Di tuk uan harei Chôl Chnăm Thmây di mikva bangsa Khmer, bier harei 2/4, Uỷ viên Mintri Chính trị, Phó akaok Thường trực Quốc hội Trần Thanh Mẫn hu nao rivang tadhau ayuh saong alin pandap ka mikva bangsa Khmer di ban Cần Thơ. Di dom labik hu nao rivang, Phó akaok Quốc hội jeng brei thau lac, mikva Khmer hu rik tame rilo prein yava piah ngak pasiam veik dom baoh paha; jak ba dom phật tử sangka tal bruk ngak mbang, pablei salih piah pasiam veik raidiuk, patruh eik patrun kathaot; jia lac meng bruk ngak saong angan je di drei, dom ong bhik, achar gam haong mikva Khmer daok hu dom rik daong siam lagaih jang tame bruk  jum pataom bangsa, padang ngak saong khik caga taneh ia dak harei dak khang kajap jang.

Klau bilan akaok thun, Mintri Jalan mbak Pajeng ba hu peih jaik 17.000 tỷ đồng, glaong jang tanut kuhria rah tapa dalam taneh ia. Min yaom jien ini rilo meng brei dahlau meneing ka dom danak dak thành phần di dự án jalan nduac samar Bắc - Nam tukvak 2. Nan ye Akaok Mintri jalan mbak pajeng ba hu panuac ieu dom po đầu tư, mban khik ramik danak dak, brei jhul samar bruk padang ngak dom labik: Mai Sơn – jalan roya 45, Vĩnh Hảo - Phan Thiết saong Phan Thiết - Dầu Giây, ngak salah saong ba tame pandar dalam bilan 4 ni. Daok dom labik jalan nduac samar: Biên Hòa - Vũng Tàu, Khánh Hòa - Buôn Ma Thuột, Châu Đốc - Cần Thơ - Sóc Trăng, jalan Vành đai 3 TPHCM brei ngak salah harak gar tui adat hukum saong peih bruk padang ngak dahlau di harei 30-6.

 Nyaom biai pataom iek veik bruk kinh tế - xã hội quí 1 saong peih ngak dom bruk dalam quý 2 hu peih tabiak bahrau ini, akaok UBND TP.HCM Phan Văn Mãi brei thau lac, meng biak rilo bruk daok kadaong veik saong tamuh tabiak praong, nan ye yaok jabat kanja hành chính, dom sở, dom gah, yaok urang jakar công chức, viên chức njauk pasang iek veik haong hatai ngak bruk glaong di abih, peih ngak siam bruk ngak di drei. Gam haong nan ieu kakei  samar drah peih brei phun jien đầu tư công, jhul samar dom danak dak praong abih di nyu lac Vành đai 3. Patui veik dom jalan ngak piah taoh talaih dom kan kandah ka doanh nghiệp, jhul khang bruk pachreih buh jien tame, pato pakai ka urang ngak…

Di Đồng Tháp, yaom lac daok dalam bilan  thu min sa bruk glut jaleih di jalan kraong Đốc Phủ Hiền, xã Tân Phú Đông, ban Sa Đéc ngak brei 1 baoh sang jaleih trun kraong saong 10 sang daok veik njauk pacang cakak kayua glut jaleih. Hadei di tuk rah tabiak glut jaleih, dom gah saong karja palei hu mbaok pak di labik nan piah ieu pataom dom gah mai daong, pasiam bruk glut jaleih. Tukvak anak tal, palei brei ba dom sang daok jaik jalan ini nao daok labik karei piah khik salamat ka menuac sia saong drap ar bhap bini. Anak meta, brei ngak pasiam labik glut jaleih ini piah khik tani tanat, oh caik ka nyu glut jaleih jang”.

Di dom danao, kraong ribaong di xã Long Thạnh, huyện Vĩnh Lợi, tỉnh Bạc Liêu rahra hu mboh dom drei baya praong sit, ngak suh sah ka bhap bini. Piah khk salamat ka rahra, xã Long Thạnh ieu kakei dom Akaok palei pathau khan dalam labik, kakei bhap bini njauk caik hatai. Tuk mboh baya, rahra njauk khan chip ka kanja palei thau piah samar drah langyah.

Dom bruk puac abih di jalan pasei nduac samar Jakarta – Bandung di Indonesia kayua nhà thầu Trung Quốc ngak, daok hu ngak ka nyu salah piah peih pakak di bilan 8/2023. Tui padang ngak, jalan nduac samar nduac hu 350 km/h, tui nan, nao mai Jakarta – Bandung hu dui katut panak tukvak veik, meng 3 mon trun daok 40 minit. Bruk padang ngak jalan pasei nduac samar Jakarta-Bandung daok dalam danak dak Sáng kiến Vành đai – Baoh jalan di Trung Quốc saong jeng lac sa dalam dom danak dak praong pakat negar di Indonesia.

 Kapul ngak pahla Liby khan lac daong hu ka 92 urang di cư, dalam nan hu labaih 40 ranaih  di langiu tasik ini. Dom urang ini hu daong tuk daok nao di mangaok gilai phao biak rilo manuac saong njauk karam. Bilan 3 bahrau blaoh, 30 urang metai hadei di tuk sruh gilai di cư meng Libya njauk tapleik kayua langik tasik jhak. Tui pathau khan di Liên Hợp Quốc, takik di nyu 12.000 urang di cư tapa tasik Đại Trung Hải hu tal Italia meng di tuk akaok thun tal urak ini.

Meng rilo harei ini mai, yaok rabau menuac bhian pataom gauk di gah langiu pasak cứu trợ di Pakistan piah hu taduan mek tapung. Tui kuhria, lạm phát tagok labaih 30% di taneh ia Nam Á ini ngak ka pandap panda mbang menyum saong điện tagok biak khang. Kayua hu rilo menuac jaik gauk di dom labik cứu trợ, takik di nyu 16 urang, dalam nan hu rilo urang kumei saong uranaih metai. Pakistan daok dalam kan kandah kinh tế dui atah saong jien rupi laik yaom, pandap mbang tagok 50%. Pakistan daok dang anak dom srau kadau ka bruk thanh toán saong njauk ginum biai ka bruk daong brei haong Kadung jien dunya (IMF)./.