Quyền Akaok negar, amuk Võ Thị Ánh Xuân hu sua tangi prein yava, raidiuk di dom bol lin Điện Biên; brei mboh hatai iek glaong, thau dhar phol bruk oh huac kan kandah, oh sahneng hagait tal rup drei eng di dom urang lin Điện Biên dalam bruk mesuh pacang kol kamang France, rik daong haong bol lin saong raha ngak jeng jayah sajarah. Quyền Akaok negar tadhau ayuh dom urang lin Điện Biên hu rilo prein yava, gam tui di nan jeng patagok dom ulamo siam gheih “Urang lin di Wa”, khik miat bruk “Urang lin Điện Biên” meng kan dak padang palei negar dak harei dak kaya mada, hadah hadai, siam makre…

Melam blaoh, radaih pasei pajeng pandap HH84 hu nao tapa jalan lubang pasei Bãi Gió, huyện Vạn Ninh, tỉnh Khánh Hòa dalam bui sambai di urang jakar, urang ngak gah jalan pasei. Yau nan, hadei di 9 harei gar jalan kayua glut jaleih lubang Bãi Gió, tal urak ini, jalan pasei Bắc - Nam nao mai hu veik. Dahlau di nan, biar harei 12/4, jalan lubang nyu glut jaleih, jalan pasei Bắc - Nam gar veik oh nao mai hu. Yaok harei hu 12 radaih pasei pajeng tuai nao tapa đèo Cả njauk ba tuai tapa radaih ô tô. Gah jalan pasei ieu pataom labaih 200 menuac gam haong rilo jamriak, kham merat ngak pasiam veik bruk glut jaleih nan.

Tui yaok pataom, di dalam tỉnh Bình Phước hu jaik 3.200 sang rahra kurang ia pandar. Piah pabak hatai caong pandar ia ka rahra, dom bhum palei hu peih ngak rilo jalan langyah, yau ye jak ba radaih pajeng ia oh mek jien ka rahra, kuac bingun bahrau, pandar ia bingun khik piah. Anak bruk langik thu lagu, pandiak bhang biak khang, kanja dom bhum palei hu peih ngak rilo jalan ngak piah pacang caga, yau ye pathau khan jak ba mikva patak pataom ia; daong ka rahra kuac bingun bahrau; ngak pasiam veik bingun klak, kruac rok kraong ribaong; jak ba mek mac njuk ia piah pruh ka phun...

Daok di tỉnh Bến Tre, kayua ia mbak njaom tame dalam, ia mbak daok di tanut glaong nan ye rilo bilai pabak ia dalam tinh jeng brei pabak ia njom mbak ka rahra pandar. Tỉnh Bến Tre daok peih pandar jamriak halang RO di 13 sang mac ia saong pabak hu jaik 1.800m3 ka rahra pandar. Anak dom kan kandah ini, hu biak rilo doanh nghiệp, urang ngak pahla, dom tapon nyom bol pan phao kraong hu mai alin hadiah bình ia la-an, pandar radaih bồn, sà lan pajeng yaok rabau mét khối ia taba mai daong ka rahra bhum kaoh pulao, tapen tasik daok kurang ia pandar.

Kapul Cảnh sát pacang khuah, padam khuah saong daong duah urang njauk bala di bhum Phước Long - Hồng Dân, tỉnh Bạc Liêu hu ba yaok piluh urang lin samar drah padam khuah di glai tràm di pak ini. Kayua langik pandiak bhang, phun kayau thu rilo, apui khuah samar, lac daok atah labik hu ia nan ye bruk padam khuah gaok rilo kan kandah. Kapul pacang khuah, padam khuah njauk pandar dom mac njuk ia sit njuk ia meng dom danao thu ia dalam glai piah padam khuah. Tal maong 6 biar harei sup kabroi, apui khuah meng hu padam, tui yaok pataom tuk camriep hu labaih 1ha glai njauk apui mbang khuah. 

Harei kabroi, Akaok Mintri Du lịch saong Kinh tế Sáng tạo Indonesia, ong Sandiaga Uno, hu panuac taong yaom bruk ceik pui Ruang pruh veik ngak brei rilo mbang par mai saong nao di Bắc Sulawesi brei klaak, ngak kandah ka tuai nao tal rilo labik du lịch hu angan di tỉnh ni. Tui panuac di akaok mintri, ong Sandiaga Uno, rajaei Indonesia sanya daong ka dom kham merat ngak pasiam, patagok bruk yaih khan, jhul patagok veik gah du lịch tỉnh Bắc Sulawesi hadei di dom mbang pruh di ceik pui.

Sa sang mac pruh sara bahrau hu padang ngak di quận Umm Qasr, tỉnh Basra di Irắc, piah patrun bruk kurang ia ka rahra saong daong pala drak. Labik ini pandar ia njar meda ngak tabiak sa ribau mét khối ia hacih piah pandar saong pala drak. Kayua menuac sia saong dom bruk ngak kong tagok samar nan ye rilo bhum kurang ia biak trak damak. Dom thun jaik di ini, rilo rahra pak gah maraong negar Irắc njauk nao daok di labik karei kayua jien pandar ia saong yaom kaom oh padeih tagok glaong.

Mintri Kông nghiệp Japon bahrau khan lac daong 72,5 tỷ yên (samu 470 triệu đôla Mỹ) ka 5 cty dalam taneh ia piah ngak siêu máy tính pandar ka bruk cakrok trí tuệ nhân tạo (AI). AI tạo sinh meda eng drei ngak harak gar văn bản saong thaot binguk dak harei dak jeng bhian randap. Min negar Japon daok pagam pambak biak rilo tame dom cty công nghệ Mỹ piah ngak dom  siêu máy tính. Mintri Công nghiệp Nhật Bản ndom lac, cakrok AI dalam taneh ia lac hu yaom biak praong ngan haong an ninh taneh ia./.