Ngak bruk haong tỉnh Bình Phước ka peih ngak sarak, hukum ka bruk urang jakar ngan haong dom urang jakar lac urang bangsa takik, tukvak 2016 - 2023, ong Y Thanh Hà Niê Kđăm, Akaok Kapul Bangsa di Quốc hội hu panuac lac anak tal tỉnh Bình Phước patui veik peih ngak dom sarak, hukum ka bruk urang jakar ngan haong urang jakar bangsa takik; pataom prein tame khik tani tanat manuac ngak, ginup tui bruk ba tabiak ka nyaom roya Ndang saong Hội đồng bhap bini dom pakat, gam patagok bruk pasang iek dalam peih ngak dom jalan ngak, sarak, hukum ka bruk urang jakar bangsa takik.

Mban Thường vụ Thành đoàn saong Kapul Liên hiệp dam dara Việt Nam TP. Cần Thơ bahrau peih bruk pok meyaom dam dara naih gheih ngak tui panuac Wa, pok meyaom kalup kapul, kapul nyaom halan hatian hadah krah saong jao yai “Kayua Cần Thơ dahlak anit ranam” thun 2024. mBan peih bruk hu pok meyaom 79 urang hadah krah di ban Cần Thơ. Dom kapul nyaom saong menuac urang hadah krah hu pok meyaom thun 2024 lac dom kreih camin hadah, hu dom rik daong ka bruk pato megru, prein yava, kinh tế saong bruk puk palei. 

Liên đoàn Lao động tỉnh An Giang bahrau jao jien bac Tôn Đức Thắng, alin pandap “Daong prein nao bac”, jao 133 paok jien bac ka anek bhik di đoàn viên, urang ngak kong, viên chức, urang ngak yam tapa kan kandah bac ta-a naih joi. Jien bac Tôn Đức Thắng hu khik ramik, jao ka dom kamuan khik kajap bruk bac taa naih tal tuk dom kamuan bac salah pakat bac. Tapa 29 mbang peih ngak, Liên đoàn Lao động tỉnh An Giang hu alin labaih 2.000 paok jien bac yaom abih tih jaik 2 tỷ đồng. Gam tui di nan jeng jak ba hu 100 trieu dong saong 450 gu phao ka anek saih di dalam tỉnh.

150 anek saih sang biak kan kandah, abih di nyu lac dom adei hu amaik ame lac urang công đoàn, urang ngak matai lahik dalam jit praong COVID-19 di tỉnh Bình Dương bahrau hu Liên đoàn lao động tỉnh brei jien bac yam tapa kan kandah. Amuk Ong Thụy Hoàng Mai, Phaok akaok Liên đoàn Lao động tỉnh Bình Dương khan lac, dalam tuk ngak mbang pablei salih kan kandah, jeng ngak kan kandah tal raidiuk, jien mek tame saong bruk ngak di urang ngak, Liên đoàn Lao động tỉnh hu ba tabiak rilo jalan daong dom sang urang ngak gaok kan kandah yau ye padang Kadung jien bac "pambuak seok caong khin" brei ka anek kamuan urang ngak, pambuak haong dom sang bac pabak brei tapuk bac ta-a, khan ao nao bac ka dom anek saih kan kandah. 

Sở Công thương dom tinh, ban Đắk Lắk, Sóc Trăng saong Trà Vinh bahrau pambuak gauk peih ngak nyaom biai pambuak gauk pablei salih, duah jalan pablei tabiak pandap panda thun 2024. Tui ong Lê Minh Trí, Phaok Yam ndok Pasak dui pachreih bruk pablei salih di tỉnh Sóc Trăng, mbang nyaom oh lac kein lagaih piah ka dom doanh nghiep, hop tac xa, urang parabha taom gaok gauk, ndem mayai nao mai, mbaoh tangin tame pambuak haong gauk bo daok lac tukvak piah gam haong gauk roh duah, peih ngak dom kein lagaih, dom prein khang di dom pandap ngak nong angan je; jhul khang bruk pablei tabiak dom pandap panda hu chat luong glaong, salamat, pabak hu hatai caong di urang blei pandar.

Tui duah thau bahrau abih di Ipsos, Phaok Tổng thống Mỹ Kamala Harris urak ini daok dang anak Tong thong dahlau daih ong Donald Trump 5 điểm % dalam bruk nduac pakacah tame Nhà Trắng di bilan 11 tal. Tapa nan brei mboh bruk tagok biak rilo dom menuac pachreih tui amuk Harris dalam tuk bruk nduac pakacah daok rah tabiak khang di grauk labik dalam negar Mỹ. Dalam tuk nan, ong Trump jeng daok dang anak rilo cuang kandah gah adat hukum tal bruk chính trị, bruk ini meda ngak brei patrun dom menuac pachreih tui ong. 

Kuhria tal maong 7 meteh melam kabroi, mbang magei baoh taneh hu tâm chấn di tasik Nada Hyuga-nada, tỉnh Miyazaki, Nhật Bản ngak brei takik abih 9 urang njauk rambuac saong rilo baoh sang khut; labik jalan Roya 220 di ban Nichinan, tỉnh Miyazaki, jeng brei kareik pabah mbang saong ka oh hu khau tin halei ka bruk peih pabah mbang gilac. Meng di tuk rahtabiak bala magei baoh taneh, dom nding raok ia di labik ini nyu pacah, gah chuc nang brei pacang cakak rilo labik jalan piah khik  salamat ka rahra.

Tok dalam 1 adit tapa hu 40 menuac matai kayua hajan ia sua di gah pai Yemen. Hajan praong dui atah ba tal ia dauk ia sua ngak brei 500 sang njauk ba nao daok di labik karei, ngak kan kandah tal labaih 1 rabau meuac. Bruk ia dauk ia sua ngak klaoh rilo jalan. Rilo labik dalam bhum oh nao mai hu, ngak ka bruk daong menuac gaok kan kandah. Bala daok ngak khut khang cơ sở hạ tầng saong drap ar di bhum pai Yemen./.