Thủ tướng rajaei brei adat blei vắc xin pacang COVID-19 di Pfizer ka uranaih meng 5 tal ala 12 thun

Anak bruk đại lý xăng menyek di rilo tỉnh, abih di nyu lac di dom tỉnh gah Meraong negar kareih pabah mbang kayua abih xang menyek, Phó Thủ tướng Lê Văn Thành iew Mentri Công thương oh caik kurang xăng menyek duh ka bruk ngak mbang, pala drak saong raidiuk bhap bini, tui nan thanh tra, pasang iek, langyah catang dom bruk padauk xăng menyek piah tagok yaom. Tui Mentri Công thương, tukvak tapa, dom labik pablei xăng menyek padeih pablei lac kayua kurang xang menyek. Nan ye, Mentri brei pasang iek, bruk padeih pablei lac kayua mek xăng menyek meng dom D.N pablei salih xăng menyek sit, dalam nan hu bruk takik pablei tabiak piah cang tagok yaom. Dom mentri, dom gah, D.N jeng mboh lac, bruk kurang xăng menyek rah tabiak di dom cửa hàng đại lý di dom D.N sit, kayua sahaneng piah pablei tagok yaom.

Piah caga klauk vắc xin ka uranaih umo meng 5-11 thun, Mintri Y tế hu peih bruk duah thau tapak ngan song dom amaik ame hu anek ala 12 thun di 63 tỉnh, ban. Tui nan, hu labaih 60% amaik ame hu mbaok tame duah thau njauk hatai klauk vắc xin pacang COVID-19 ka uranaih, hu jiak 2% amaik ame oh njauk hatai. Dahlau di nan, harei 5/2 rajaei njauk hatai haong bruk Thủ tướng rajaei brei adat blei 21,9 triệu mbang vắc xin pacang COVID-19 di Pfizer ka uranaih meng 5 tal ala 12 thun.

Cục Thuế Ban raya Hồ Chí Minh taduan hu harak văn bản di C.ty TNHH Đầu tư saong Kinh doanh thương mại Bình Minh likau klak harak pambuak bruk blei to yaom hu labik mblang taneh 3-9 di Khu đô thị birau Thủ Thiêm (ban Thủ Đức). Makna hu C,ty ini ba tabiak lac kayua jit ruak COVID-19 ngak kan kandah tal bruk ngak mbang pablei salih nan ye oh ginup phun jien piah buh tame taneh blei hu tapa to yaom. C.ty Bình Minh lac sa dalam 4 D.N njauk thầu dom taneh di Khu đô thị birau Thủ Thiêm dalam mbang pablei to yaom harei 10/12/2021. Yau nan, Bình Minh klak jien caik takai 140 tỷ đồng saong nan lac c.ty ka 2 klak jien caik takai hadei Tập đoàn Tân Hoàng Minh.

Mon 1 kreh melam 9/2, di xã Đak Sơ Mei (huyện Đak Đoa, Đắc Lắc) rah tabiak bala radaih peih angaok jalan biak trak, lac bruk radaih pajeng bei plom peih tui jalan meng xã Hà Đông tabiak jalan roya 19D laik trun ceik ngak brei 6 urang metai song 3 urang njauk rambuac. Urak ni, 2 urang njauk rambuac trak hu cấp cứu di sang iek ruak Đa khoa tỉnh, 1 urang hu tabiak sang iek ruak. Dom gah chức năng mai tal labik bala piah dong urang gaok bala, saong dong ka dom sang hu urang gaok bala. Makna di bruk dok hu pasang iek duah thau, ngak brei cambaih laih.

Tuk Tet thun sak Rimong 2022, Công an dom tỉnh Tiền Giang, Vĩnh Long, Trà Vinh saong Đồng Tháp cap hu rilo labik taong mbai ma-in mbia. Dalam nan, harei 3/2, gah Cảnh sát hình sự Công an huyện Long Hồ (tỉnh Vĩnh Long) cap hu labik caoh manuk mbang jien di palei Phước Hanh B. Cong an cap hu 15 urang pambak tame bruk nan, khik labaih 73 trieu dong. Gah cong an tỉnh Trà Vinh birau pabak ginup harak gal piah langyah 45 urang daok di palei Kỳ La (xã Hòa Thuận, huyện Châu Thành), gam mek hu labaih 300 trieu dong.

Hạ viện Mỹ brei tapa hukum pandar cai di anak meta piah plaih bruk rajaei padeih ngak bruk kayua kurang kadung jien. Thỏa thuận ka bruk pandar cai urak ini hu tamat di harei 18/2 anak tal, meyah oh hu bruk ngak halei hu batabiak, yaok rituh ribau urang ngak dalam rajaei mbuan si oh hu bayar jien bilan tuk dom jabat liên bang kreih pabah mbang. Thỏa thuận bahrau ni, hu batabiak pandar tal harei 11/3 tal. Dalam jiak 10 thun tapa, Mỹ hu 3 mbang rajaei kreih pabah mbang dalam thun 2013, bilan sa thun 2018 song bilan 12 thun 2018.

Gah khik iek takai tasik di Hải quân Hoàng gia Maroc birau srong daong hu 256 urang di cư suan hukum. Dom urang nan mai meng bhum jaik taphia Sahara saong hu daong ba tagok truh sruh gilai sit theik angaok tasik. Urak ini, taong abih dom urang nan hu ba tagok dom gilai hải quân piah ba tame dom labik pabah lamnge jaik abih dahlau di tuk jao ka Gah Hiến binh Hoàng gia piah ngak dom harak gal tui adat hukum. Maroc atah di Tây Ban Nha 14km nan ye bhian hu rilo urang di cư suan hukum palih ruah nao tapa tasik suan hukum piah tame châu Âu.

Labaih 100 cảnh sát di Bỉ hu ieu pataom piah pagui mek kol khủng bố di rilo labik dalam ban An-ớp; 13 urang pagam tal sa nyaom thánh chiến cực đoan njauk chap mek. Ban An-ớp song Brúc-xen dahlau deih lac labik dauk di kol khủng bố di sa nyaom thánh chiến cực đoan, ngan song rilo urang dahlau deih hu mbaok mesruh di Xy-ri, Irắc. Yaom lac, nyaom ni oh dok, min, gah an ninh Bỉ huac lac rilo urang meda gaok kan kandah kayua hatai sahneng cực đoan di nyaom./.

Urang lang: Hani Pha – Bhumi – 09/02

UrĐÀI TIẾNG NÓI VIỆT NAM

https://tintucvov.vn