Patui danak dak Mbang nyaom ka 4, Quốc hội mbang 15, harei ini, Quốc hội caik abih harei ngak bruk piah ginum biai ka bruk peih ngak sarak, hukum ka bruk patak pataom, pacang caga palai pajoa tukvak 2016-2021. Bruk njauk mayai  dalam adit ngak bruk lac bruk tangi sua saong javap jaloi anak Quốc hội. Mbang sua tangi meda peih tabiak meng harei 3 tal 5-11. Dom nyaom kadha hu Quốc hội pilih ruah piah sua tangi lac :padang ngak, Nội vụ, khau tin saong Truyền thông, Thanh tra. Puac mbang sua tangi, Thủ tướng rajaei Phạm Minh Chính meda ngak cambaih dom bruk hu pambuak tal saong javap jaloi dom panuac sua tangi di urang Quốc hội.

Thành đoàn TP.Hồ Chí Minh bahrau peih bruk pahadar 40 thun Harei Dam dara urang ngak ban raya (15/10/1982 - 15/10/2022), saong pok meyaom, jao Giải thưởng Nguyễn Văn Trỗi mbang ka 13 brei ka 44 dam dara urang ngak hu dom sahneng duah bahrau, hu hatai anit bruk ngak saong rik daong tame bruk cakrok di labik drei ngak. Tapa nan, Phó Bí thư Thành ủy TP Hồ Chí Minh Nguyễn Hồ Hải caong lac, anak tal, dom jabat, dom labik ngak bruk, ba mbuan lagaih ka urang ngak , abih di nyu lac urang ngak hu ilamu, hu tangin gheih ngak, hu hatai sahneng duah, daok patagok ilamu, tangin gheih ngak, buh prein ka ban raya.

Urak ini, tỉnh Long An hu 220 HTX ngak bruk dalam gah ngak nong. Kuhria meng akaok thun tal urak ini, tỉnh hu padang bahrau 11 HTX ngak nong. Taong abih kadung jien di dom HTX labaih 203 tỉ đồng, gam haong labaih 6.900 urang hu mbaok tame. Bruk padang ngak saong cak rok patagok dom HTX ngak nong hu rik tame bruk salih bahrau jalan ngak, ba bruk ngak, tagok jien mek tame ka bhap bini, abih di nyu nan lac pamaong tal bruk padang gah ngak nong tui jalan bahrau, khang kajap saong lagaih haong alam môi trường.

UBND huyện Châu Thành, tỉnh Sóc Trăng pambuak bruk haong gah daong pandap, alin hadiah 400 paok pandap, yaom 350 triệu đồng brei ka sang kan kathaot saong anek saih sang kan kandah. Langiu di nan, kapul daok hu jao 150 thẻ BHYT brei ka anek saih sang kan kandah haong 20 paok pandap brei ka sang kan kathaot daok di xã Thuận Hòa, yaok pok yaom 1 triệu đồng haong 1 baoh sang yaom 60 triệu đồng. Dom pandap ini yaom lac sit min brei mboh bruk  hatai anit ranam, daong ka sang kan kathaot saong dom adei anek saih kan kathaot yam tapa kan kandah piah nao bac da-a.

Jaik di ini, kayua yaom khak drak tagok samar, piah trun yaom jien pala drak, rilo urang pala phun thanh long di tỉnh Tiền Giang pandar khak drak athur, manuk, ada pruh tame bein phun thanh long. Di bilan hajan yau urak ini, khak athur mbau bruk ngak tachauk nerak alam di rilo labik. Trak damak di abih lac di huyện Chợ Gạo, anek ruai rahtabiak rilo di gok phun thanh long pagam tame baoh thanh long saong par tame sang, pambak tal prein yava di bhap bini.

Tổng thống Hàn Quốc Yoon Suk-yeol hu tacei pato brei maong iek quận Yongsan di ban ine Seoul lac bhum bala praong hadei di bruk juak kateik mangaok gauk ngak brei takik di nyu 153 urang metai saong 82 urang njuak rambus di phường Itaewon. Tổng thống Hàn Quốc brei caik quốc tang meng harei 30/10 tal abih harei 5/11 piah hadar tal dom urang metai. Karja Hàn Quốc saong dom gah peih ngak danak dak brei klaak jaik abih dom bruk peih ngak praong saong bruk diễu hành di harei Halloween, jeng yau dom bruk parang me-in di dom  ngôi sao K-pop.

Kuhria tal maong 12 melam  kabroi (tui maong di pak ini), labaih 90 urang metai saong yaok piluh urang njauk rambuac dalam bala jaleih tatua tuan di bang gah Tây Gujarat di Ấn Độ. Tui kuhria hu takik di nyu 150 urang daok di mangaok tatua tuk rahtabiak bala. Bala ini rahtabiak tuk tatua bahrau hu ngak pasiam veik saong peih bruk raok tuai mai rivang iek gilac ngak ka tatua  tapa prein di nyu saong jaoh jaleih. Thủ tướng Ấn Độ khan lac meda pabak sa paok jien daong lac 2.500 USD ka gauk gar di dom urang metai saong 625 USD ka yaok urang njauk rambuac.

Trung Quốc brei tapa hukum hu ramik pasiam veik daong ka urang kumei hu khik caga rilo jang anak bruk iek lap kumei jang likei saong rapeik rapai urang kumei. Ini lac mbang camereip abih hadei di jaik 30 thun hukum khik caga urang kumei hu ramik pasiam veik. Tui Tân Hoa Xã, menuac pandar urang ngak njauk taduan trách nhiệm meyah quyền saong kein laba di urang ngak lac urang kumei saong  an sinh xã hội njauk ngak suan, gam haong nan lac pacang jalan daong urang kumei njauk urang ba nao pablei salih saong loa cap mek hu maong lac bruk ngak duas./.

Urang lang: Thu Thảo & M. Phương – 31/10