Sarak ka bruk buh jien tame Danak dak padang ngak jalan Vành đai 3 TPHCM bahrau hu Quốc hội yar tangin brei tapa ngan haong 95,38% dom urang Quốc hội njauk hatai brei ngak. Meng sarak ini, Quốc hội brei buh jien tame Danak dak nan, piah ngak jeng jalan pambuak TPHCM haong tỉnh Đồng Nai, tỉnh Bình Dương, tỉnh Long An saong dom tinh, ban karei dalam bhum, patagok dom kein laba di danak dak daok hu buh jien tame ngak, ba mai bruk cak rok patagok bahrau, paglaong kein laba di bruk pandar taneh. UBND TPHCM lac labik dang tabiak peih bruk padang ngak piah khik kajap bruk samu gauk di abih danak dak.

Sarak dong jien pah sang ka urang ngak hu yaom  6.600 tỉ đồng di rajaei hu batabiak pandar meng harei  28-3, min mbiah tal ni bahrau hu  26 tỉnh, ban  taduan hu harak  likau dong jien pah sang di doanh nghiệp song daok peih jien brei. Akaok mintri  Lao động thương binh song  xã hội Đào Ngọc Dung brei thau, Mintri hu panuac cong harak gar dong jien pah sang ka urang ngak biak mbuan, lagaih, min rilo tỉnh ban daok pabak bruk niêm yết tantu cambaih laih.

Kapul Doanh nhân uranaih umo tỉnh Ninh Thuận bahrau tabiak mbaok Kalup kapul Du lịch Ninh Thuận, daok dalam kalup kapul Du lịch Việt Nam.  Ini lac sa bruk njauk uaan tabuan piah ka gah du lịch Ninh Thuận yam tapa kan kandah piah paglaong, patagok samar saong khang kajap. Gam haong nan, daong palagaih ka dom doanh nghiệp du lịch dalam saong langiu tỉnh hu jalan pambuak gauk, paglaong prein meriak gauk. Tapa nan, ngak brei du lịch Ninh Thuận jeng sa gah kinh tế praong di thun 2025 saong biak biai jeng gah kinh tế praong di thun 2030.

Gah chức năng tỉnh Tiền Giang bahrau duah mboh song langyah labik pablei  salih khak ja  kayua ong Đinh Văn Chữ, dok di palei  Bình Thạnh, xã Tam Bình, huyện Cai Lậy ngak po. Pandap cap mek hu lac  73 mbao khak, janih  25kg/sa mbao,  yaom labaih  40 triệu đồng. Hu thau sang ong Đinh Văn Chữ pablei salih pandap ngak nong prong, tuai lac sang bein pala durian dalam huyện. Bruk pablei salih khak ja, ngak kan kandah tal bruk patagok di bein, ngak khat lihik prong ka sang bein.

Dah page ini (16/6), Công an huyện Bù Gia Mập saong dom gah nghiệp vụ Công an tỉnh Bình Phước daok pasang iek, duah thau makna ba tal pui khuah di sa baoh sang daok di xã Bù Gia Mập ngak brei 2 urang metai. Bruk khuah nan rah tabiak di sang amuk T.T.N.V (umo 52 thun), daok di palei Bù Rên, xã Bù Gia Mập, huyện Bù Gia Mập, tuk dah page ini (16/6).  Kayua pabah mbang kreik gah dalam nan ye Công an xã haong bhap bini  yah pabah mbang piah padam apui. Tuk yah pambang nao tame,  hu mboh ong N.Đ.N. (umo 56 thun, pasang di amuk V.) var drei jan, daok ndih kandang di bilik rok tuai, taphia nan hu sa kalaok  jru halak. Dalam bilik ndih hu amuk V saong amuk T.T.N.T. (umo 53 thun, palei daok di Quảng Nam) njauk pui khuah. Công an nao jaik pasang iek ye mboh 2 urang nan metai blaoh. Ong N. hu công an xã ba nao cấp cứu.

Nyaom biai dom  nghị sỹ ranaih umo dunya mbang ka 8 bahrau peih tabiak di Ai Cập song hu mbaok di dom kapul  nghị sỹ ranaih umo  meng labaih  60 taneh ia  di dunya . Nyaom biai rah tabiak  2 harei, hu  4 mbang ginum biai ka bruk biến đổi khí hậu, pambuak bruk nghị viện song  xã hội dân sự dalam bruk pacang  biến đổi khí hậu. Nyaom biai lac jalan piah ka  dom  nghị sỹ ranaih umo taom gaok klah rabha ilamu song bac megru song gauk , gam song nan ba tabiak jalan ngak haong gauk song sahneng duah piah jhul patagok bruk jao quyền ka dam dara.

  Hãng thông tấn negar Triều Tiên brei thau, Triều Tiên daok njauk pacang caga haong sa mbang tamuh jit ruak njom mbak di bhum gah Tây Nam taneh ia ini. Urang par akaok negar ong Kim Jong-un hu tacei brei pabak jru tavao ka dom labik ini piah pacang caga  ruak viem jalan tung pruac cấp tính". Ong Kim Jong-un jeng ndom tal bruk njauk pacang cakak jit ruak samar di abih meng bruk brei daok karei biak catang dom urang medil lac njauk ruak.

Tapa pasang iek duah thau bahrau abih di Reuter brei mboh lac, bruk pachreih tui di urang  Mỹ brei ka Tổng thống Joe Biden trun gam gam dalam adit ka 3, dok  39%, jiak tal tanut beir di abih kuhria meng dahlau mai. Pasang iek jeng brei mboh, dalam dom urang đảng Dân chủ, bruk pachreih tui  Tổng thống Biden lac  74%, trun dut song tanut  85% di bilan  8/2021. Urang langyah ndom lac, ni lac sa bruk brei mboh đảng Dân chủ di ong Biden meda lahik  quyền pasang iek di takik abih  sa viện di Quốc hội dalam mbang palih ruah kreh nhiệm kỳ harei  8/11 anak tal./.

Urang lang: Thu Thao & H.Pha – 16/6/2022