Ini lac dom jalan mao mai hu makna praong dalam bruk daong jhul patagok kinh te – xa hoi oh lac ka ta-eng tỉnh Quảng Ninh bo daok hu makna ngan haong dom tinh, ban jaik taphia yau ye Bắc Giang, Lạng Sơn... Vũ Miền, urang vak di rayo sap ndem Viet Nam daok di bhum Đông Bắc hu kadha vak ndom ka bruk ini: 

Labaih 2 bilan ini mai, rahra daok jaik jalan tỉnh lộ 342 nao tapa dom xã Thanh Lâm, Đạp Thanh di huyện bhum ceik Ba Chẽ mboh randap haong sap mac khoan cakak bê tông, sap yava khang di dom sruh radaih pajeng haluk, patau tuh ngak jalan. 

Saai Trần Thị Đoàn, daok di xã Thanh Lâm brei thau: daok atah di ban sit Ba Chẽ ka oh tal 30 km min tuk hu bruk tagok huyện, saai abih labaih 1 maong meteh nao meng radaih mac. Kayua yau nan ye, rahra di pak ini biak caong maong harei jalan tỉnh lộ 342 hu ngak salah: "Meng di tuk kuhria ngak jalan, karja hu ginum biai haong rahra saong rahra njauk hatai mbaoh tangin tame harak brei peih mbaok taneh. Rahra taduan ginup abih jien biyar saong thau lac bruk ngak jalan nan siam ka rahra, siam ka harei hadei kayua hu jalan nao mai mbuan lagaih".

Danak dak pasiam veik jalan tỉnh 342 atah abih tih labaih 60 km, pambuak ban Hạ Long tapa huyện Ba Chẽ tal jaik taphia huyện Đình Lập, tỉnh Lạng Sơn. Taeng labik jalan nao tapa huyện Ba Chẽ lac labaih 20 km, hu pok paglaong saong ngak bahrau ngan haong rilo labik mbeik veik jalan nao, trun mbuan; peih praong mbaok jalan labaih 9 mét... Tuk ngak salah, jalan bahrau ini hu daong ka bruk nao mai di Quảng Ninh saong Lạng Sơn trun tal 50 km dut saong jalan roya 4B urak ini.

Ong Trần Văn Chiều, Phó akaok xã Đạp Thanh brei thau lac, jaik 80 baoh sang gaok bruk ngak jalan ini njauk hatai jao mbaok taneh brei ka gah ngak jalan padang ngak: "Urak ini jalan biak sit, hu rilo dốc saong ia dauk di bilan hajan, nao mai biak kan kandah. Jalan bahrau hu pok paglaong dom labik njauk ia dauk, pasiam veik dom labik oh lagaih ka bruk nao mai saong hu pambuak tame dom puk palei, dom labik rahra daok piah lagaih nao mai saong peih praong jalan, patrun dom labik dốc glaong, cakak dom jalan vaih piah maong hu atah tuk nao mai angaok jalan".

Bruk pasiam veik, peih praong jalan tỉnh lộ 342, ngak jeng bruk pambuak jalan nao mai mbuan lagaih di Quảng Ninh haong Lạng Sơn, Bắc Giang, brei mboh hatai khang tui bruk “ jalan mbak nao dahlau di abih” hu Quảng Ninh peih ngak dalam rilo thun di dom bhum palei gaok kan kandah, bhum atah biyah piah ngak siam lagaih dom danak dak bruk ngak negar, oh lac ka ta-eng tỉnh Quảng Ninh bo daok biak hu makna praong ngan haong dom tinh, ban jaik taphia nan. Ong Nguyễn Xuân Ký, Bí thư tỉnh ủy Quảng Ninh ndom lac: "Hu jalan ini, meng Lạng Sơn mai tal tasik Hạ Long daok 50 mbaik jalan min, saong langiu di jalan 4B urak ini ye tuk hu jalan bahrau, kol drei meda langyah hu bruk nao mai di bhum ceik glaong, patagok bhumceik glaong meng công nghệ bahrau, oh jah tak glai, oh ngak jhak tal alam langik tasik, abih takik phun jien buh tame".

Tal tukvak ini, meda lac Quảng Ninh daok ngak jeng jalan mbak nao mai pambuak dom huyen bhum ceik saong dom pasak, đô thị di tỉnh. Ini lac jalan peih tabiak ka Quảng Ninh padang ngak dom bruk patagok bahrau ka bhum ceik piah cak rok kinh te, ba mbuan lagaih ka rahra bhum ceik, ka bhap bini dom bangsa takik mbang tui dom siam mekre bahrau di y tế, pato magru saong paglaong raidiuk./.