Ủy ban Thường vụ Quốc hội  brei  pataom mbaok peih mbang nyaom  oh caga dahlau mbang ka 3, Quốc hội mbang XV piah pasang iek ka bruk urang ngak tui thẩm quyền di Quốc hội. Mbang nyaom oh caga dahlau mbang ka 3 hu peih tabiak di bier harei 18/1/2023 di sang Quốc hội, Ban ine Hà Nội. Dahlau di nan, harei 17/1, Ban Chấp hành Trung ương Đảng mbang XIII hu ginum biai pasang iek saong brei panuac ka hatai caong padeih dom bruk ngak, brei padeih ngak saong padeih hưu di akaok negar Nguyễn Xuân Phúc. Ong Nguyễn Xuân Phúc ndik tapui thun 1954, ndih tapui di huyện Quế Sơn, tỉnh Quảng Nam; lac Ủy viên Trung ương dom mbang: X, XI, XII, XIII; Ủy viên Mintri Chính trị dom mbang (XI, XII, XIII) saong lac urang Quốc hội mbang XI, XII, XIV, XV.

Dalam tuk Tết thun 2023 ini, hu labaih 6 trieu 500 rabau đoàn viên, urang ngak taduan hu bruk sangka, daong brei di dom kapul Công đoàn haong yaom jien abih tih lac labaih 4.441 tỷ đồng. Tết thun ini, Tổng Liên đoàn Lao động Việt Nam hu danak dak “Darak Tết Công đoàn 2023” di 22 tinh ban, dalam nan brei peih ngak dahlau di bhum atah bayah, bhum ngak mbang kan kandah saong dom labik hu rilo urang ngak...

Ủy ban Mặt trận negar Việt Nam TP.HCM bahrau jao 400 paok pandap, yaok paok hu yaom 1 triệu đồng ka dom sang mikva bangsa takik, yau ye: Lo, Chăm, Khmer, Tày, Nùng, Mường, Ê đê, Jrai, Hrê. Ini lac dom pandap kayua ong Trương Hòa Bình, lac Ủy viên Mintri Chính trị dahlau daih, Phó Thủ tướng Thường trực rajaei dahlau daih jak ba rik daong, yaom abih tih lac lac 400 triệu đồng. Amuk Phan Kiều Thanh Hương, Phó akaok Ủy ban MT negar Việt Nam TP.HCM tadhau ayuh, thau dhar phol ong Trương Hòa Bình dalam rilo thun tapa rilo mbang jak ba dom kapul, manuac urang, dom urang ngak pahla sangka daong ka urang kan kathaot, abih di nyu nan lac mikva bangsa takik, piah mikva mbang tet bui sambai, chreih chrai, trei sil saong haniem phul.

Piah daong ka urang ngak gaok kan kandah hu nao palei, tỉnh Long An hu peih bruk brei 40 sruh radaih ba 1.700 urang ngak gaok kan kandah gam haong gauk gar nao palei mbang Tết anek sak tapai thun 2023. Langiu di nan, Liên đoàn Lao động tỉnh Long An, dom pakat công đoàn haong dom urang ngak pahla hu peih bruk nao ravang, alin hadiah pandap brei ka labaih 233.000 đoàn viên, urang ngak hu raidiuk kan kandah di tuk Tết Nguyên đán, haong yaom jien abih tih labaih 83 tỷ đồng.

Dom sang bein pala kruac bhung kanduk hijao di Bến Tre biak chreih chrai kayua yaom kruac bhung tagok glaong. Urak ini yaom kruac bhung kaduk hijao tagok  40.000 đồng/kg ngan haong kruac bhung janih 1 (trak labaih 1,5kg); janih 2 hu yaom 25.000 đồng/kg (trak meng 1,2 - 1,4kg). Tui So ngak nong saong patagok palei pala Bến Tre, kruac bhung tagok yaom lac kayua caong di urang blei mai caik di Tết tagok glaong. Langiu di nan, darak pasa Trung Quốc hu peih pabhang, dom pandap panda kaya nong di tinh tui kuhria hu mboh tagok gilac, dalam nan hu kruac bhung kaduk hijao.

Tổng Yam ndok Kadung jien padai (IMF) mboh lac: Patagok kinh tế dunya meda gaok tal mbat, di tanut 2,7% dalam thun 2023, bloh siam veik di thun 2024. Taong Yam ndok IMF tacei tabiak 3 cuang kandah praong ka KT dunya lac bruk mesruh gauk di Nga haong Ukraine, bruk srau kadau jien pandar cai saong jien laba glaong di tanut oh ka bhian mboh dalam yaok pluh thun tapa. Tui nan, dunya brei rami ramik veik piah khik kajap bruk pabak ka nyu siam lagaih.

Gah truyền thông karja Trung Quốc brei thau, dalam harei 17/1 hu labaih 390.000 tuai tabiak meng dom ga radaih pui di Thượng Hải nao tal dom tỉnh dalam mbang “nao palei mbang tet praong abih di dalam thun”. Mintri jalan mbak pajeng ba Trung Quốc kuhria mboh lac tukvak tabung glaong meda hu abih tih 2,1 tỷ mbang tuai di dalam negar meng harei 7/1 tal harei 15/2 kayua rilo rahra daok di ban raya di tukvak Tết Nguyên đán piah taom gaok dom urang dalam sang, gauk gar di palei meng di tuk jit ruak rahtabiak.

Dom urang roh duah Na Uy brei thau, urang hu duah mboh sa candaih patau praong hu sarak akhar rune klak abih di dunya hu meng jaik 2.000 thun dahlau. Candaih patau sambo mau nâu, 4 meta, yaok mbaok atah 30 cm, hu duah mboh dalam tuk kuac rok sa baoh kubo klak di puac thun 2021, di gah Tây Bắc ban ine Oslo. Asal di akhar haroh hu sarak angaok patau nan hu lang tapa akhar Latinh lac "idiberug" oh ka cambaih makna, meda tacei urang daok dalam baoh kubo nan./.