Dalam harei ngak bruk harei ini (1/6), Quốc hội patui veik ginum biai di hội trường ka bruk taong yaom pabak dom jak jeng  dalam peih ngak bruk cak rok patagok kinh te. Harei ini jeng lac Harei dunya uranaih (1/6), tuk ginum biai ka kinh te – xa hoi jeng yau gah langiu Quốc hội, rilo urang QH brei thau lac, dalam dom thun jaik di ini, bruk kol toi pham ngak kanjak jhak tal uranaih, abih di nyu nan lac bruk taong paoh gauk dalam sang bac, taong paoh dalam sang, tui kuhria mboh sarau kadhau jang. Kayua yau nan ye, rilo urang QH hu ba tabiak panuac khan lac, njauk paglaong bruk pacang caga bruk taong paoh uranaih, bruk rapeik rapai uranaih dalam dom bruk ilamo, thể thao, du lịch; brei ngak dahlau bruk padang ngak dom labik ma-in, bruk ngak ilamo, nghệ thuật, thể dục, thể thao ka uranaih di dom labik biak kan kandah. 

Di mbang ginum biai ka KTXH di QH tuk biar harei 31/5, ka bruk kurang vaccine dalam danak dak klauk jru peih praong thun 2023 bo urang QH daok duh hatai, Akaok Mintri Y tế Đào Hồng Lan brei thau, thun 2022, jit COVID-19 ngak kan kandah tal bruk peih ngak dom asal kadha dalam danak dak di rilo tinh ban. Urak ini, Mintri Y tế hu tacei pato dom tỉnh ban peih bruk klauk jru gam gam dalam dom bilan puac thun, pasang iek klauk ka nyu ginup dom menuac daok kurang klauk, klauk pabak, klauk ginup ka uranaih saong urang kumei di dalam taneh ia.

Sở Lao động - Thương binh saong Xã hội tỉnh Trà Vinh bahrau peih bruk  ba tabiak Bilan ngak ka uranaih thun 2023, ngan haong kadha “Sa tangin haong gauk ngak trun manieng bruk kan kandah tal uranaih”. DI tuk peih bruk, ong Lê Thanh Bình, Phó akaok UBND tỉnh brei thau lac dalam bilan ini, dom kapul nyaom meda hu mbaok tame ngak siam dom bruk ngak piah khik caga quyen di uranaih, abih di nyu nan lac quyen sangka iek glang prein yava, main bui sambai; rivang alin pandap; jao jien bac saong daong iek ruak, taong ruak ka uranaih kan kathaot, uranaih lac urang bangsa takik, uranaih gaok kan kandah, matui medar, daong dom bruk ngak khik caga saong pacang caga bala ngak kanjak jhak ka uranaih.

Sang iek ruak Nhi đồng 2 bahrau hu brei bruk patagok praong dalam gah pagam tạng. Ini meda lac pasak pagam tạng uranaih dang akaok di Việt Nam. Yam ndok sang iek ruak Nhi đồng 2 Trịnh Hữu Tùng brei thau, hadei di 45 thun cakrok patagok, Sang iek ruak Nhi đồng 2 hu jeng 1 dalam 4 sang iek ruak uranaih dang akaok di taneh ia. Sang iek ruak patagok hu rilo chuyên khoa praong dalam yau ye pagam tạng, taong ruak ung bướu, blac raih thần kinh uranaih, nội soi chẩn đoán saong taong ruak rilo janih ruak ... Abih di nyu nan lac, kuhria tal urak ini, sang iek ruak Nhi đồng 2 ngak hu bruk blac raih neh tabiak ka 8 gu anek raok gam gauk

Harei pataom Nho - Vang thun 2023 di Ninh Thuận meda hu peih tabiak meng harei 13 tal harei 18/6. Dalam dom harei pataom nan, meda hu peih tabiak 12 bruk ilamo, thể thao saong du lịch, ndung mbak prein khang angan je di tỉnh Ninh Thuận, yau ye darak công thương bhum Nam Trung. Bruk njauk mayai nan lac dalam harei pataom Nho-Vang Ninh Thuận 2023 lac bruk taduan raok Harak pok angan di UNESCO  hu vak lac “Ilamo ngak lan am di urang Cam hu vak tame angan inem krung ilamo oh maong mboh njauk khik ramik samar drah”. Tapa harei pataom piah yaih khan thaot binguk, anek manuac, mbaok mata langik tasik saong angan je di Ninh Thuận, gam tui di nan jeng daok pok mayaom dom yaom glaong kinh te bo phun nho ba mai ka tỉnh.

Indonesia saong Malaysia meda brei dui atah jang bruk ginum biai pablei salih haong Liên minh châu Âu piah mek hu bruk samu gauk jang haong dom labik ngak dầu cọ dalam taneh ia. Hukum hu angan ieu lac Adat ka pacang palai glai di Liên minh Châu Âu (EU) hu gah ini ba tabiak di thun 2022 piah pacang cakak bruk pablei salih dầu cọ, đậu nành, cà phê, ca cao, cao su, kayau saong ralow lamo hu ngak di dalam dom labik glai njauk jah tak hadei di thun 2020. Min Indonesia haong Malaysia oh njauk hatai haong dom adat ini kayua mboh lac EU meda ba tabiak jalan pacang ngan saong dom urang ngak nong sit sot daok duah jalan tame darak pasar châu Âu.

Ấn Độ saong Trung Quốc hu peih mbang ginum biai mbang ka 27 di Jalan ngak bruk gah tacei ba saong rami ramik bruk jalan tapen negar di dua gah di ban ine New Delhi, Ấn Độ. Pathau khan di Mintri Ngoại giao Ấn Độ brei thau lac, dua taneh ia ini jeng njauk gauk pasiam veik bruk saron mbon saong salamat meda ngak tabiak kein lagaih piah siam veik bruk pambuak di dua gah. Jeng di mbang ginum biai ini, Ấn Độ saong Trung Quốc jeng njauk gauk samar drah peih mbang ginum biai quân sự patui veik piah langyah ka dom bruk daok kadaong veik di jalan tapen negar, bhum taneh.

Liên hợp quốc hu ba tabiak bruk piah pajeng ba amoniac (piah ngak khak drak) di Nga tapa Ucraina, dalam kham merat bahrau abih piah daong veih tagok Sáng kiến ngũ cốc Biển Đen. Liên hợp quốc caong khin peih dom mbang ginum biai gam haong bruk peih praong sanya hu njauk gauk blaoh di bilan 7 thun blaoh piah gam tame dom pabah lamnge di Ucriana saong dom pandap panda karei./.