Page ini, Mbang nyaom ka 8, Quoc hoi mbang 15 peih pakak dalam praong prang di Sang Quoc hoi. Sa dalam dom asar kadha hu makna di mbang nyaom ini, Quoc hoi brei pasang iek bruk brei palih ruak rajakar pok ngak Akok negar CHXHCN Viet Nam saong dom asar kadha ka urang jakar  karei tui thẩm quyền tui hukum di Đảng, sarak di Karja. Jeng di mbang nyaom ini, Quoc hoi brei pasang iek sarak: Padang ban Hue pakat negar; brei buh jien tame ngak Danak dak pakat negar ka bruk patagok ilamo vaktu 2025-2035; bruk brei buh jien tame ngak danak jalan pasei peih drah samar Barak – Meraong saong rilo asar kadha hu makna karei.

Uy mban Mat tran Negar Viet Nam Ban Raya Ho Chi Minh brei thau, dalam 9 bilan hu peih ngak rilo bruk daong bhap bini, bol lin di labik tapen negar, kaoh pulao kuhria abih tih jien ngak labaih 53 tỷ đồng. Cambaih laih, Mat tran ban raya pambuak haong dom jabat peih ngak “Harei pataom Bien phong dalam rahra” di xa Thanh An, huyen Can Gio, daong pasiam bein bingu xa Thạnh An. Peih ngak danak dak pasang iek prein yava, brei jru oh bih jien saong alin hadiah pandap panda ka yaok rituh baoh sang kathaot; pala phun hijao; alin hadiah jien; daong danak dak “Veih yam takai aadei nao tal sang bac – anek raong balai Bien phong”. Peih ngak kapul rakala bol Ban raya Ho Chi Minh nao ravang urang jakar, bol lin saong rahra daok di huyen kaoh pulao Truong Sa saong Sang giàn DK1…

Dom thun tapa, Kapol Urang kumei tỉnh Sóc Trăng sangka peih ngak  Danak dak 939 ka bruk “ daong urang kumei padang bruk mbang ngui”, daong rilo urang kumei padang bruk pablei salih, ngak mbang hu jak jeng. Langiu di nan, brei phun jien kayua Kapol urang kumei dang angan Gilang Sarak karja tỉnh pasang iek, ka 761 urang kumei hu mesre labaih 15 tỷ đồng. Tui nan, peih ngak dom bruk, yau Harei kumei padang bruk ngak mbang ngui; jak ba doanh nghiep, HTX, baoh sang pablei salih hu mbaok tame pakacah “ Urang kumei padang bruk hadah krah saong salih pandar hijao” daong  adei sa-ai  hu ilamo peih praong bruk pablei salih, pambuak darak pasar, yaih khan  pandap pandar…

Thi xa Buôn Hồ, tinh Đắk Lắk hu 4 xa, phuong, haong 44 palei, mbon mikva bangsa takik. Dalam tukvak ngak sarak daong taneih daok, taneh ngak mbang tui sarak di Rajaei dalam labik gaok rilo kan kandah, tavak tavaiy yau kurang taneh piah daong ka dom baoh sang, hu dom baoh sang tuk taduan taneh ba tame bruk ngak oh njauk tui jalan ngak…Tal ini, thi xa Buôn Hồ hu daong taneh ka 61 baoh sang, haong taneh praong jaik 1,8ha; taneh ngak mbang ka 164 baoh sang, jaik 48,5ha. Urak ini jeng hu 28 baoh sang tut angan daong sang daok saong taneh daok min oh ka hu langyah kayua oh ka duah hu taneh njauk.

Ong Phạm Văn Trọng, Pho Akok UBND tỉnh Tiền Giang birau ba tabiak Quyết định 2284 ka bruk mbaoh harak brei thau taong yaom bruk kanjak jhak alam langik tasik meng danak dak kuac mek cuah dalam kraong Vàm Cái Thia, di xã Hòa Khánh, Mỹ Lương, huyện Cái Bè. Ini lac labik mỏ cuah ka 2 di tỉnh Tiền Giang kuac mek ngak dom danak dak praong tui tacei ba di Rajaei, dalam nan hu danak dak Jalan 3 Ban raya HCM. Dalam nan, cuah di Hòa Hưng 5 di xã Hòa Hưng, huyện Cái Bè hu peih ngak tui jalan tacei ba di karja pak nan, oh tapa to yaom.

Amuk Kamala Harris yam tame bilan puac di mbang meraik Tong thong Mỹ haong tanut jien buh tabiak tapa klak atah Donald Trump. Dua urang ung cu vien jeng buh tabiak yaok ribau trieu đôla ka bruk yaih angaok rayo papar binguk. Dua urang ung cu vien Tong thong My daok pagui jaik gauk dalam dom mbang pasang iek di pakat negar saong dom bang mblang mesruh meda brei mboh urang jayah. Dalam dom bilan jaik ini, amuk Kamala Harris jak ba hu rilo jien jang ong Donald Trump, haong 222 trieu đôla dalam bilan 9 dut haong 63 trieu đola di Donald Trump.

Dom hecta taneh atah di Ia bulan hu Trung Quoc brei tabiak mbaok dunya birau ini di Nyaom biai gah kapal haok vũ trụ dunya ( IAC) mbang ka 75 hu peih ngak di Milan, Italia. Ini lac mbang akok meti  dom hecta taneh mek hu meng atah di Ia bulan hu yaih khan ka dunya thau. Cục Vũ trụ Negar  Trung Quốc  khan  lac, bruk brei thau dom hecta taneh  nan oh lac brei mboh dom ilamo kong nghe  birau di Trung Quoc angaok langik, bo daok ba mai bruk roh duah  birau ka dom urang ilamo vu tru dunya./.  

Swechha India – sa kapul paglaong bruk thau ka njom pambak di kraong ia gireih Yamuna, di Kalin meng harei kabroi hu ndom lac kraong ini oh pandar hu veik o. Kraong ia ini bhian rah tabiak bruk blung tagok kayua bruk tuh thac ia nerak cong nghiep saong hareik do thi trun kraong bo oh tapa langya. Gam haong nan, jalan tathuak ia di ban, labik janih nerak tuh tabiak kraong , jeng ngak ka tanut njom nerak biak njauk kakei dahlau.  Kuhria hu jaik 3,5 trieu lit janih nerak tuh thac trun kraong ia yaok harei, ngak ka kraong ia metai.