Harei kabroi, di Jabat Akaok negar, Phó Akaok negar Võ Thị Ánh Xuân taom gaok Kapul urang lambaok urang hu prein haong taneh ia angan je di tỉnh An Giang uan salam tuk Kapul nao rivang Ban ine Hà Nội tame Lăng rivang Chủ tịch Hồ Chí Minh. Urak ini, tỉnh An Giang hu labaih 40 ribau urang hu prein haong cách mạng, dalam nan hu jaik 10 ribau harak gar liệt sĩ; 751 amaik hu pok brei saong alin Angan amaik Việt Nam anh hùng, jaik 6 ribau thương, bệnh binh. Tal urak ini, jaik abih dom urang hu prein haong cách mạng saong gauk gar dalam tinh hu mbang tui njauk, ginup dom sarak daong sangka prein yava, daong sang danaok, dom bruk daong ka pato magru, pato bruk ngak, daong masaiy laba bier, ba bruk ngak. Phó akaok negar hu taong yaom glaong dom jak jeng dalam bruk cak rok patagok kinh tế - xã hội di tỉnh An Giang dalam tukvak tapa saong pok meyaom dom daong praong di dom urang hu prein haong cách mạng dalam bruk cak rok patagok di bhum palei.

Salam uan harei pahadar 20 thun padang TP. Cần Thơ daok dalam Trung ương, harei kabroi TP. Cần Thơ hu peih pakak saong caik biển Pasak pataok radaih saong dịch vụ ô tô quận Ninh Kiều. Pasak khik radaih praong abih TP. Cần Thơ ini hu yaom jien buh tame ngak abih tih 158 tỷ đồng,  hu 306 labik pataok radaih ô tô saong labaih 700 radaih mô tô meng hệ thống pataok radaih thông minh tui jalan gheng glaong, daong patrun hu bruk gar jalan. Pasak hu padang ngak di angtaok taneh praong labaih 4.200m2, pabak labik pataok radaih ô tô ka bhap bini.

Meng akaok bilan 8 tal urak ini, Kapul urang kumei tỉnh Đồng Nai hu peih tal Param peih ngak danak dak ““peih ngak bruk likei kumei samu gauk saong langyah samar drah dom bruk brei hu di urang kumei saong uranaih” ka dom urang dalam kapul, urang kumei di bhum mikva bangsa takik saong bhum ceik. Di tal pasram, Kapul urang kumei tỉnh Đồng Nai hu yaih khan dom asal kadha di Danak dak tal dom urang dalam kapul, urang kumei bangsa takik. Meng urak ini tal thun 2025, dalam tinh kham marat hu abih tih urang kumei bangsa takik hu pabak ilamo ka bruk samu gauk di likei, kumei saong hu mbaok tame dom bruk ngak di bhum palei; tani tanat urang kumei bangsa takik mek hu ilamo lac puac cambaih, vak cambaih sap Yuan. Yaok thun, khik tani tanat takik di nyu 90% dom urang kumei bangsa takik hu pathau khan, pabak ilamo pacang caga haong bruk taong paoh dalam sang.

Meng rilo makna, ngak ka rilo labik takai tasik, takai kraong di tỉnh Bến Tre daok glut jaleih biak khang. Tui yaok pataom, dalam tỉnh Bến Tre hu 112 labik glut jaleih takai kraong, takai tasik atah abih tih 134 km, ngak khut sang danaok, taneh pala drak di yaok ratuh baoh sang bhap bini. Ta-eng bruk glut jaleih takai tasik nyu ngak lahik 200 ha taneh saong 54 ha glai di 3 huyện tapen tasik lac Ba Tri, Thạnh Phú, Bình Đại. Dalam tuk daok cang phun jien meng Trung ương piah pasiam veik, tỉnh Bến Tre hu peih ngak dom jalan pacang caga glut jaleih patui di nan, dalam nan hu bruk panduan ba dom sang mbuan glut jaleih nao daok di labik karei, ngak paga pacang, tui iek piah langyah tuk hu bruk glut jaleih rah tabiak.

