Labik nan biak mbuan lagaih ka bruk nao mai pajeng ba pandap pandar di dua negar

Phó Thủ tướng Phạm Bình Minh birau mbaoh tangin tame Sarak 107 di Rajaei brei adat ka labik taneh Pabah mbang negar Phước Tân, tỉnh Tây Ninh. Pabah mbang negar Phước Tân di palei Thành Tây, xã Thành Long, huyện Châu Thành, tỉnh Tây Ninh di jalan tỉnh lộ 781 meng pasak huyện Châu Thành pambuak saong jalan CMT8, ban Tây Ninh, tỉnh Tây Ninh. Anak  Pabah mbang negar Phước Tân lac pabah mbang negar Bố Môn di palei Via, xã Bố Môn, huyện Rùm Đua, tỉnh Svay Rieng, Negar Campuchia. Labik nan biak mbuan lagaih ka bruk nao mai pajeng ba pandap pandar di dua negar.

Ndom ka tukvak peih ngak jalan cao tốc Cần Thơ - Cà Mau, sa dalam dom jalan nao mai praong di bhum taneran kraong CL, dalam harak javap jalei panuac caong di cử tri ban Cần Thơ bahrau ini, Mintri Jalan mbak Pajeng ba brei thau, daok tacei pato mBan khik ramik danak dak Mỹ Thuận samar ngak ka nyu salah dom harak adat piah meda peih bruk padang ngak dahlau di harei 31/3/2023 tui njauk tacei pato di Rajaei. Jalan nan hu maong lac daong pabak prein khang jhul patagok KTXH bhum taneran kraong CL.

Mbiah tal tukvak ini, tỉnh Đồng Nai hu peih labaih 266 tỷ đồng jien daong pah sang ka urang ngak tui Sarak 08 di Thủ tướng Rajaei, samu 95% bruk ba tabiak. Tui kuhria, Đồng Nai hu 260.000 urang ngak hu mbang tui sarak daong jien pah sang. Đồng Nai jeng lac sa dalam dom tỉnh dang akaok dalam taneh ia ka bruk brei jien daong pah sang ka urang ngak.

Di mbang nyaom ka 9 HĐ bhap bini tỉnh Bình Thuận mbang XI peih tabiak tuk mesup ini hu brei tapa sarak ka angan danak dak salih bruk pandar taneh pala padai saong angan  danak dak dalam bruk Karja mek veik taneh hu peih ngak pabak ka danak dak hạ tầng kỹ thuật labik sang daok xã hội di xã Tiến Lợi, ban Phan Thiết. HĐ bhap bini tỉnh jeng pasang iek, brei tapa rilo sarak praong piah khik kajap bruk parabha phun jien di kadung jien karja pakat negar tui tacei pato di Thủ tướng Rajaei piah peih ngak 3 danak dak bruk ngak negar ka padang ngak palei pala bahrau, patrun kathaot khang kajap saong patagok bhum bhap bini bangsa takik haong bhum ceik.

Kapol Kinh tế-Quốc Phòng 778 (Quân Khu 7) pambuak saong karja huyen Bù Gia Mập, tỉnh Bình Phước, Ban Trị sự Giáo hội Phật giáo Việt Nam huyện Bù Gia Mập saong Sang iek ruak Nhân Ái peih bruk Iek ruak, brei jru ka yaok rituh baoh sang kathaot, jaik kathaot, baoh sang dalam sarak, urang bangsa takik di xã Phú Văn, huyện Bù Gia Mập. Langiu di nan, dom đơn vị daok alin brei dom boag sang mikva 300 paok pandap nan lac dom kaya pandap mbang saong ahar trung thu ka dom uranaih uan raok Tet Trung thu. Ini lac bruk ndung bak makna daong ka bhap bini dalam tỉnh  hu iek glang prein yawa, paglong raidiuk. 6   # Rajaei Japon meda samar klaak dom dut iek ka dom tuai du lịch hu klauk bloh vắc xin pacang Covid-19. Dom jalan ngak yau ieu tuai du lịch brei hu harak dut iek âm tính dalam 72 mon dahlau di tuk tagok jalan meda hu taneh ia ini brei klaak. Gam haong bruk peih ngak yaok jalan piah pacang cakak bruk njaom mbak, Japon meda jhul patagok bruk kinh tế. Bruk pacadu dom jalan pasang iek bhum taphia negar hu iek tui bruk jit ruak Covid-19 di Japon saong taneh ia langiu.

Đậu mùa khỉ hu mboh di taong abih 50 bang di Mỹ. Gah y tế  yaok bang daok duah dom urang hu taom gaok jaik urang ruak gam brei ka bhap bini thau lac ruak đậu mùa khỉ oh njom mbak samar yau ruak cúm atau Cobid-19. Mỹ urak ini daok lac taneh ia  hu urang ruak đậu mùa khỉ  glaong abih di dunya ngan haong 15.433 mbang. Taneh ini daok ba tabiak jalan ngak brei jhul pasamar bruk ngak tabiak vaccine đậu mùa khỉ ngan haong labaih 1,8 triệu meng akok adit ini.

Trung Quốc rah tapa 11 harei gam tabiak cảnh báo pandiak bhang sambo màu bhong meriah, lac tanut trak damak di abih. Jaik 1/3 dom tỉnh ban hu langik pandiak mangaok 40 độ C daok ngak brei pandiak bhang trak damak jang, kan kandah tal bilan pala rik tame tal 3/4 padai brah di Trung Quốc. Urak ini pandiak bhang ngak kan kandah tal labaih 2,2 triệu ha taneh ngak nong di 9 tỉnh, ban, khat lahik ka padai saong tangei. Rilo ban takik brei peih gom, dui katut panak tukvak peih pabah mbang pasak pablei salih. Dom sang mac ngak kong di Trùng Khánh, Tứ Xuyên, Chiết Giang... hu panuac ieu brei padeih ngak dalam sa tukvak halei nan atau padeih ngak di mon tabung glaong./.

Urang lang: Bhumi & M. Phuong – 23/08