Jabat Rajaei birau Pok harak tagok likau Akok negar alin pandap ka urang hu buh prein daong taneh ia tuk Tet thun nasak Lanaih 2025. Tui caong khin di Metri LĐ, TB saong XH, urang saong jien alin khik tamo yau thun 2024 lac yaom 600.000 đồng saong 300.000 đồng. Dalam nan alin pandap ka urang hu ngak bruk cach mang lac gauk gar liet si saong urang ngak bruk cach mang; lambaok urang liet si; urang kakuh liet si. Kuhria abih tih jien piah alin pandap lac labaih 500 tỷ đồng.  

Sở Jalan mbak pajeng ba TPHCM birau likau UB ND TPHCM oh mek jien di rahra saong tuai damuai tuk ndik radaih ndien metro taka 1 Bến Thành - Suối Tiên dalam bilan kaok meti, piah pachreih bhap bini pandar jitvu radaih pajeng ba tuai damuai công cộng.  Langiu di nan, Sở Jalan mbak pajeng ba TPHCM jeng ba tabiak yam harak ve glong abih lac 20.000 đồng sa mbang ndik, yaom harak vé biar abih lac 6.000 đồng. Hadei 12 thun padang ngak, danak dak urak ini ngak hu jiak salah saong tui kuhria dahlau meda ba tame ngak bruk mek jien meng harei 22 bilan 12 anak tal.

Salipan bilan akaok thun ini, Mban Tacei ba jalan 389 tinh Ba Ria-Vung Tau  duah mboh hu jaik 1.500 bruk pablei salih mbleik saleik. Bruk pacang pablei salih mbleik hu peih ngak di 3 gah nan lac: Di tasik, abik tasik tapen negar saong dakrak pasar  dalam negar. Di angaok tasik, sraw kadau di abih lac bruk pajeng menyek D.O,  pandap panda oh thau cambaic laic, pandap pakauk yau: pakao hala, alak negar langiu, xang menyek, mac jamraih, pandap hu pandar blaoh, dang…Yau nan ye, meng ini tal puac thun gah chuc nang brei meriak pacang caga bruk bleik saleik di dom tapen tasik.

Yaom kruac sành di dom tỉnh gah Pei negar daok trun biak biar, lap. Di tỉnh Trà Vinh yaom kruac daok labaih meng 2.000 – 5.000 đồng sa kilo. Rilo po bein pala kruac sành khat lahik biak trak kayua yaom trun lap saong phun brei takik baoh trun meng 50 - 70% kayua urang pala oh daok caik hatai sangka. Daok di tỉnh Vĩnh Long, hu labaih 24.000ha taneh pala kruac sành, kayua baoh kruac sành  yaom oh karo, pala rilo tapa bruk caong blei yau nan ye rilo po bein salih tapa pala dom janih phun mbang baoh karei. Kayua yaom kruac sành trun biak lap lac kayua urang pala peih praong taneh pala  yau nan ye brei tagok rilo baoh, ba tal pala rilo tapa pein caong blei.

Tui Rayo kuhria dahlau langik tasik tỉnh Hậu Giang, 3 harei tapa, tỉnh Hậu Giang hu hajan praong di ralo labik, kuhria rah tapa ia hajan dalam tinh meng 25 -40 mm sa harei, hu labik hajan praong tal biak praong di huyen Châu Thành, huyện Phụng Hiệp labaih 100mm sa harei. Dalam 10 harei anak tal labik ia tasik gah Pei ndik tagok kraong Xà No saong ia di mblang hamu tagok suai, di tabung glong kayua ia ndik gam hajan di labik. Yau nan ye, dom bhum palei dauk ia, dui atah  meng 2 tal 4 harei.

Melam kabroi tui mon Viet Nam, cu tri Mỹ nao buh phieu palih ruah Tong tong mbang ka 47 di taneh ia Mỹ. Urang Mỹ  nao buh phieu min hatai alah metah, yaom lac urang lahik bruk ngak takik. Dom urang pasang iek gah chinh tri khan lac thau urang mek hu rilo phieu jayak di Harei palih ruah 5/11 meyah mbang meriak catang  yau kuhria dahlau di dom mbang duah thau. Bruk nan meda ba tal bruk kuhria iek phieu suai lavik saong bruk meriak tui hukum kadauk di dua gah hu pataom dom kapol urang ngak hukum piah langyah dom bruk pambuak tal bruk buh phieu.

Gilang pariak Negar Campuchia birau ini khan brei thau pachreih dom doanh nghiep tut angan tai khoan gilang pariak birau meng jien Riel. Panuac nan  brei mboh bruk hadah krah piah pakhang bruk ngak tui hukum ka doanh nghiep pablei salih, jeng yau jhul pasamar bruk pandar jien Riel dalam bruk ngak mbang. Bruk nan, piah pakhang bruk pandar jien Riel, jhul khang bruk pandar jien negar saong ngak brei cambaic laic ka urang pandar meng bruk takik salih jien.

Lambaok Gah Y tế dunya di Gaza khan lac, hu labaih 100 urang ruak, dalam na hu uranaih rauk jalan sahaneng sraw kadau saomng dom ruak kan dhit, meda brei paduan ba tabiak truh Gaza. Ini lac mbang panduan ba urang ruak biak takik mboh tabiak truh bhum taneh ini. Bruk karei veik, Ai Cập cagar veik catang bruk Israel pakauk Jabat daong ngak pahala saong Bruk ngak di LHQ daong ka urang tị nạn Palestine di bhum taneh Israel, kakei lac bruk ba tabiak yau nan “iek lap” LHQ, dom jabat LHQ saong bhap bini dunya./.