Rajaei njauk hatai haong bruk ba tabiak di Mintri Lao động thương binh saong xã hội ka bruk padeih Tết saka ia bilan. Tui nan, harei padeih Tết thun ini lac 7 harei meng harei 20/1/2023 (29 bilan Mat saka ia bilan) tal abih harei 26/1/2023 (lac harei 5 bingun Tết). Rajaei ieu kakei dom jabat, dom kapul peih bruk brei padeih njauk rami ramik dom menuac ngak lagaih piah langyah bruk, khik  siam dom bruk pabak ka kapul nyaom, ka rahra. 

Harei blei pandar Online Friday 2022 kayua Mintri Công thương haong TPHCM padang ngak hu peih tabiak meng mesup harei 2/12 saong dui atah tal abih harei 4/12, ini lac jalan peih tabiak ka rahra hu blei pandap tapak haong yaom lap. Hu jaik 70.000 janih pandap di hãng ngak tabiak, gam haong labaih 500 danak dak pachreih blei di 370 labik pablei pandap lac dom doanh nghiệp ngak pandap, doanh nghiệp pablei pandap, labik pablei salih điện tử hu mbaok tame pachreih blei. Abih di nyu lac mBan peih bruk meda hu danak dak săn iphone 14 Pro Max yaom 1.000 đồng haong yaok rabau pandap alin hadiah hu yaom glaong di tukvak patuah dalam 60 mon livestream.

Ndom ka bruk TP.HCM rami ramik, padang ngak veik khu phố - puk palei, yah klaak tổ dân phố, kapul rahra, tui Sở Nội vụ TP.HCM, bruk rami ramik meda peih ngak saong peih ngak salah di thun 2025. Hadei di tuk rami ramik veik, TP.HCM meda klaak 25.369 tổ dân phố - kapul rahra, mala di pakat phường, xã, ban sit tok daok khu phố - puk palei; dom urang hu mbang tui jien daong meng 13 chức danh, trun daok 3 chức danh, dalam nan hu: bí thư chi bộ, akaok palei – puk saong akaok mban ngak bruk Mặt trận. Urak ini TP.HCM jeng daok likau hu veik 2 chức danh, nan lac akaok dhar kapul urang kumei saong Bí thư Kapul dam dara.

Piah daong pathau khan, brei thau ilamu di sap Prang, jhul patagok dom yaom glaong gah hòa bình, patagok, rilo sap ndom panuac puac, rilo ilamu, harei 1-12, Gilang tapuk Nguyễn Đình Chiểu tỉnh Bến Tre hu peih mbaok “Labik tapuk sap Prang”. Dahlau di nan, gilang tapuk hu taduan 571 baoh tapuk meng sap Prang di dom gah piah parang iek duh ka urang puac tapuk. Daok “Labik tapuk sap Prang” hu caik di labik Phòng Danh nhân di gilang tapuk Nguyễn Đình Chiểu, duh ka urang puac tapuk di labik atau nyim nao sang.

Tỉnh Kiên Giang, Bộ Tư lệnh Bhum Cảnh sát tasik 4 bahrau ba tabiak bruk pacacah “adei anit ranam tasik, kaoh pulao palei negar” ka anek saih di taong abih dom sang bac trung học cơ sở di dalam ban. Đại tá Lê Văn Tú, Phó Chính ủy Bộ Tư lệnh Vùng, akaok mban peih bruk pacacah brei thau, bruk pacacah “adei anit ranam tasik, kaoh pulao palei negar” taduan hu bruk pachreih tui, hu mbaok tame di dom cei gru, nai gru saong dom anek saih, ngak brei pambak praong dalam rahra saong caik veik rilo siam makre di sa mblang ma-in siam makre, kein lagaih. 

Cty pajeng ba Transjakarta di Indonesia bahrau pabak 10 sruh radaih buýt màu hồng brei ka tuai kumei. Bruk rapeik rapai angaok dom radaih công cộng di Jakarta dalam thun ini glaong jang 2 mbang duk haong thun bloh. Kayua yau nan ye, ini lac sa dalam dom jalan ngak piah khik caga dom tuai kumei anak dom bruk rapeik rapai angaok dom radaih công cộng.  Langiu di nan, Cty pajeng ba ini jeng hu ba tabiak ngak rilo jalan yau ye pagam rilo jang dom camera saong menuac di Cty caga taduan dom puac khan brei thau luac harei melam, gam haong sa kapul ngak bruk samar drah piah langyah dom bruk rapeik rapai tuai kumei.

Urak dom urang lahik bruk ngak yaok bilan di negar Đức hu rilo jang 17.000 urang dalam bilan 11, tagok 2,54 triệu urang. Đức, gah kinh tế praong abih di EU, gaok kan kandah meng bruk srau kadau gah năng lượng saong lạm phát praong abih meng dahlau mai, hu brei thau lac meda laik tame suy thoái. Taneh ia ini jeng daok dang anak bruk lac dom công ty njauk tabiak nao labik karei biak rilo kayua yaom xang manjek tagok glaong, hu 1/4 dom doanh nghiệp Đức daok sahneng kuhria salih tapa ngak  di dom negar karei.

Nhật Bản daok peih ngak bruk patak pataom điện piah khik tani tanat điện dalam bilan brak. Dalam nan, bhap bini, doanh nghiệp kham merat patrun patakik điện pandar meng rilo bruk yau cuk khan ao kapal jang, patrun nhiệt độ jamriak la-an saong takik pandar gom truac hadah tal abih bilan 3 thun hadei. Dom sang jeng hu mbaoh tangin tame harak sanya patak pataom điện. Dalam bilan brak ini, Nhật Bản daok kuhria pabak  công suất piah-caga lac 3%. Ini hu maong lac takik di abih piah pabak điện tani tanat dalam bilan brak.