Rilo kapul nao pasang iek di rilo labik 

Phó Thủ tướng Thường trực Phạm Bình Minh, Akaok mban tacei jalan pakat negar pacang pablei salih lậu, bliek saliek dalam pablei salih saong pandap ja (mBan tacei jalan 389 pakat negar) bahrau ieu kakei Mintri Y tế pataom tame pato tacei  dom kapul chức năng, oh caik rah tabiak bruk pambak tame jit ruak bo tagok yaom oh njauk ngan haong jru tavao, pandap panda y tế, bộ sinh phẩm dut iek COVID-19. Gam haong nan, brei tui iek, pasang iek bruk trun tagok yaom  dom pandap panda y tế pabak ka bruk pacang caga jit COVID-19 piah hu jalan khik ramik, tani tanat yaom kaom tui njauk adat.

Anak bruk rilo rahra padang ngak, peih praong labik padang, pala phun suan hukum, pandar taneh oh njauk bruk dalam danak dak padang ngak  jalan radaih nduac samar Bắc - Nam gah timun  tuk vak  2021 - 2025 piah duah laba, Mintri jalan mbak pajeng ba bahrau hu panuac pandar  UBND 12 tỉnh, ban  yau : Hà Tĩnh, Quảng Bình, Quảng Trị, Quảng Ngãi, Bình Định, Phú Yên, Khánh Hòa, Cần Thơ, Hậu Giang, Bạc Liêu, Kiên Giang song  Cà Mau khik iek catang mbaok taneh taneh padang ngak jalan cao tốc Bắc – Nam. Gam song nan hu panuac kakei dom tỉnh samar padang mBan tacei jalan  bayar jien, dong bruk tái định cư song Hội đồng peih mblang taneh  atau jabat  prong peih ngak dom harak gar pagam tal bruk peih mbalng taneh.

Tui So ngak nong saong patagok palei pala tỉnh Bình Dương, lô kruac bhung 50 tấn meda hu pablei tapa darak pasa châu Âu(EU) di akok bilan 4 tal. ini lac dom baoh kruac bhung hu pala di 2 baoh sang daok di puk Bàu Khai, xã An Lập, huyện Dầu Tiếng, pabak tui adat biak catang di darak pasa EU, ngak njauk tui bruk pala saong pandar khak drak, pruh jru khik caga phun pala. Pasang iek catang dom halah halieng palai kaik, abih di nyu nan lac anek roi kaik baoh saong pasang iek bruk labaih jru khik caga phun pala. Bruk peih viek darak pasa pablei tabiak negar langiu piah patrun bruk pambak tame sa darak pasa, nan lac sa bruk daong ka urang nong langyah jalan pablei tabiak.

Di tỉnh Tiền Giang urak ni ia angaok krong  Tiền di ban Mỹ Tho  mbak   01 phần nghìn. Piah pacang mbak, rilo cống tapen krong  dalam  tỉnh hu krek sre . Daok dom cống labik gah pai jeng dok peih yaok harei, nan ye ia taba dalam krong ribong dalam mblang hamu biak rilo, ginup pabak ia pruh ka labaih 80 hecta phun mbang boh di pak ni. Nan ye, jiak abih dom bein phun jeng hu năng suất glaong, rilo janih boh kayau yaom tagok jang 2 mbang dut song tuk vak ni thun bloh, dong ka urang nong hu laba.

Yaom pandap mbang dalam raong glang daok tagok yaom dalam tukvak tapa, dalam tuk yaom pabui diuk daok trun khang ngak ka rilo urang raong sit sot di Đồng Nai daok dang anak bruk mbuan khat lahik. Tui rilo sang raong glang, dut saong atah di ini labaih 1 thun, yaok kadung pandap mbang raong glang tagok labaih 100 ribau đồng. Yaom raong yaok drei pabui tagok jang labaih 1 triệu 500 ribau đồng. Ngan haong yaom pabui yau urak ini, urang raong khat meng 300 ribau -500 ribau dong sa drei. Tui ong Nguyễn Kim  Đoán, Phó akaok kapul raong glang Đồng Nai,  urak ini, piah khik  hu tapon pabui, manuk ada tok hu sa jalan njauk lac urang raong ngak siam, salamat sinh học, pacang caga jit ruak piah trun meneing jien buh tame.

Đại hội đồng Liên minh Nghị viện dunya (IPU) mbang ka 144 song dom bruk ginum biai pambuak tal  hu peih ngak tabiak di palao Bali di Indonesia melam kabroi tui tuk vak Việt Nam. Rah tabiak meng harei  20-24/3, IPU-144 hu pasang iek  dom bruk njauk  ngak  di Nghị viện piah patrun patakik kan kandah di bruk samar drah meng langik tasik  song  ngak tui Thỏa thuận Paris, pambak tame tuk vak siam veik hadei COVID-19 piah jhul samar tuk vak pasalih hajao , saong langyah dom caong khin di dom nyaom menuac urang mbuan gaok kan kandah glong yau urang kamei song dam dara. Dom urang hu pataom tame ginum biai dom bruk sron mbon  song  an ninh dunya, song tui kuhria brei tapa sa sarak hu makna praong, dalam nan brei thau veik jalan ndom biai nao mai di IPU piah langyah dom bruk meriak gauk di dunya.

Đặc phái viên di Liên hợp quốc ka Syri Ghe Pi-đơ-xơn (Geir Pedersen) hu ieu pachreih dom gah di Syri nghiêm túc dalam dom bruk ginum biai ka danak dak salih bahrau hukum negar.  Panuac ieu nan hu ba tabiak dalam tuk adit ini Rajaei saong gah đối lập Syri meda yam tame mbang ginum biai ka 7 di Thụy Sĩ. Mbang ginum biai jaik di abih hu peih tabiak di bilan 10 thun blaoh. Bruk mesuh gauk di Syri tamuh tabiak di thun 2011 ngak ka laaih 500 ribau urang metai saong sa mateh dalam abih tih 23 triệu bhap bini di taneh ia ini njauk klaak sang danaok nao tal labik karei, dalam nan hu labaih 5 triệu urang tị nạn.

Dom urang umo labaih 70 thun,  hu pachreih tame pasram rup pabhap takik di abih  20 minite yaok harei, piah khik pren yava, pacang veik dom ruak boh hatai, rak darah  trak. Bruk roh duah ni, hu pathau khan angaok tạp chí Heart, hu tui iek labaih  3.000 urang prong hu umo labaih  65 thun di  Italy dalam labaih  20 thun. Nyaom roh duah khan lac, roh duah hu tacei lac "pahat rup lac paok jru " dalam rai duik tuk puac rai.. Yaom lac sa bruk pasram, pahat njuan njac jeng meda ba mai siam mekre ka urang prong thun, min brei ngak avar, oh te, suai./.

Urang lang: Thu Thảo -Hanipha- 21/3