

Harei kabroi, di Jabat ngak bruk di Chu tich, Po Ine Negar Lương Cường dang akaok peih bruk ar khan saong jao brei Harak pok urang tagok ngak dom Pho Thu tuong saong Akok mentri vaktu 2021-2026. Po Ine Negar ba tagok ngak Phó Thủ tướng ngan haong ong Mai Văn Chính saong ong Nguyễn Chí Dũng; Trần Hồng Minh ngak Akok Mentri Padang ngak; ong Nguyễn Mạnh Hùng ngak Akok Mentri Khoa hoc saong Kong nghe; ong Đỗ Đức Duy ngak Akok Mentri Nong nghiep saong Patagok palei pala saong ong Đào Ngọc Dung Akok Mentri Bangsa – Agama. Brei panuac di var nan, lambaok vakil urang ngak ngak praong di Đảng, Karja, Po Ine Negar Lương Cường payua panuac tadhau ayuh 6 rajakar birau taduan bruk angaok nan; Kakei lac ini bruk njauk iek praong, hadah mbaok meta gam lac bruk ndua nong biak trak, bruk caong khin, ngak tui bruk ba tabiak glong jang di dom rajakar birau tagok nan piah daong Rajaei, Thu tuong Rajaei jum pataom, peih ngak hu jayak bruk taneh ia biak trak dalam thun 2025 saong dom thun anak tal.
Nyaom roya Đảng bộ xã Thuận An, thị xã Bình Minh, tỉnh Vĩnh Long mbang ka 11, vaktu 2025 - 2030 tamat blaoh harei kabroi. Ini lac nyaom roya peih ngak dahlau di abih ka bruk tacei ba jalan ngak di taong abih gah di tinh Vinh Long. Dalam vaktu tapa, Đảng bộ xã Thuận An pataom tame peih ngak siam mek hu taong abih 14 bruk ba tabiak, padang ngak xa palei pala birau kieu mau. Nyaom roya brei tapa Sarak hu 15 kadha praong piah kham ngak tal puac tukvak ngak bruk xa Thuận An hu jeng phuong di ban sit Binh Minh.
Ban Cần Thơ daok tame bilan yuak praong padai Dong Xuan, padai yuak hu 7.5 tan sa hecta. Min, yaom padai oh karo yau nan ye jien laba di bhap bini trun dut saong bilan ini thun dahlau. Dom mblang hamu padai Dong Xuan hu yuak blaoh urang nong pablei padai yaom meng 5.200 tal 7.500 dong sa kilo, yaom yaok pajaih. Ong Nguyễn Quốc Tuấn, urang nong xã Thạnh An, huyện Vĩnh Thạnh khan lac, yaom pablei yau urak ini bhap bini daok laba labaih oh hu ralo yau dom thun dahlau.
Piah bruk ngak kinh te cakrok patagok, khik siam alam moi truong do thi, Ban raya HCM kham merat tal thun 2030 brei panduan ba hu jak jeng jaik 40.000 baoh sang daok tapen ribong kraong kuhria abih tih jien buh tame ngak bruk nan labaih 221.000 tỷ đồng. Danak dak panduan ba taong abih dom baoh sang tapen kraong ribong di Ban raya HCM, brei ramik veik pasiam hadah mbaok meta do thi, piah hu mblang taneh tapen kraong , ribong blaoh da-a urang buh jien tame ngak atau to yaom taneh piah padang ngak dom danak dak sang daok, dom danak dak pablei salih jitvu..rik tame ngak salih birau mbaok meta do thi, trun takik kan kandah tuk alam langik salih karei.
12 ti dong lac jien daong ka bruk pato akhar huroh, sap ndem di dom bangsa takik dalam tinh Sóc Trăng kuhria meng thun 2020 tal thun 2024. Ong Lâm Hoàng Mẫu, Akok Mban Bangsa tỉnh Sóc Trăng caong takre dom pakat, dom gah saong karja palei patui bruk pambuak sumu gauk dalam bruk peih ngak sarak, abih di nyu nan lac bruk tui iek saong taong yaom bruk ngak hu tapa tal pato ndem meyai saong vak akhar huroh Khmer, Lo - Hoa.
Harei kabroi, brei panuac di var taom mbaok gah mbao chi hadei mbang ginum biai di dua gah Nga saong Mỹ di Saudi Arabia, Ngoại trưởng Nga Sergey Lavrov khan lac, bruk ginum biai dua gah rah tabiak dalam siam mekre tapa nan mboh bruk sangka biak ralo di dua taneh ia tal bruk pambuak veik dom mbang ndem meyai ka gah chinh tri, dalam nan hu bruk kandah gauk mesuh metak kalin kan rilo bhum taneh di dunya, labik bo Nga saong Mỹ hu kein laba. Nga saong Mỹ njauk gauk brei peih dom mbang ginum biai anak tal, piah duah jalan yam tapa dom kan kandah di dua gah.
Quan Phúc Điền, ban Thâm Quyến, tỉnh Quảng Đông, gah Meraong negar Trung Quốc birau ini hu pandar 70 “ urang jakar AI” ngak bruk meng DeepSeek piah daong bruk khik iek gah hanh chinh, ngak njauk bruk ba tabiak tagok tal labaih 95%. Tui sa kadha ba tabiak di tai khoan WeChat di quan Phúc Điền puac adit tapa, dom “urang jakar AI” nan hu padang ngak tui bruk mo hinh DeepSeek R1 ngak hu dom bruk pambuak tal taong abih jitvu di karja.
Ralo bhum taneh gah Pur negar Canada daok gaok ribuk tuyet khang kapal, ba tal yaok rituk mbang ahaok brei padeih par, jalan mbak pacang cakak oh nao mai hu. Tuyet laik kapal tal 50 cm hu mboh di dom tinh Quebec saong Ontario, ngak gal jalan gam dom mblang kapal ahaok dalam tinh. Labaih 150 mbang ahaok par brei padeih di Montreal, labaih 300 mbang ahaok par padeih di Toronto. Tui kuhria mboh di Jabat alam moi truong Canada, ribuk tuyet bilan La-ar daok rah tabiak di kreh adit ini./.
Viết bình luận