Salam uan harei padang ban sit Tịnh Biên, tỉnh An Giang, Phó akaok negar Võ Thị Ánh Xuân mai rivang saong hu mbaok alin brei jien padang ngak sang bac Mam non Tuổi Thơ,  xã An Cư, ban sit Tịnh Biên haong yaom jien  lac 5 tỷ đồng kayua Gilang Pariak cổ phần Ngoại thương Việt Nam daong brei. Tapa nan, Pho akaok negar  hu alin 25 paok jien bac, yaok paok yaom 2 trieu dong brei ka dom anek saih bangsa Khmer sang kan kandah, bac da-a naih joi  di ban sit Tịnh Biên.

Di kalan kakuh Lạc Long Quân daok dalam labik ravang me-in pakat negar Mũi Cà Mau (xã Đất Mũi, huyện Ngọc Hiển, tỉnh Cà Mau), Đảng bộ, karja haong bhap bini tỉnh Cà Mau bahrau peih bruk ravang, pok bingu hadar dhar phor Đức Quốc Tổ Lạc Long Quân. Ini lac tuk piah ka mikva daok di bhum taneh jhung abih di taneh ia ba gauk hadar veik dom tukvak ginreih, praong damaong di bnagsa, iek praong, hadar tal prein yava di Quốc Tổ, patagok bruk “Menyum ia hadar halau ia”, daong ngak jeng prein khang piah dak padang, pakhang pasiam talei jum pataom bangsa. Gam haong nan, lac tuk piah ka tuai damuai hu thau jang ka bhum taneh saong anek menuac bhum taneh jhung abih di taneh ia, siam hatung hatian, rap ar tuai damuai, bak hatai anit ranam.

UBND TP.HCM ba tabiak sarak brei ramik pasiam yaom taneh piah kuhria bayar jien taneh, daong jien ka labik dao birau saong jien daong pato pakai, salih bruk ngak, duah bruk ngak ngan haong urang njauk Karja mek veik taneh ngak nong lac urang, baoh sang daok pala di taneh ngak nong di danak dak jalan Vành đai 3 TP.HCM. Dalam nan bayar jien Vành đai 3 hu mboh glong abih di Ban Thủ Đức labaih 73 trieu dong sa met vuong ka labik jalan Nguyễn Duy Trinh, patui nan lac jalan Nguyễn Xiển jaik 70 triệu đồng/m2. Kuhria taong abih jien brei bayar ka labik daok tai dinh cu  ka dom danak dak labaih 25.000 tỷ đồng, ta-eng danak dak Jalan Vành đai 3 lav 15.000 tỷ đồng.

Dom harei jaik ini, di labik padang ngak mblang kapal haoh pakat dunya Long Thành, tỉnh Đồng Nai bhian hu ngin, rabuk. Abih di nyu lac di biar harei 24-4, hu ngin rabuk biak praong dalam 8 minit, ngak brei rilo thur mur par tabiak rilo labik vil val mbang kapal haoh. Tui panuac khan di ong Đỗ Tất Bình, Yam ndok mBan khik ramik danak dak mblang kapal haoh Long Thành, bruk thur mur par tabiak meng bruk ngak di mblang kapal haoh Long Thành lac bruk kan kandah. Tukvak tapa, dom nhà thầu hu ngak samu gauk rilo jalan ngak piah patrun patakik thur mur. Min ini lac tukvak salih bilan, biar harei hu rilo ngin praong, ngin rabuk yuk thur mur meng mblang kapal haoh par tabiak atah, ngak kan kandah tal raidiuk di rahra.

Tui Pasak Kuhria mboh dahlau bruk langik tasik pakat negar: Njom ia mbak di dom pabah kraong di Bhum taneran kraong Cuu Long daok trun. Panuac brei thau ka bruk  mbuan gaok bala kayua njom ia mbak urak ini lac pakat 1 tal pakat 2. Jeng tui kuhria mboh dahlau: ia ndik daok trun tagok dalam tukvak anak tal. Dom bhum palei di Bhum taneran kraong Cuu Long njauk brei pabak sumu dom khaw tin kuhria mboh dahlau bruk langik tasik saong hu jalan caga dahlau, pacang ia mbak njom tame, khik caga bruk pala drak saong raong glang kaya dalam ia.

Hadei meng jak jeng di mbang pasram mesruh Rồng Vàng meng blaoh, bol bala Campuchia – Trung Quốc njauk gauk brei peih veik bruk pasram “quân sự nhân đạo” di kreh thun 2023. Đại tá  Bi Guangyuen, Yam ndok Pasak pambuak bruk quân y Trung Quốc ndom lac: Bruk pasram mbang ini hu makna biak praong ngan haong talei pambuak bruk di Trung Quốc haong Campuchia. Ong jeng ndom lac, bruk dunya urak ini hu rilo salih karei saong rilo cuang kandah, nan ye bruk pasram ini biak lagaih.

Urang birau njom ruak COVID-19 di ban ine Bangkok, Thái Lan tagok meng 400 – 700 urang sa harei. Urang birau njom COVID-19 meda tagok 1.000 urang dalam sa harei kayua rilo urang oh khan brei karja palei pak nan thau. Yau nan min, urang jakar Thái Lan kakei lac, bhap bini juai haduh hatai ka bruk tamuh jit ruak COVID-19 veik  kayua jaik abih dom mbang urang birau njom ruak lac bien the phụ klak, oh njauk biến thể phụ birau XBB.1.16 di Omicron hu prein njom mbak samar.

Gah Y tế dunya (WHO) hu panuac brei thau ka bruk mbuan hu bala sinh học di Sudan hadei di tuk sa dalam 2 gah mesruh gauk di taneh ia ini meblah mek Labik ngak iek y tế pakat negar, lac labik khik piah anek ruak sởi saong ruak aih craoh. Lambaok WHO brei thau, biah mbuan hu bala sinh học biak praong, tuk tapon nyom pan phao kraong meblah mek Bilik ngak iek saong ba tabiak abih dom menuac ngak di labik nan. Bruk dom urang kỹ thuật oh daok quyền truy cập tame bilik ngak iek, dalam tuk cakak điện daok rah tabiak, jeng hu makna lac dom pandap sinh học hu khik piah dalam bilik ngak iek, oh hu khik ramik njauk jalan./.