Patui mbang nyaom ka 7, harei ini (29/05), Quoc hoi ginum biai dom bruk nan lac: Taong yaom pabak bruk peih ngak danak dak patagok kinh te - xa hoi saong kadung jien karja thun 2023; bruk peih ngak danak dak cakrok KT-XH saong kadung jien karja dom bilan akaok thun 2024. Dahlau di nan, dom bruk ini hu ginum biai yau ye bruk yaom ameh tagok glong, tagok samar, tapa 90 trieu đồng sa mbaik dalam harei 28/5 daok ngak haduh hatai manuac sia xa hoi saong dom urang QH sangka. Jeng dalam harei ini, QH daok ginum biai ka bruk peih ngak dom bruk pakat negar likei kumei sumu gauk thun 2023 saong bruk patak pataom, pacang caga palai payua thun 2023.

Cục Yaok pataom tỉnh Cà Mau bahrau peih nyaom biai pasram ka bruk duah thau bangsa takik. Duah thau, pataom mek khau tin ka bruk kinh tế - xã hội di 53 bangsa takik thun 2024 hu peih ngak piah pataom mek khau tin ka rahra, bruk sang danaok di dom sang bangsa takik saong dom bruk kinh tế - xã hội piah pathau khan bruk kinh tế - xã hội di 53 bangsa takik. Tapa nan, cih vak tabiak dom asal kadha yaok pataom tui hệ thống di asal kadha yaok pataom pakat negar saong hệ thống chỉ tiêu yaok pataom ka bruk ngak bangsa pabak ka bruk padang ngak saong ba tabiak sarak cak rok patagok kinh tế - xã hội ka dom bhum bangsa takik tukvak 2026-2030.

Bruk raong saong mek ngheu Bến Tre birau hu Hoi dong khik iek tasik Dunya brei panuac lac drei Ngheu mek hu tanut chuan MSC (lac chứng nhận kayua Hoi dong khik iek tasik pabak brei). Ini lac mbang ka 3 ngheu Bến Tre mek hu tanut chuan ini. Meng thau pandar siam dom ilamu ky thuat, bih di nyu lac pacang caga jit ruak, nan ye bruk raong ngheu dak harei dak tagok. Ngheu raong hu 15 tấn sa ha mbaok ia jien mek tame hu meng 300 - 400 trieu dong. Tal urak ini, taong abih dom bhum ngheu praong jeng hu pasang iek bruk hacih sa-at pandap mang.

Melam 28/5, di ban Châu Đốc, UBND tỉnh An Giang peih mbaok harei pataom pakat negar Vía amuk ceik Sam thun 2024. Ini lac sa adat praong dalam raidiuk, adat cambat di rahra daok gah maraong negar. Harei Via amuk ceik Sam thun ini hu peih tabiak ngan haong rilo bruk ngak piah pahadar 10 thun harei ini hu ba tame angan “Inem krung ilamo oh maong mboh pakat negar”(2014-2024). Ini lac tukvak piah mayaih khan tal tuai damuai dalam, langiu taneh ia ka preih khang, dom siam gheih saong prein dui pachreih di tỉnh An Giang. Tapa nan khik ramik, cak rok patagok dom yaom glaong ilamo meng kan di bangsa, dak padang ban Châu Đốc hadah hadai siam makre jang.

Tukvak jaik ini, Long An gam gam hu hajan akaok bilan biak praong. Kadha nan oh lac daong patrun pandiak ka bhap bini, bo daok daong ka bruk iek glang dom janih phun hu mbuan lagaih jang, hadei di mbang pandiak bhang ia mbak dui atah. Hajan akaok bilan hu daong ka labaih 4.600 ha phun mbang baoh gaok kan kandah kayua pandiak bhang, ia mbak di dom bhum dalam tỉnh Long An yau: Bến Lức, Thủ Thừa, Thạnh Hóa, Tân Trụ, Đức Hòa, ban Tân An. Bilan hajan mai tal haong bruk chreih chrai di yaok ribau baoh sang urang nong, caong lac langik hajan hu lagaih piah daong ka bruk iek glang phun pala dalam tukvak anak tal piah hu laba, ba jien tame rilo ka mikva. 

 Rajaei Campuchia tabiak panuac brei thau lac caik veik angan ka Jalan vành đai 3 vil val ban ine Phnom Penh jeng “jalan roya Tập Cận Bình”, piah pok je Tổng Bí thư, akaok negar Trung Quốc, urang hu prein yava praong dalam bruk jhul patagok talei pambuak bruk di Trung Quốc-Campuchia dalam tukvak tapa. Jalan roya Tập Cận Bình atah 53km hu padang ngak haong yaom jien lac 273 triệu đô la Mỹ, meng jien masaiy laba lap meng Rajaei Trung Quốc. Angaok blah Facebook di drei, Thủ tướng Campuchia Hun Manet ndem lac, Trung Quốc oh lac daong ka Campuchia cak rok patagok kinh te xa hoi bo daok patagok bruk độc lập chính trị di taneh ia Campuchia.    

Dom kraong, binek saong ia ala taneh di Liên minh châu Âu (EU) daok njom sa janih “ hóa chất vĩnh cửu”, hu pambuak tal jru halak tong hop, di tanut glong. Ini lac bruk hu mboh tapa langyah ia meng 10 taneh ia EU kayua Dom bruk ngak pacang caga  Jru halak di  châu Âu (PAN Europe) peih ngak. Dalam nan, labaih 79% mau ia langah hu labaih jru TFA glong jang tanut ba tabiak. Dahlau di nan, dom urang roh duah hu duah mboh di tat bam sinh di anek tapai hadei di tuk njom jru TFA.

 Dom sang iek ruak di Latvia hu taduan labaih 1.200 urang ruak dom janih ruak kayua pandiak aval saong dui atah sarau kadau. Mbang pandiak di Latvia meng harei 16/5 saong dui atah dalam adit blaoh. Tui kuhria, mbang pandiak ini meda dui atah takik abih tal puac bilan 5. Tui dom urang roh duah ilamo gah kuhria mboh dahlau bruk langik tasik di Latvia, bilan 7 bhian lac tukvak pandiak khang di abih dalam thun pak Latvia, min thun ini, nhiet do tagok glaong jang 30°C meng di kreih bilan 5 saong dui atah sarau kadau. Dom urang roh duah ilamo brei thau lac, makna ba tal bruk ngak ka nhiet do sarau kadau di thun ini lac kayua tanut tathuak nerak alam ngak tabiak hieu ung sang kreih./.