Patui mbang nyaom ka 7, harei ini, Quoc hoi ngak bruk di hoi truong, ginum biai ka dom asar kadha daok hu panuac karei di gauk ka du thao Hukum Trật tự, salamat jalan mbak. Jeng dalam harei ini, Quoc hoi pang dom harak pathau khan ka bruk peih ngak dom kadha pakat negar ka bruk likei kumei sumu gauk thun 2023; ka bruk ramik pasiam jalan buh jien tame ngak Danak dak pakat negar patagok kinh te - xa hoi di bhum urang bangsa takik saong bhum ceik tukvak 2021 -2030…saong ginum biai, brei tapa Sarak palih ruah Akok negar.  

Tỉnh Hậu Giang meda pambuak haong Kapul tin học TP. Hồ Chí Minh peih ngak “adit salih so saong padang mbang ngui salih bahrau, duah jalan ngak bahrau - Mekong Delta 2024”, ngan haong rilo bruk ngak praong hu peih tabiak dalam dom harei 23-24/5 anak tal. Adit ini hu peih tabiak piah jhul samar bruk cak rok patagok dom jalan langyah salih so, duah tabiak dom jalan langyah kong nghe saong salih bahrau, duah jalan ngak bahrau dalam bruk cak rok patagok kinh te hijao saong khang kajap lagaih haong bhum palei. Gam haong nan, ba mbuan lagaih piah ndem mayai nao mai, pambuak gauk di dom jabat kanja saong dom doanh nghiệp pabak pandap panda, langyah bruk salih so, daong jhul patagok kinh te bhum ĐBSCL.

Tỉnh Cà Mau urak ini hu 58/82 xã mek hu tanut chuan palei pala birau. Piah patui jalan jhul khang bruk padang ngak palei pala birau, Akok UB bhap bini tỉnh Cà Mau caong khin dom  sở, mban, gah, UB bhap bini dom huyen samar pok meyaom dom kapol nyaom, dom urang ngak bruk naih joi, xuat sac, abih di nyu lac hu rilo jalan ngak gheih, siam lagaih saong padang ngak rilo bruk kein laba, rik tame ngak hu jak jeng danak dak pakat negar padang ngak palei pala birau.

Urak ini hatai caong ngak bruk di tỉnh Vĩnh Long daok chreih chrai, meng akaok thun tal urak ini, Pasak Jit vu bruk ngak tỉnh, hu langyah, mayaih khan bruk ngak ka jaik 24.000 urang ngak. Pasak jeng hu mboh 216 mbang doanh nghiep tut angan pilih ruah jaik 19.000 urang. Dom công ty tuk halei jeng daong ka urang ngak hu mbaok tame ginup dom janih bảo hiểm; daong mbang kreih pandiak. Urang ngak jeng hu nao iek ruak, pasang iek tagok jien bilan, alin pandap uan harei manek, 8/3, Tết Trung thu.

Bilan darang di tỉnh Bà Rịa - Vũng Tàu bhian meng bilan 8 tal 9 tui saka ia harei, tukvak ini yaom pablei oh glong kayua paik rilo. Piah tagok kein laba, rilo urang pala brei darang tabiak baoh karei bilan, meng nan darang pablei hu yaom mneg 39.000 - 40.000 đồng sa kilo. Xã Hòa Hiệp, huyện Xuyên Mộc lac labik pala rilo darang dalam tỉnhm urak ini hu jaik 224 ha darang baoh praong rilow kanyik saong darang Thái IDO, dalam nan hu labaih 50% taneh pala hu urang ngak nong ngak brei tabiak binguk aval.

Singapore meda payua dom urang pasang iek tal Thái Lan hadei di bruk kapal haok tauk angan SQ321 di hãng kapar haok Singapore Airlines gaok tatuan megei tuk daok par angaok langik ngak ka tuai metai di harei 21/5. Sruh kapal haok SQ321 njauk brei par trun samar drah di mblang kapar haok Suvarnabhumi di Bangkok hadei di bala. Sa urang metai lac urang negar Anh, umo 73 thun, meda kayua pandik hatai baoh. Dalam 30 urang njauk rambuac, hu 7 urang njauk rambuac trak di akaok. Sruh kapar haok Boeing 777-300R par meng London (Anh) tal Singapore. Bala ini rahtabiak tuk sruh kapar daok atah labik par tal labaih 3 maong par.

Rajaei Anh daok brei bayar veik dom paok jien ka urang njauk bruk tame darah nyom ruak di dom thun 1970 và 1980 di taneh ia ini. Tui nan, dom urang njom ruak daok diuk hu taduan paok jien 210.000 bảng Anh, sumu 265.000 USD. Tapa pasang iek dui atah 6 thun brei mboh bruk nan kayua oh caik hatai, meng dom bac si saong dom rajaei Anh tuk nan. Labaih 30.000 menuac di dunya njuak gaok tame darah  saong dom darah nyom ruak di Jit vu y te taneh ia Anh, ba tal 3.000 urang metai saong yaok ribau urang karei njauk dom ruak tai atau HIV.

Lac taneh ia pablei tabiak negar langiu năng lượng min Australia daok dang anak bruk kurang dien kayua bruk kareik pambang dom sang mac dien dang saong bruk suai damuai dalam tuk salih năng lượng. Tapa nan, Jabat Khik ramik darak pasa điện Australia mboh lac, negar ini njauk buh jien tame khang jang dom danak dak salih năng lượng yau padang ngak dom sang mac dien bahrau, peih praong saong padang ngak dom labik khik piah năng lượng./.