Dalam harei pataom “ Ilamo thun bahrau di grauk Negar” birau peih ngak di Palei Ilamo - Yulit dom bangsa Viet Nam (Đồng Mô, Sơn Tây, Ha Noi), Po Ine Negar Lương Cường hu mbaok di var Peih pabah mbang yang saong cuh gilau di bimong urang bangsa Cam tinh Ninh Thuan. Peih pabah mbang bimong, atau daok lac Peih pabah mbang yang lac sa adat ngak yang meng kan di urang Cam hu peih ngak yaok thun di bimong Cam piah paling yang likau dom po yang chrong daong brei ka langik siam hajan lagaih, bhap bini rahra kajap karo…Hadei peih pabah mbang bimong, langiu mblang hu kapol urang kamulan tamia tui ragam meng kan angaok bimong kalan di urang Cam gam haong sap Ginang, Baraneng, saong Saranai…

Thun ini, tinh Lam Dong parabha buh tabiak 155 ti dong meng kadung karja apiah ngak danak dak pakat negar patagok kinh te - xa hoi bhum urang bangsa takik saong bhum ceik, dalam nan kadung jien pakat negar lac 135 ti dong. Meng phun jien nan, karja palei brei buh jien tame padang ngak dom jalan mbak, ribaong kraong, gam salih janih phun pala, athur raong, dom danak dak patrun kathaot, brei daong ngak dahlau di bhum atah bayah, labik daok rilo kan kandah. Tinh pataom tame peih ngak dom darak patrun kathaot, tani tanat raidiuk urang bangsa ka dom baoh sang kathaot, jaik kathaot.

Tui bruk yaok kuhria baoh sang kathaot, jaik kathaot di tinh Hau Giang urak ini tok daok oh ka tal 1,5%. Piah ngak hu siam yau nan, dalam tukvak tapa dalam tinh hu padang ngak labaih 60 danak dak ba mai parilo jalan ngak mbang, patagok bruk patruh eik patrun kathaot, hu jaik 800 baoh sang kathaot, jaik kathaot, baoh sang bahrau tabiak truh kathaot hu mbaok tame. Thun  ini, tinh Hau Giang patui bruk jhul pakhang bruk pato bruk ngak gam duah bruk ngak; Jao brei ilamo ky thuat, daong bhap bini patagok bruk ngak mbang pala drak di sa mbang taneh, yam tabiak truh kathaot, padang mbang ngui raidiuk bahrau siam mekre.

Dom harei akaok thun, bruk ngak mbang pablei tabiak negar langiu di dom doanh nghiep kaya nong di Dak Lak mboh chreih chrai, pagol sanya mek hu kein laba glaong. Yau ye, Kongti Co phan Banana Brothers Farm, huyện M’Đrắc, tinh Dak Lak birau pablei 100 tan patei tabiak darak pasar Trung Quoc saong Han Quoc; Kongti TNHH Ban Mê Green Farm mbaoh harak padar gauk saong sarak pablei tabiak negar langiu labaih 100 container baoh durien. Ralo doanh nghiep di Dak Lak brei salih bahrau, ba jalan siam abih ka bruk brei rilo baoh, praong siam, bingi, pabak  tui hatai urang blei di darak pasar dunya.

Tui Kuc Khik iek Ribaong kraong, Mentri Ngak nong saong Patagok palei pala, di bhum taneran kraong Cuu Long daok dang anak 3 mbang njom ia mbak meng ini tal puac bilan pandiak; dalam nan ia mbak njom tame di bilan Tha ia bulan Pomi mboh daok trun. Tui nan, meng ini tal harei 23/2, dom labik atah di tasik di Bhum taneran kraong Cuu Long meng 40 km tal 45 km hu ia taba tame tuk ia tasik trun, dom pabah kraong ribong saong bhap bini brei caga ia piah pacang ia mbak.

Rajaei Australia harei ini khan ka bruk ba tabiak sarak pakauk urang negar langiu blei sang di taneh ia ini dalam 2 thun anak tal. Sarak pakauk urang negar langiu  blei sang di taneh ia ini dalam tukvak bruk kurang sang daok dak harei dak trak kayua takik hu sang pablei ba tal yaom sang tagok glaong saong bhap bini gaok rilo kan kandah tuk pah sang, blei sang daok. Piah langyah bruk nan, Australia ba tabiak jalan papah sang yaom 32 ti AUD dalam nan hu 5 ti 500 trieu AUD piah daong bhap bini blei sang.

Tong thong Indonesia Prabowo Subianto khan brei bruk tham nhung biak daok tagok rilo, tui nan brei mboh bruk kham ngak abih tham nhung di taneh ia ini. Tong thong Prabowo mboh lac njauk ngak cati catang piah ngak bahu rajaei hacih sa-at oh hu tham nhung. Khik iek siam, dalam hacih sa-at lac laik so/ kiel piah atah klak  tham nhung. Tong thong Prabowo jeng brei mboh hatai jia jalan ngak abih tham nhung di ong hu rilo ndang njauk hatai ngak tui jeng yau hu ralo bhap bini njauk hatai.

          Page ini 17/2, sa mbang megei tayun taneh khang 4 độ richte ngak megei ban ine New Delhi di An Do. Pasak taneh megei dalam trun 5km. Tui Pasak dut iek megei baoh taneh pakat negar An Do, megei taneh ba tal bhap bini New Delhi nduac sraw kadau, tabiak truh sang. Urak ini oh ka kuhria mboh bruk khat lahik atau metai kayua taneh megei tayun. Ban ine New Delhi di An Do daok dalam bhum taneh megei pakat 4, mbuan ba tal megei taneh njol tal khang./.