Tui danak dak, harei ini, Quoc hoi ginum biai di hoi truong ka dom asar kadha  daok hu panuac karei di gauk ka du thao Hukum jalan mbak; du thao Hukum pasima veik, pabak dom asar kadha di Hukum To yaom drap ar. Puac biar harei, Quoc hoi palih ruah Akok negar. Dalam var ngak bruk harei kabroi, UV Mentri Chính trị, Pho Akok Thuong truc Quoc hoi Trần Thanh Mẫn hu Quoc hoi palih ruah pok ngak Akok Quoc hoi mbang XV.

Tỉnh Tiền Giang daok tapen kraong Tiền, hu dom kraong ribaong biak lagaih piah patagok dom bein phun mbang baoh. Urak ini, tinh hu taneh pala phun mbang baoh praong abih dalam taneh ia ngan haong labaih 84 ribau ha, yaok thun hu labaih 1,8 triệu tấn baoh kayau dom janih. Thun 2023, baoh kayau di tinh pablei tabiak negar langiu labaih 23.860 tấn dom janih, mek hu jaik 46 triệu USD. Baoh kayau di tinh hu pablei nao dom darak pasar taneh ia langiu, yau ye: Trung Quốc, Mỹ, Canada, EU, Úc, Nhật Bản, Hàn Quốc, Ấn Độ, Trung Đông, châu Phi…

Yaom lac bruk pacang caga pandiak bhang njom ia mbak hu dom pakat karja, gah ngak nong tỉnh Bến Tre peih ngak khang, min kayua dom kraong ribaong oh ka pacang sir nan ye khat lahik gah pala drak jeng daok rah tabiak. Tui kuhria abih tih taneh ngak padai gaok khat lahik lac 159 ha. Ngan haong bruk raong pala kaya dalam ia, hu 11 tấn hadang giraong hijao khat lahik…Tỉnh Bến Tre daok tame bilan hajan, mikva urang ngak nong samar pasiam bruk khat lahik kayua bala meng langik tasik, jhul khang bruk pala ngak, ramik pasiam berin phun kayau, danao raong; trun pajaih bilan Hè thu.

Dalam 2 harei puac adit blaoh, Tây Nguyên hu 3 mbang bala mblung ia ngak ka 8 uranaih metai. Dalam nan hu 4 uranaih metai di melam adit (19/5), pak xã Phú Hội, huyện Đức Trọng, tỉnh Lâm Đồng. Dom sang uranaih gaok bala jeng lac sang biak kan kandah. Lambaok kanja palei, dom urang ngak pahla hu rik jien tame daong ngak ndam metai ka dom kamuan. Urak ini, daok caga tame bilan padeih hè, gah chuc nang kakei amaik ame uranaih njauk caik hatai, tui iek anek mbik di drei catang jang, piah plaih nyaih patakik abih dom bala biak pandik harao, dalam nan hu bala mblung ia.

Jabat kuhria iek bruk langik tasik brei thau, hangin Tây Nam di bhum Nam bộ daok dak harei dak khang, nan ye dom harei anak tal di bhum Trung saong Nam Trung bộ, Tây Nguyên saong Nam bộ hu hajan gam gam. Bhap bini njauk caik hatai caga ia sua, glut jaleih taneh di bhum ceik saong dauk ia di dom bhum dhaong, biar. Caga hajan praong dalam sa tukvak suai lavik ngak ia dauk di dom bhum đô thị, dalam tuk hajan hangin meda hu ribuk,, cakla, hajan patau saong hangin khang.

Mufty I-ran tabiak panuac brei caik quốc tang 5 harei, saong tacei Phó Tổng thống ka sa Mohammad Mokhber, tagok pan bruk taneh ia salih ka Tổng thống Rai-xi bahrau lahik dalam bala laik ahaok trực thăng. Rilo taneh ia dalam bhum hu payua panuac klah rabha pandik harao saong brei mboh hatai jumpataom khang kajap haong Rajaei saong rahra Iran. Dalam sa bruk pambuak tal, Mintri jalan mbak pajeng ba Thổ Nhĩ Kỳ brei thau lac, sruh kapar haok trực thăng laik tuk pajeng Tổng thống saong Ngoại trưởng Iran di harei 19/5 oh peih hệ thống tín hiệu atau oh hu jamraik yau nan di mangaook sruh kapar haok.

Akok Mentri Nội vụ Malaysia brei thau, dom urang negar langiu hu pilih ruah tame ngak bruk oh tapa 15% dom urang ngak dalam taneh ia. Tui mentri Nội vụ Malaysia, mbang camereip abih taneh ia ini brei adat palih ruah urang peih gilai negar langiu umo mangaok 60 thun. Tukvak palih ruak oh tapa 36 bilan kayua harak adat ngak bruk hu  brei dui atah 6 bilan sa mbang. Kuhria tal harei 15/3, hu labaih 2,1 trieu urang ngak negar langiu hu palih ruah mai Malaysia ngak bruk. Urak ini, hu rilo gah bo Malaysia pambak tame urang ngak negar langiu, abih di nyu lac bruk kan kandah, mbuan gaok bala saong njom nerak.

Cảnh sát Ấn Độ brei thau lac, takik di nyu 17 urang metai saong 8 urang njauk rambuac, hadei di tuk sruh radaih pajeng urang ngak laik trun mbuan ceik di gah kreih negar di harei kabroi. Gah khau tin palei brei thau, dom urang ngak di bộ lạc Baiga, bhian hu mbaok tame bruk ngak bidi - janih pakao hala lauk meng tangin. Jeng dalam harei nan, di Afghanistan, hu 5 urang metai saong 11 urang njauk rambuac dalam bala jalan mbak di tỉnh Baghlan, gah barak negar ini. Makna di dom bala jalan mbak pak Afghanistan bhian kayua jalan oh siam, khut, mbaih mbaoh, urang peih radaih oh caik hatai, jalan nao mai kan kandah saong pajeng pandap panda tapa prein./.