Rilo menuac urang hu mbaok di avar piah am cuh gilau

Pan akaok nyaom biai taong yaom quy hoạch abih gah dalam taneh ia tukvak 2021-2030, pamaong tal thun 2050, Thủ tướng Phạm Minh Chính ndom lac, quy hoạch brei ngak njauk dom adat hukum, nao gam haong sarak, jalan ngak di Đảng; praong jang lac bruk pasang iek, taong yaom chất lượng quy hoạch yau habar, hu tani tanat halei oh, hu lagaih haong taneh ia halei oh? Gam haong nan Thủ tướng tacei lac, njauk iek praong bruk meda ngak hu di quy hoạch; njauk pasang iek dom gah cak rok patagok, bhum prein khang, labik patagok nan cambaih laih halei oh? Khol drei njauk ieu pataom prein khang di kapul nyaom kayua ini lac bruk kan, peih praong ye njauk patagok dân chủ, ilamo di kapul nyaom.

Tui bruk rivang Viet Nam, ong Heng Swee Keat, Phaok Thủ tướng, Akok mentri tacei ba sarak kinh tế taneh ia Cộng hòa Singapore hu mai rivang labik ngak kong VSIP I - Bình Dương. Hu padang ngak meng thun 1996, VSIP I nan lac danak dak akaok meti hu padang tui jalan pambuka talei rohim saong pambuak bruk ngak mbang kinh tế di Viet Nam saong Singapore. Mbiah tal ini, 3 danak dak nan lac: VSIP I, II, III pachreih hu jaik 600 po đầu tư mai meng labaih 22 taneh ia saong bhum taneh ngan haong phun jien abih tih labaih 8,6 tỷ đô la Mỹ, ba bruk ngak ka 150.000 urang.

Piah brei mboh hatai thau dhar phol Đức Thánh Trần Hưng Đạo, dah page ini, urang par akaok TP.HCM hu nao cuh gilau pahadra di harei pathi mbang ka 722. Harei pathi di Đức Thánh Trần Hưng Đạo hu peih ngak yaok thun lac tuk piah pahadar dom bruk ngak di urang anh hùng bangsa saong pahadar 734 thun jayah Bạch Đằng Giang. Jeng dalam harei nan, mban khik ramik Đền thờ Đức Thánh Trần Hưng Đạo jeng hu alin 100 triệu đồng tame daong kadung jien kayua tasik pulao palei negar – kayua labik dang akaok khik caga taneh ia, alin 200 triệu đồng brei kadung jien ka urang kan kathaot saong 50 triệu đồng jien bac ka dom anek saih kan kathaot gaok kan kandah.

Di rilo palei dalam tỉnh Hậu Giang dom harei ini ia ndik tuh mai urang nong oh ngak padai vụ 3, bo brei pacang halam njol piah raong ikan dalam hamu. Raong ikan dalam hamu jien buh tame takik min duah hu laba glong rilo mbang dut haong ngak padai. Langiu di nan, raong ikan di hamu daok rik tame ngak pachroh taneh siam; dom janih hareik takik tamuh dalam bilan ia ndik yau nan ye jien buh tame ngak padai bilan Đông xuân anak tal trun takik. Raong ikan di hamu patak pataom hu labaih 1 trieu dong sa hecta.

Urang ngak sara di tỉnh Bến Tre daok biak chreih chrai kayua yaom sara tagok di tanut glaong di abih. Di tukvak ini, sara asal mbong yaom 140 ribau đông sa li-i (lac labaih 40-45 đồng/kg), sara asal jhuk yaom 120-130 ribau đồng sa li-I, tagok tal 3 mbang dut saong akaok thun. Tui yaom ini urang ngak sara hu laba labaih 100 ribau đồng sa li-i. Yaom sara tagok glaong kayua sara daok khik piah di bhap bini trun daok takik, jit ruak Covid-19 pasang iek hu, bruk ngak mbang pablei salih hu siam veik, bruk pandar sara asar tagok glaong.

Harei ini ( 14/9), di labik ngak bruk di LHQ pak di New York (Mỹ), Đại hội đồng LHQ peih nyaom biai mbang ka 77 ala tacei ba di Chủ tịch birau Csaba Korosi. Brei panuac  di var peih pakak, Urang dang akaok bahrau di Đại hội đồng Korosi mboh lac tok sa jalan ngak piah hu rilo jak jeng abih  nan njauk brei salih tapa dom jalan jum pataom, khang kajap saong ilamu. Ong Csaba Korosi hu ndom tal dom bruk hu bloh, nan lac Danak ginum biai 2030 ka bruk Cak rok patagok Khang kajap, Khuôn khổ Sendai ka bruk trun takik kahta lahik kayua bala meng langik tasik, Hiệp định Paris ka BĐKH. Ini lac jaln tacei ba saong bruk daok veik lac dunya peih ngak dom bruk nan hu atau oh.

Tui sa pathau khan di Gah Lao động dunya bahrau hu ba tabiak, labaih 50 triệu urang di dunya daok lac menuac njauk bala di bruk ngak halin saman bahrau. Hu thau, dalam 5 thun, dom urang njauk kateik greik tok diuk tok pasang atau mek nao ngak bruk hu tagok jang jaik 10 triệu urang, tagok labaih 50 triệu urang. Bruk ini hu makna lac dalam yaok 150 urang ye hu jaik 1 urang njauk bla di bruk ngak halin samar bahrau. Urang kumei saong uranaih jeng lac dom urang mbuan njauk trak damak di abih.

Cảnh sát Boston, Mỹ brei thau, sa paok pandap nyu patuh di sang bac Đại học Đông Bắc Boston, ba tal sa urang njauk rambuac, min oh kan kandah hagait tal prein yava. Hadei di nan, gah cảnh sát Boston hu mbaok chip di labik patuh, brei pacang meneing labik Đại học Đông Bắc piah pasang iek 2 paok pandap karei mboh medil. Cục Pasang iek Liên bang Mỹ (FBI) brei daong Boston duah thau taong abih bruk nan../. 

Urang lang: Thu Thảo -Ái Nghiêm -14/9