Dalam dom bruk ngak salam uan Đảng, uan Xuân, raok Tết thun sak tapai, akaok bilan 1/2023 meda peih tabiak danak dak “Tết kayua urang kan kathaot” thun 2023 di Palei Ilamo -Du lịch dom bangsa Việt Nam (di Hà Nội). Mban peih bruk kuhria caga labaih 500 paok pandap (yaok paok yaom 2 triệu đồng) jao ka dom urang sarak kanja, dom sang kan kathaot di dom xã jaik taphia; Kapul urang njauk jru mek kalik kruac/dioxin xã Ba Trại, huyện Ba Vì saong dom baoh sang kan kathaot di pak ini. Gam tui di nan, mban peih bruk daok jak ba padang ngak 10 baoh sang anit ranam alin ka mikva bangsa takik gaok kan kandah, sang sarak kanja di tỉnh Kon Tum.

142 anek saih, sinh viên, dam dara bangsa takik naih gheih di 47 tỉnh ban dalam taneh ia bahrau hu UB Bangsa, Mintri Pato Megru, Kapul dam dara CSHCM pakat negar peih bruk pok meyaom. Ini lac dom adei mek hu tanut glaong dalam dom mbang pakacah anek saih naih joi pakat negar, mek hu điểm glaong dalam dom mbang pakacah đại học saong dom adei biak naih gheih dalam dom gah karei. Bruk pok meyaom hu ngak jeng prein pambak tabiak khang kadang dalam bac da-a, pasram megru, ngak bruk, hu mbaok tame dom bruk daong ka menuac sia di anek saih, sinh viên, dam dara bangsa takik dalam taneh ia.

Harei 12/12 yaok thun hu pilih ruah lac “harei di Phở”. “Ngày của Phở” thun 2022 hu asal kadha lac “Phở Việt – pataom veik dom siam mekre” peih tabiak meng harei 10 - 12/12/2022 di ban Nam Định ngan haong rilo bruk ngak biak chreih chrai duh ka tuai damuai mai mbang saong hu ba drei tame mbang pacacah “nao duah urang ngak phở bingi”, pacacah vak dalikan ka Phở, danak dak “Phở trun ban”… taphia di nan manuac sia daok hu mbang dom phở di gah maraong, phở Hà Nội, phở dua jaluk Gia Lai, phở ada Lạng Sơn, phở Sâm Ngọc Linh…

HĐ bhap bini tỉnh Bà Rịa-Vũng Tàu kuhria kaoh brei 1.250 tỉ đồng piah bayar jien mek mbaok taneh piah ngak jalan cao tốc Biên Hòa - Vũng Tàu (500 tỉ đồng) saong jalan Vành đai 4 labik tapa tỉnh Bà Rịa-Vũng Tàu (750 tỉ đồng). Gam haong nan, ngak ka nyu salah dom adat hukum pasang iek, brei ngak dom bruk, brei buh jien tame ngak, peih bruk đấu thầu, pilih ruah thầu saong peih bruk padang ngak njauk tukvak dom danak dak jalan mbak praong yau ye tatua Phước An, jalan tapen tasik Vũng Tàu - Bình Thuận (jalan 994), cao tốc Biên Hòa - Vũng Tàu...

Bình Dương meda pandar labaih 1.000ha taneh kanja piah ngak sang daok xã hội, sang daok ka urang ngak, urang hu jien mek tame bier ngan haong abih tih jien buh tame labaih 45.000 tỷ đồng. Tui taong yaom, bruk caong sang daok di Bình Dương tal thun 2025, pamaong tal thun 2030, dom urang hu sang daok xã hội lac jaik 289 ribau urang, samu haong jaik 289 ribau baoh saong mblang taneh sàn praong labaih 14 triệu m2. Bình Dương meda brei buh jien tame dahlau abih ka kadung taneh hu quy hoạch piah cak rok patagok sang daok xã hội dalam bruk quy hoạch padang ngak dom Labik ngak kong; pandar dom taneh dalam gah paduan ba nao labik karei tame dom labik ngak kong jang yau kadung taneh kayua jabat kanja daok khik ramik piah buh jien tame padang ngak sang daok.

Trung Quốc saong dom taneh ia pambuak bruk di Trung Đông peih ngak hu jak jeng Nyaom biai pakat glaong abih Trung Đông - Arab saong Nyaom biai pakat glaong abih Trung Quốc haong Liên minh vùng Vịnh hu  6 taneh ia. Urang brei panuac di Mintri Ngoại giao Trung Quốc brei thau, Nyaom biai pakat glaong abih Arab - Trung Quốc hu peih tabiak piah "ngak tabiak sa kỷ nguyên bahrau" saong Chủ tịch Tập Cận Bình meda duah bruk daong meng dom taneh ia Arab ka dom Sáng kiến An ninh saong patagok dunya di drei.

Blah Rodong Sinmun, jabat ndom puac di Đảng Lao động Triều Tiên hu ieu bruk jayah haong jit praong COVID-19 lac jak jeng praong abih di taneh ia ini dalam thun ni. Blah mbao ini hu pok mayaom dom sarak pasang iek jit biak samar saong hu ilamo di urang par akaok Kim Jong Ul tuk brei thau lac, meng jalan maong atah saong kham marat khang kajang, ong Kim Châng Ưn hu padang paga pacang cakak ka taneh ia meng bruk peih ngak dom jalan ngak pacang caga biak catang meng di tuk tamuh jit ruak camriep di janih virus biak jhak ini. 

Gah Y tế dunya (WHO) brei thau, dom menuac metai pambuak tal pandiak dom hu trun di thun 2021, min jeng daok glaong jang tui kuhria mboh dahlau di tuk jit praong COVID-19. 4 taneh ia lac Nigeria, CH Dân chủ Congo, Niger haong Tanzania hu labaih meteh dom menuac metai kayua pandiak dom di mangaok dunya thun 2021. WHO ndom lac, pok jien daong biar jang kayua jit praong saong jien sahui tagok glaong ngak kan kandah ka dom danak dak pandiak dom pakat negar di dom taneh ia./.