Dalam 2 harei, lac harei ini saong harei paguh (28 saong 29/03), di sang Quốc hội hu peih nyaom biai urang Quốc hội chuyên trách piah ginum biai, brei panuac ka 4 danak dak hukum, lac: danak dak hukum pasiam viek, pabak dom paka di hukum sở hữu trí tuệ; danak dak hukum pakacah, pok manyaom (pasiam viek); danak dak hukum điện ảnh (pasiam viek); danak dak hukum pablei salih bảo hiểm (pasiam viek). Dom danak dak ini hu payua tagok Quốc hội di mbang nyaom ka 3, Quốc hội mbang 15 anak tal.

Jaik 80.000 anek saih di 17 tỉnh, ban dalam bhum gah meraong negar hu tame mbang pakacah taong yaom prein bac, mbang ka 1 kayua Đại học Quốc gia ban raya HCM peih tabiak di harei kabroi. Đại học Quốc gia TPHCM kuhria caik takik di abih 40% dom chỉ tiêu pilh ruah tui jalan pakacah taong yaom prein bac. Abih di nyu lac, bruk pakacah ini hu labaih 80 sang bac Đại học, Cao đẳng langiu Đại học Quốc gia TPHCM pandar piah pilih ruah anek saih tame bac. Bruk pakacah mbang 1 tui kuhria hu khan brei thau di harei 5/4.

Melam 27/3, brei panuac di tuk peih bruk pahadar 200 thun tabiak angan Ninh Bình (1822 - 2022) saong 30 thun padang viek tỉnh (1/4/1992 - 1/4/2022), ong Võ Văn Thưởng, Ủy viên Mintri Chính trị, Thường trực Ban Bí thư kakei lac, tỉnh Ninh Bình njauk caik hatai iek glang, khik ramik saong patagok dom yaom glaong di dom inum krung ilamo, sajarah, dom ilamo meng kan hu makna praong di bhum taneh Cố đô Hoa Lư ribau thun văn hiến, gam haong bruk peih ngak siam dom kein lagaih, prein khang daok hu di drei.

Biar harei kabroi, hajan praong gam haong ngin ribuk ngak brei 93 baoh sang saong rilo taneh pala njam patam, phun mbang baoh di bhap bini daok di xã biên giới Phú Hữu, huyện An Phú, tỉnh An Giang khut khat trak. Urang pan akaok  huyện An Phú, tỉnh An Giang hu ba menuac, radaih, jamriak mai daong ka bhap bini pasiam dom khut khat meng rabuk, ba pandap panda, menuac urang nao daok di labik karei piah cang ramik ngak veik sang danaok. Gam haong nan, samar pasang iek, duah thau dom sang njauk khut khat piah samar daong ka bhap bini.

Harei 27/3, Jabat Cảnh sát jalan mbak Công an tỉnh Đồng Nai pacang hu sa mbang pataom gauk piah pacacah nduac radaih suan hukum ngak lahik an ninh trật tự di dalam xã Hàng Gòn, ban Long Khánh.  10 urang saong 2 sruh radaih ô tô, 17 radaih mô tô dom janih hu jao ka gah chức năng piah langyah tui njauk adat hukum.

Tui kuhria mboh di Liên hợp quốc (LHQ) hu ba tabiak brei thau di harei 27/3, labaih 3 triệu 800 rabau menuac klaak Ukraine tabiak negar langiu plaih di metai laghik kuhria meng di tuk Nga peih bruk quân sự praong di taneh ia ini meng 1 bilan ini mai. Bruk srau kadau menuac nao plaih bala di Ukraine lac bruk kanjah jhak abih di châu Âu kuhria meng hadei di kalan kan dunya mbang ka 2. Kadung jien uraniah LHQ (UNICEF) brei thau, hu labaih 4 triệu 300 rabau uraniah, samu meteh dom uraniah di Ukraine – njauk nduac plaih di bala.

Dah page ini 28/3, di mangaok tài khoản Telegram, Kapul IS tabiak panuac taduan lac peih bruk taong tame di Israel ngak ka 2 cảnh sát taneh ia ini metai saong 10 urang karei njauk rambuac. Bruk taong tame nan rahtabiak harei 27/3 di ban Hadera, gah krieh negar Israel.        

Bruk jao giải Oscar mbang ka 94 hu peih tabiak di Nhà hát Dolby, Los Angeles (Mỹ) tuk mesup ini (tui mon Việt Nam). Thun ini, Viện Hàn lâm Khoa học saong Nghệ thuật điện ảnh Mỹ daok kham merat padang veik angan je, labik dang di bruk điện ảnh ini, hadei di tuk bruk jao giải Oscar thun 2021 gaok kan kandah meng bruk pacang caga jit COVID-19. Dahlau di tuk jao giải, rilo menuac daok cang lac Oscar 2022 hu dom kadha praong camereip abih dalam sajarah 94 thun hu mbaok./.

Urang lang: M.Phuong & Thu Thao – 28/3/2022