Dalam adit ngak bruk ka dua di Mbang nyaom ka 5 (meng harei 29/5-2/6), Quốc hội hu ginum biai rilo bruk hu makna praong dalam danak dak mbang nyaom. Quốc hội hu caik tabiak abih harei camreip di adit ngak bruk piah ginum biai di hội trường ka bruk ieu pataom, khik ramik saong pandar dom prein khang piah pabak ka bruk pacang caga jit ruak COVID-19; bruk peih ngak sarak, hukum ka y tế puk palei,, y tế kuhria caga dahlau. Bruk njauk caik hatai lac, harei 31/5, Quốc hội ginum biai luac harei di hội trường ka bruk taong yaom pabak ka bruk peih ngak jalan ba tabiak cak rok patagok kinh tế-xã hội saong kadung jien kanja thun 2022; bruk peih ngak jalan ba tabiak cak rok patagok kinh tế-xã hội saong kadung jien kanja di dom bilan akaok thun 2023

Di tuk uan harei Dunya uranaih 1/6 saong Bilan ngak ka uraniah, Phó Thủ tướng rajaei Trần Lưu Quang hu mai ravang saong alin hadiah pandap brei ka dom uraniah daok di Pasak raong pato uranaih Tam Bình (TP.Thủ Đức) – labik iek glang raong pato 186 uranaih meng anek kamar tal umo labaih 16 thun. Phaok Thủ tướng Trần Lưu Quang caong dom pakat, dom gah di TP.HCM sangka tal dom adei rilo jang, oh lac dalam dom tuk rija, roya. Pasak njauk patagok jang bruk ieu menuac sia daong piah pasaim labik laboa, dom gru, dom urang ngak di labik ini njauk patagok jang bruk ngak di drei, oh lac gru bo daok lac ame, amaik di dom adei.

Dalam 2 harei 27 - 28/5, di Sang iek ruak đa khoa tỉnh Bình Thuận, danak dak “baoh hatai ka adei” hu peih mbang iek ruak hatai baoh bẩm sinh ka labaih 650 uranaih saong brei blac raih ka 31 uranaih. Ngan haong dom uranaih ruak dị tật tim bẩm sinh, dom bác sỹ hu ba tabiak dom jalan taong samar drah. Daok dom uranaih hu tacei brei blac raih min gaok kan kandah meda hu taong ruak oh mek jien. Tui Mban peih bruk, bruk pasang iek ruak piah ka yaok uranaih mboh yau ruak baoh hatai hu iek ruak, taong ruak saong blac raih samar drah piah ka dom adei thit ruak, hu raidiuk siam makre saong praong tagok yau dom uranaih karei.

Mintri jalan mbak pajeng ba bahrau tabiak jalan ngak patagok bruk pajeng ba tui jalan bahrau, samu gauk, patrun sahui saong khik kajap quốc phòng, an ninh bhum Đông Nam bộ, hu 6 tỉnh, ban lac: TPHCM, Đồng Nai, Bà Rịa - Vũng Tàu, Bình Dương, Bình Phước, Tây Ninh, tal thun 2030, pamaong tal thun 2045. Tui nan, dom logistics pakat negar, pakat dunya hu cakrok pambuak pagam haong pabah lamnge, mblang kapal haoh, pabah mbang negar pakat dunya, dom jalan kinh tế praong saong jalan pablei salih pambuak dom bhum. Mintri jalan mbak pajeng ba meda daong dom tinh ban pambuak tal buh jien padang ngak pasak logistics hàng không pambuak pagam haong mblang kapal haoh pakat dunya Long Thành, caokrok patagok logistics pabah lamnge di Bà Rịa - Vũng Tàu saong TPHCM.

Thun ini, chôm chôm hu baoh biak rilo, min yaom chôm chôm tok samu 1/3 dut saong tukvak ini thun dahlau. Tui mikva pala chôm chôm di Vĩnh Long, jaik tal harei paik baoh min urang blei mai tal biak takik. Urak ini, chôm chôm daok tame bilan paik baoh, tui janih, yaom pablei meng 8.000 - 20.000 đồng/kg, samu 1/3 dut saong tukvak ini thun dahlau. Meng yaom yau ini, urang nong bahrau mek hu phun jien. Oh lac chôm chôm, rilo janih baoh kayau karei yau ye pa-aok, makhut, kruac aik jeng trun yaom. Mikva urang nong brei thau lac, thun ini phun pala mek hu năng suất glaong, min yaom pablei biak bier.

Tui panuac khan di rajaei Japon, dalam sa harak khan brei thau, gah Triều Tiên khan lac meda cuh tên lửa dalam tukvak meng harei 31/5 tal harei 11/6 tal. Hadei di panuac khan di Triều Tiên, Japon hu ieu Triều Tiên padeih cuh saong pambuak bruk haong gah Mỹ saong Hàn Quốc. Rajaei Japon jeng brei thau, meda ngak taong abih dom hagait meda ngak hu piah duah thau cambaih ka bruk cuh saong pambuak bruk haong dom taneh ia sahabat dalam bruk ini. Bruk nan rah tabiak dalam tuk hu panuac lac Triều Tiên daok caga ba vệ tinh do thám quân sự camereip abih tagok langik.

Yaok thun Lào hu jaik 7.000 urang metai kayua dom janih ruak meng  pakao hala, kuhria rah tapa, yaok harei hu labaih 19 urang metai. Dom urang njuk pakao di negar ini dak harei dak rilo, abih di nyu nan lac ranaih takre njuk pakao điện tử. Thun 2015, dom urang njuk pakao di Lào lac 27,9%, tagok 2,4% dut saong thun 2012 (25,5%).  Piah pachreih tui Harei dunya oh hu pakao thun 2023, Lào hu ba tabiak asal kadha lac “pala phun mbang baoh salih ka njuk pakao” piah pachreih rahra oh njuk pakao.

Sa tòa án di Hàn Quốc tabiak harak cap khik sa urang peih pabah mbang thoát hiểm kapal haoh di hãng Asiana Airlines tuk kapal haoh caga par trun mblang kapal haoh di ban Daegu harei 26/5 meng bloh. Dahlau di nan, ong Lee, umo 33 thun, peih pabah mbang thoát hiểm tuk sruh kapal haoh pajeng ong haong 193 urang daok par di mangaok glaong 213 m saong caga par trun mblang kapal haoh pakat dunya Daegu. Bruk nan ngak brei 12 urang kan suak yava saong dom urang njauk ba tame sang iek ruak hadei di nan. Biak patuah lac, sruh kapal haoh par trun hu siam mekre, salamat./.