ia, Ninh Thuận hu salih jalan, pilih ruah dom bruk ngak praong pambuak haong prein khang, lagaih haong bruk langik tasik, taneh riya di dalam tinh piah patagok, yam tagok jeng tinh hu jien mek tame mbiah. Gam haong bruk cak rok patagok kinh te, pak ini jeng hu buh tabiak dom phun jien piah sangka dom bruk siam makre ka rahra, abih di nyu nan lac dom urang sarak kanja, urang hu prein haong CM, sang kathaot, mikva daok di bhum atah biyah, bhum bangsa takik, tapa nan daong ka dom urang sahanang hatai tani tanat raidiuk.

Bilan padai Thu Đông thun ini, urang nong ban Cần Thơ trun pajaih labaih 68.000 hecta, urak ini rilo mblang padai daok dalam tuk sraoh nerang. Dom pajaih padai pahe, padai siam hu urang pala di labaih 90% mblang hamu piah pablei dalam taneh ia saong pablei tabiak negar langiu. Piah pachreih bhap bini hu mbaok tame bruk ngak padai khang kajap, bahrau ini, Cần Thơ hu meyaom meng jien ka dom sang urang ngak nong. Dom sang taduan hu jien meyaom nan daok dalam  danak dak pambuak bruk haong Viện Roh duah padai brah dunya IRRI ngak iek di 4 hợp tác xã dalam huyện Vĩnh Thạnh ngak tui jalan pala “1 njauk, 5 trun” saong patrun tathuak nerak sang kreih camin.

Urang ngak nong tỉnh Bến Tre daok chreih chrai, samar drah tame bilan bingu Tết thun ini. Bingu Cúc hu mikva trun pajaih pala dahlau di abih, kayua janih bingu ini 6 bilan meng tabiak bingu. Hadei di nan, urang pala meda trun pajaih pala dom janih bingu katut harei karei, daok bingu ba-ar hu pala luac thun. Pala bingu kiểng Tết lac bruk ngak meng kan di urang ngak nong pak tỉnh Bến Tre yaok piluh thun tapa ngan haong rilo janih bingu; dalam nan pala rilo abih jeng lac dom janih bingu Cúc, Mào gà, Vạn thọ, bingu ba-ar. Yaok thun, tuk Tết tal, urang ngak nong pak tỉnh Bến Tre pabak ka darak pasa di grauk labik dalam taneh ia yaok piluh trieu pandap bingu dom janih.

Tui Pasak pasang iek ruak kik tỉnh Bình Phước, meng akaok thun tal ini, dalam tỉnh hu jaik 1.150 mbang urang njauk ruak pandiak tabiak darah, dalam nan hu 1 urang matai. Di ban sit Phước Long hu menuac ruak rilo abih lac 248 urang. Piah pacang caga jit ruak, dom puk palei dalam tỉnh Bình Phước daok kham merat brei pametai lăng quăng, pathau khan bhap bini jalan  pacang caga pandiak tabiak darah. Gah y tế kakei lac, bhap bini brei pacang caga meng bruk bhian puh ramik hacih sa-at labik daok, ndih kamo, cuk capha ao atah tangin saong pandar dom janih jru pateok jamaok.

Pasak kuhria mboh dahlau bruk magei baoh taneh saong riyak khang - Viện Vật lý Địa cầu di Viện Hàn lâm Khoa học saong kong nghe Việt Nam brei thau, dah page ini, di huyện Kon Plông, tỉnh Kon Tum rahtabiak gam gam 3 mbang magei baoh taneh khang meng 2.5 tal 3.0 độ, pasak megei di labik dalam meng 8.0 tal 8.3 km. Dom mbang magei baoh taneh ini hu taong yaom lac pakat 0. Dahlau di nan, dalam harei kabroi, jeng di huyện Kon Plông, tỉnh Kon Tum hu 4 mbang magei baoh taneh.

Châu Á - Thái Bình Dương hu labaih meteh khí tathuak ngak nerak sang kreih camin dunya saong saong gaok kan kandah meng bala di langik tasik saong dom bala meng khí hậu karei karei rilo jang dom bhum karei angaok dunya. Meyah oh hu dữ liệu chất lượng glaong saong prein duah thau, dom urang ngak sarak dalam bhum oh ba tabiak hu dom jalan ngak siam lagaih, piah langyah makna saong bruk kan kandah di  langik tasik, jeng yau taong yaom siam lagaih di dom jalan ngak ini.

Tổng thống Ghana Nana Akufo-Addo bahrau brei thau lac negar ini daok tame bruk peih ngak danak dak pasak menyek yaom 12 tỷ đôla Mỹ, tapa bruk padang ngak sa sang mac halang manyek hu prein 300.000 thung sa harei. Danak dak ini hu maong lac ba taneh ia Tây Phi jeng pasak menyek dalam bhum. Brei panuac anak urang ngak báo, Tổng thống Ghana ndem lac, danak dak bahrau ini meda lac jalan peih tabiak ka bruk cak rok patagok di gah ngak menyek taneh ia haong dom sang mac ngak manyek bahrau hu padang tagok.

Kapul ngak ô tô di Đức harei kabroi brei thau, taneh ia ini njauk yam tapa atah tacei pato di Liên minh Châu Âu ka nhiên liệu meyah caong mek hu bruk trung hòa carbon dalam nao mai jalan radaih di thun 2045. Dalam sa panuac ba tabiak bahrau ini, Kapul ngak ô tô di Đức ndom lac, janih radaih ini jeng daok brei nduac angaok jalan, yaom lac rajaei ngak hu bruk ba tabiak lac 15 triệu ô tô điện di thun 2030. Kapul ngak ô tô di Đức ndom lac, kayua kein laba di bruk khik pacang khí hậu, nhiên liệu hóa thạch oh daok hu adat pablei di dom trạm xăng di Đức meng thun 2045./.