Patui danak dak mbang nyaom ka 4, harei ini (10/11), Quốc hội yar tangin brei tapa sarak ka jalan cak rok patagok kinh tế - xã hội thun 2023. Jalan cak rok patagok kinh tế - xã hội thun 2023 kayua Thủ tướng Rajaei Phạm Minh Chính pathau khan di mbang peih mbaok mbang nyaom Quốc hội brei thau cambaih, bruk khik kajap tani tanat kinh tế vĩ mô, pasang iek bruk lạm phát, jhul patagok, khik kajap samu gauk di gah kinh tế. pasang iek siam lagaih dom janih jit ruak. Jeng dalam harei ini, Quốc hội jer tangin brei tapa Hukum padang ngak dân chủ di cơ sở saong ginum biai di hội trường ka danak dak Hukum Hợp tác xã (pasiam veik) saong danak dak Hukum khik caga quyen di urang blei pandar (pasiam veik).

Melam 9-11, UBND TPHCM haong UBMTTQ Việt Nam TPHCM pambuak gauk peih bruk pok meyaom “Dom kreih camin joa kandang min praong glaong” dalam bruk pakacah gauk anit ranam taneh ia TPHCM mbang ka V. 21 kapul nyaom, 80 urang hu pok meyaom mbang ini, lac dom kreih camin hadah min joa kandang, hu dom bruk ngak siam, abih hatai ka puk palei, ka bol bhap rahra dalam tukvak tapa. Meng dom bruk ngak joa kandang nan hu daong dak padang TP.HCM dak harei dak hu raidiuk siam mekre jang, bak hatai anit ranam gauk jang. Tapa nan ngak brei medeih tagok bruk jum pataom gauk, ba gauk tame padang TP.HCM dak harei dak siam mekre, bak hatai anit ranam gauk.

UBND tỉnh An Giang bahrau brei tapa Danak dak daong sang daok ka sang kan kanthaot, sang jaik kathaot di Danak dak bruk ngak negar piah patrun kan kathaot khang kajap di tỉnh tukvak 2021-2025, ngan haong abih tih jien buh tame labaih 111 tỉ đồng. Tui danak dak, meda hu 1.081 sang kan kathaot, 877 sang jaik kathaot dalam angan hu daong, ngan haong yaom daong padang ngak sang daok lac 40 triệu đồng sa baoh sang, pasiam veik sang lac 20 triệu đồng sa baoh sang. Dalam nan brei ngak dahlau abih ka dom baoh sang kan kathaot lac urang bangsa takik saong dom sang kan kathaot lac urang hu buh prein ka cách mạng; gam tui di nan jeng jak ba hu rilo phun jien ppiah padang ngak, pambuak di kanja saong bhap bini gam ngak.

Bộ Tư lệnh Bhum 4 Hải quân bahrau peih bruk taduan mek 15.000 pajaih phun pala kayua UBND huyện Chợ Lách, tỉnh Bến Tre alin hadiah. Ini lac bruk ngak hu makna piah brei mboh labik dang, bruk ngak saong hatai anit ranam di bhap bini Bến Tre brei ka tasik, pulao palei negar; rik daong dak padang huyện pulao Trường Sa dak harei dak hijao mekre jang, padang labik gheih mekre ka đơn vị, pasiam labik daok, labik ngak bruk di mangaok dom pulao di Trường Sa.

Pambuak tal bruk njauk jru mek alak di sa ndam metai ngak ka yaok piluh urang njauk tame cấp cứu di huyện An Biên bahrau blaoh, sang iek ruak Đa khoa tỉnh Kiên Giang brei thau lac hu 3 urang ruak metai di sang iek ruak. Tui Yam ndok Pasak Y tế huyện An Biên, asal di alak manyum di ndam metai oh lac alak hu blei di dalam palei saoh bo daok hu po sang blei di huyện karei. urak ini dom jabat chức năng hu mek mau alak nao pasang iek saong samar drah ngak cambaih bruk njauk jru mek saong asal di alak ini.

Brei panuac langiu nyaom biai mbang ka 27 dom gah hu mbaok tame Công ước khung di Liên hợp quốc ka biến đổi khí hậu (COP27) daok rah tabiak di Ai Cập, Akaok Mintri Kế hoạch saong Patagok Kinh tế Ai Cập hu panuac brei thau dahlau lac, châu Phi mbuan khat lahik kinh tế 415 tỷ USD di thun 2030 kayua bala meng langik tasik.  Daok tui yaok pataom di Tập đoàn tái bảo hiểm Thụy Sĩ Swiss Re bahrau ba tabiak, dalam meteh thun ini, abih tih khat lahik kinh tế di mangaok dunya kayua bala meng langik tasik tui kuhria tagok tal 72 tỷ USD.

Urang ngak di Hy Lạp ba gauk padeih ngak dalam harei 9/11 piah ndok jien bilan glaong jang piah pacang veik haong lạm phát, dalam tuk yaom năng lượng saong jien pandar daok tagok glaong di châu Âu ba tal bruk trun jalan di grauk dunya. Dom bruk padeih ngak di urang ngak gah jalan mbak nyu ngak ka jalan mbak di ban ine jeng sarau kadhau. Gah kinh tế Hy Lạp tagok jaik dua mbang di labik pandar jien euro dalam thun ini meng hu bruk pasiam veik di gah du lịch, min lạm phát daok jaik di tanut glaong di abih di dalam 3 piluh thun tapa di tanut 12%.  

Dom chuyên gia Mỹ hu panuac brei thau ka bruk mbuan hu sa mbang haong gauk 3 jit praong di dalam taneh ia, lac cúm, virus hợp bào hô hấp (RSV) haong COVID-19. Panuac nan hu ba tabiak dalam tuk taneh ia Mỹ daok hu dom menuac njauk 3 ruak ini dak harei dak rilo, ngak brei dom labik y tế dalam taneh ia laik tame bruk tapa prein ngak. Dom urang jakar y tế Mỹ huac lac, dom menuac njauk ruak cúm, RSV tagok rilo saong naong trak jit ruak COVID-19 dalam bhap bini, taneh ia Mỹ meda dang anak dom cuang kandah dalam bilan brak ini./.

Urang lang: Thu Thảo & M. Phương