Ong Trương Công Thiện, Akaok UBND xã Ea Kpam, huyện Cư M’gar, tỉnh Đắk Lắk brei thau lac, dalam xã bahrau mboh 3 urang di pak bhum palei karei mai pandar mac pachreih dien piah cap mek anek laneng haluk dalam bein cao su. Urang pan akaok UBND xã Ea Kpam hu pato tacei kapul Công an xã mai tal labik rahtabiak bruk ini ngan haong 3 urang, pataom mek 5 kg laneng that, 1 paok pachreih dien, 6 cuộn talei dien yaok cuộn atah 20m. Ngak bruk haong jabat chức năng, dom urang khan lac daok pak xã Ea Hđing, huyện Cư M’gar, nao mek laneng mai raong manuk. Hadei di nan, Công an xã Ea Kpam hu ngak harak gar, cap khik dom pandap panda hu pambuak tal saong payua ka Công an huyện Cư M’gar patui veik ngak cambaih laih, langyah tui njauk adat.

Japon harei kabroi (20/9) peih ngak danak dak klauk jru pacang  Covid-19 mbang bharau ka taong abih rahra meng 6 bilan tagok piah pacang cakak bruk patagok dom urang njauk ruak meda hu rilo dalam bilan la-an jaik tal. Dom janih vắc-xin hu pandar dalam mbang klauk jru ini pamaong tal dom biến thể phụ pambuak tal biến thể XBB di chủng Omicron. Japon hu ginup 20 triệu mbang vắc xin di hãng Pfizer saong 5 triệu mbang di hãng Moderna, gam haong nan, daok tacei pato karja dom puk palei kakei urang taha saong urang hu ruak dalam rup, njauk nao klauk jru. Japon urak ini jeng daok khik danak dak klauk vaccine Covid-19 brei saoh, yau sa jalan ngak praong mbiah tal jhung bilan 3 thun 2024.

Công ty giải trí saong truyền thông đa phương tiện praong abih di dunya Walt Disney bahrau brei thau lac meda tagok jaik dua mbang phun jien buh tame ka gah pablei salih di mblang ma-in tagok tal labaih 60 tỷ USD dalam 10 thun anak tal. Dom mblang ma-in hu jeng lac labik mek jien tame biak lagaih ka Disney saong daong trun manieng dom paok jien lahik dalam bruk pablei salih online. Yam ndok Iger brei thau, công ty hu jalan buh jien tame 17 tỷ USD tame bang Florida dalam piluh thun anak tal, gam tui di nan jeng ba tabiak jalan ngak suai lavik ka dom labik rivang iek bahrau di labik padeih padai Disneyland di bang California. Pathau khan ka jalan buh jien tame di Cty hu peih tabiak hadei di tuk bruk pablei salih di Walt Disney World di bang Orlando hu suai gilac veik, dalam tuk dom urang mai tal dom mblang ma-in di Cty ini di grauk labik di dunya tagok samar jang.

Lin tasik Brazil khan lac bahrau cap mek hu 3,6 tấn ma túy angaok sa sruh kapal di langiu tasik gah Đông Bắc bang Pernambuco. Ini lac bruk cap mek ma túy langiu tasik praong abih di taneh ia ini. Baoh kapal hu 5 thủy thủ daok angaok jalan nao tal châu Phi, min hu kapal khik iek di lin tasik Brazil dui mai cảng Ricife. Bruk cap mek nan rah tabiak hadei di tuk lin tasik Brazil peih tabiak rilo bruk ngak pacang pajeng ba ma túy meng jalan tasik. Lin tasik Brazil brei thau, labaih 17 tấn cocaine, 18,5 tấn cần sa, 695 tấn pakao hala,  113 tấn ikan haong 3.146 m3 kayau hu cap mek kuhria meng thun 2020./.