UBND tỉnh Bến Tre bahrau peih bruk pok mayaom saong jao alin angan “rahra Đồng Khởi angan je” saong “rahra Đồng Khởi hadah mbaok meta” mbang ka 3 thun 2023 ka 10 urang hu bruk ngak naih joi di dalam danak dak pacacah gauk kayua “Đồng Khởi bahrau”. Ini lac dom krieh camin hadah hadai, angn je lac dom urang anek di palei Bến Tre, dom hatai anit ranam gauk yaom lac oh njauk lac urang manek tabiak di Bến Tre, Việt Nam min abih hatai haong puk palei saong rahra di Bến Tre, rik daong saong hu buh rilo prein yava ka bruk cak rok patagok di tinh dalam tukvak zaman bahrau. Dom urang hu pok mayaom 2 angan ini hu alin harak pok brei angan, huy hiệu saong hu vak tame sổ kanjik meng kan di tỉnh.

Liên hiệp HTX pablei salih ban raya HCM (Saigon Co.op) hu brei 10 “Sruh radaih haniem phul” ba jaik 500 urang ngak sang kan kandah rilo thun gam oh hu nao palei mbang Tết hu nao mbang Tết anek sak tapai thun 2023 di palei. Liên đoàn Lao động TPHCM haong Thành đoàn ban raya jeng hu peih bruk juan tagok jalan 34 “Sruh radaih bilan Xuân” ba 1.500 đoàn viên, urang ngak haong gauk gar nao palei mbang Tết di dom tỉnh Gia Lai, Kon Tum, Phú Yên tal Thanh Hóa.

 Tỉnh đoàn Ninh Thuận bahrau pambuak bruk haong Pasak ngak bruk rahra di Kapul dam dara Việt Nam peih danak dak “Tết bak bui sambai” ka mikva bangsa Raglai di palei Liên Sơn 2, xã Phước Vinh, huyện Ninh Phước. Tapa nan, dom kapul daong hu alin 200 paok pandap ka sang sarak kanja, sang gaok kan kandah, hu yaom 200 triệu đồng. Tỉnh đoàn jao alin 1.100 hala dok Tổ quốc ka Huyện đoàn Ninh Phước piah peih ngak jalan tuan hala dok Tổ quốc di puk palei;Trung ương Đoàn hu jao 50 paok pandap brei ka urang jakar kapul cơ sở gaok kan kandah; jao alin 10 paok jien bac ka dom adei anek saih gaok kan kandah bac naih joi.

Meng pala bingu hu chất lượng glaong saong hu harak pambuak bruk blei dalam rilo thun gam, nan ye urak ini dom mblang hamu pala bingu tết di tỉnh Tiền Giang pablei hu mbuan lagaih, yaom tani tanat, urang pala hu laba labaih 40%. Tui panuac khan di urang pala bingu, bilan bingu Tết thun ini hu 80% taneh pala bingu tabiak bingu njauk tuk tết, daok veik oh ka tabiak bingu piah pablei hadei di Tết. Yaom bingu Tết thun ini tagok jang thun bloh hasit, meng 5%-10%, bingu hu menuac takre blei rilo di abih jeng lac dom janih bingu Cúc, Vạn thọ, Mồng gà. Di ban Mỹ Tho tal urak ini, mikva pablei hu labaih meteh mbaok taneh pala bingu di mblang hamu.

Pambuak tal bruk jaleih labik pablei pandap tiện lợi di Quận 4, TP.HCM tuk page ini (18/1), tal tukvak  ini, 1 urang hu brei thau lac metai kayua njauk rambus biak trak. Dahlau di nan, tuk maong 9  page ini, sàn caik pandap di labik pablei pandap tiện lợi Circle K, di jalan Vĩnh Hội,  Phường 4, Quận 4 nyu jaleih trun. Tuk nan gah dalam labik pablei pandap ini hu dom urang ngak saong tuai daok blei pandap. Hu 8 urang nduac hu tabiak gah langiu. Jabat chức năng brei thau lac, kayua cửa hàng blei tame biak rilo pandap panda piah pabak ka tukvak tabung glaong di Tết, ngak ka sàn caik pandap oh ndok tagok truh, ba tal jaleih.

Hadei di tuk brei thau ka jalan ngak praong di châu Phi saong peih Nyaom biai pakat glaong abih Mỹ-châu Phi, karja Tổng thống Mỹ Joe Biden daok kham merat jhul khang bruk pambuak gauk gah quân sự haong dom taneh ia dalam bhum piah meriak gauk haong Nga saong Trung Quốc dalam bruk mek angan je. Bahrau ini, Mintri Quốc phòng Mỹ kuhria padang sa tổ hợp công nghiệp quốc phòng di Maroc. Dahlau di nan, bol bala Mỹ jeng brei thau, gah đặc nhiệm di Bộ Tư lệnh Lục quân Nam Âu - châu Phi saong lin tasik di Bộ Tư lệnh hải quân Nam Âu - châu Phi meda peih dom mbang pasram mesruh saong dom taneh ia bhum châu Phi dalam bilan 1 saong bilan 2 tal.

 Tuyết laik trun takik saong nhiệt độ glaong, jai pacacah trượt tuyết trun ceik meng kan mbang ka 70 meng harei 28-29 bilan 1 thun ini di Đức tui kuhria njauk brei padeih. Tui jabat kuhria mboh dahlau bruk langik tasik Copernicus di Liên minh châu Âu, thun 2022 lac thun pandiak ka 5 hu mboh di dunya. Bilan brak pandiak oh lac ngak kan kandah tal gah du lịch trượt tuyết di Đức. Thaot binguk vệ tinh brei mboh dom labik padeih padai trượt tuyết di Pháp, Thụy Sĩ saong Áo... jeng hu mboh tuyết takik jang dut saong yaok thun kayua nhiệt độ di bilan laar tagok glaong di grauk dom labik di châu Âu.

Lucile Randon lac Nữ tu urang Prang, lac menuac praong thun abih di dunya urak ini, metai di umo 118 thun dalam tuk daok ndih di labik  dưỡng lão di Toulon. Amuk Randon, daok hu thau tal haong angan ieu lac Sơ Andre, ndih tapui tabiak di gah meraong negar Prang harei 11/2/1904, pluh thun dahlau di tuk kalin kan dunya mbang ka 1 patuh tabiak. Jeng dalam thun amuk tabiak dunya, ban New York di Mỹ bahrau tabiak mbaok jalan tàu điện ngầm camereip, dalam tuk giải pakacah radaih jua dane angan Tour de France bahrau hu peih ngak sa mbang. Amuk Randon meng lavik mai hu maong lac menuac praong thun abih di châu Âu./.