Page ini 18/11, di var nao ngak bruk di tỉnh Hậu Giang, UV Mentri Chính trị, Pho Akok Thường trực Quốc hội Trần Thanh Mẫn hu alin hadiah 20 baoh sang Jum pataom, yaom 1 tỉ đồng meng Kadung jien “Daong urang kathaot” Trung ương saong alin hadiah 20 paok pandap, yaok paok yaom 1, 2 triệu đồng ka urang kathaot di huyen Phụng Hiệp, tỉnh Hậu Giang. Tapa nan, ong Nghiêm Xuân Thành - Ủy viên Trung ương Đảng, Bí thư Tỉnh ủy Hậu Giang hu alin hadiah 4 baoh mac tính, máy in ka dom jabat, đơn vị di huyen Phụng Hiệp yaom 60 triệu đồng.

Salam uan harei Gru pato Việt Nam thun ini, Sở Pato Megru TPHCM peih bruk taom gaok 25 gru pato naih gheih di dalam 25 thun Giải thưởng Võ Trường Toản saong 50 gru pato taduan mek Giải thưởng Võ Trường Toản mbang ka 25. Giải thưởng lac sa dalam dom bruk daong ka menuac sia pok meyaom prein yava di dom cei gru, anai gru, tapa nan patui ilamu iek praong gru pato meng kan mai di bangsa. Di tuk peih bruk, ong Nguyễn Xuân Hiếu, Yam ndok Sở Pato Megru TPHCM caong khin dom công đoàn sang bac sangka, hu rilo jalan ngak pachreih ba njauk tukvak, njauk menuac urang ngan saong taong abih dom urang jakar, gru pato saong menuac ngak di sang bac.

Dalam dua thun 2021 saong 2022, tỉnh Sóc Trăng  kham merat ja ba saong taduan hu bruk sangka, daong brei di kapol, tổng công ty, dom kapol nyaom, urang ngak pahala, kapol urang palei di Sóc Trăng daok di Ban raya HCM, meng nan jak ba hu labaih 174 tỉ đồng. Jien nan daong Sóc Trăng padang ngak 3.496 baoh sang , yaok baoh sang 50 triệu đong brei ka sang kathaot daok kan kandah ka sang daok. Bruk padang sang daok  ka urang kathaot hu tỉnh brei ngak cambaic laic, hu ginum biai haong bhap bini  saong tui iek bruk padang ngak.

Piah pacang caga jit COVID-19 mbuan tamuh veik, dom gah, dom pakat saong bhap bini tỉnh Tiền Giang daok kham merat klauk vaccine ginup mbang klauk. Tal urak ini, dalam tỉnh klauk vắc xin COVID-19 hu labaih 5 triệu mbang ka urang umo meng 5 thun tagok. Jaik di ini, dom urang njauk ruak daok tagok veik hasit, hu harei, tapa test samar di dom labik y tế, mboh hu labaih 30 urang njom bahrau. Kayua yau nan ye, gah y tế Tiền Giang hu panuac kakei bhap bini jhui iek lap… Abih di nyu lac khik ramik bruk ngak tui "V2K" (vak katut veik panuac Việt lac: vắc xin + khẩu trang + khử khuẩn) pacang caga jit.

Mentri Công Thương birau iew Công ty cổ phần Pandap mbang Á Châu samar pathau khan ka jalan ngak mì Gấu bhong ngak di Viet Nam saong pablei tabiak darak pasar Đài Loan  (Trung Quốc) thun 2022. Dahlau di nan, Jabat khik iek Pandap mbang saong jru cavao Đài Loan - Trung Quốc brei thau lo pandap mì tôm mesam Gấu Đỏ kayua sa công ty di Đài Loan blei tame, tapa pasang iek di pabah mbang negar mboh hu hàm lượng Etylen oxit oh lagaih saong tanut chuan.

 Kapul dom urang dang akaok dom gah bol lin Hàn Quốc bahrau brei thau, Triều Tiên daok cuh takik di abih sa baoh tên lửa đạn đạo di tuk sabuh page ini (18/11). Min jabat ini oh khan brei thau cambaih ka janih cuh jeng yau jalan nao yau habar di tên lửa nan. Ini lac bruk cuh ka 2 dalam 2 harei gam gam meng gah Triều Tiên, hadei di dom panuac lac meda hu "dom phản ứng quân sự biak khang jang" anak dom bruk pasram mesruh di Mỹ haong đồng minh.  Kuhria meng akaok thun tal ini, Triều Tiên hu rilo mbang cuh biak rilo janih tên lửa. 

Bala apui khuah praong mbang abih sang glong rilo tal di gah Barak Dải Gaza, labik hu khik piah pandap mbuan khuah, ba tal takik abih 21 urang metai, dalam nan hu 7 uranaih. Yaok rituh cảnh sát  saong urang caga samar chip hu mbaok piah padam apui khuah. Tổng thống Palestine iew bruk apui khuah  lac “ sa bala khang di taneh ia”. Gam haong nan, brei thau sa harei negar kamram di harei 18/11, tuan cờ rủ saong hu panuac ieu payua daong tal baoh sang dom urang gaok laba piah “ klak rabha dom pandik harao haong urang”. 

Dom urang gah kinh tế di Gilang pariak Morgan Chase hu ba tabiak panuac kuhria mboh dahlau lac: Kinh tế Mỹ meda dang anak bruk "trun hasit" di 6 bilan akaok thun hadei. Kuhria tal quý 4 thun hadei, patagok kinh tế Mỹ meda trun 0,5% ngak ka abih tih kaya pandap dalam taneh ia (GDP) thun anak tal di taneh ia ini trun 1%. Cai pandar di menuac urang tui kuhria trun daok 3,4% dalam thun tal. Dalam tuk nan, kinh tế Mỹ meda lahik 1 triệu bruk ngak di kreh thun 2024./.