Hu rilo tinh , ban peih bruk klauk vaccine ka uranaih 

Rajaei njauk hatai haong panuac likau di Mentri Y tế brei taduan vaccine pacang Covid-19 ka uranaih umo meng 5 tal 12 thun daong di Rajaei dom taneh ia, dom kapol nyaom dunya brei ka Viet Nam. Mentri Y tế dang tabiak taduan bruk daong, blei saong peih bruk klauk jru vaccine pacang Covid-19 ka uranaih umo meng 5 tal ala 12 thun, khik brei njauk,  siam mekre, lagaih salamat saong njauk tukvak.

Ginum biai bruk Kinh tế TP.HCM mbang ka 3 thun 2022 rah tabiak tuk mesup ini di TP.HCM ngan saong kadha: “Kinh tế số - Prein tagok khang saong cakrok TP. HCM harei hadei”. Tapa nan hu ginum biai dom bruk yau: Maong rah tapa bruk chuyển đổi số dalam doanh nghiệp, jalan ngak lagaih piah cakrok kinh tế số di TP.HCM, chuyển đổi số piah paglaong prein meriak gauk di doanh nghiệp, ilamu pataom hu meng bruk ngak…Tapa ginum biai, urang pan akaok ban raya meda duah hu dom jalan ngak siam lagaih jang piah jhul patagok kinh tế số, daong doanh nghiệp paglaong năng suất saong kein laba.

Meng akaok thun mbiah tal ini, bruk pablei khak tabiak negar langiu di Cà Mau tagok khang saong yaom glong. Dalam bilan 3 thun ini bruk pablei khak tabiak negar langiu hu 50 trieu USD, rilo jang 24% dut haong bruk ba tabiak. Bruk pablei khak hu tagok glong kayua dom taneh ia daok pasiam veik bruk ngak nong, nan ye bruk khin blei khak drak daok tagok glong; dalam tuk nan rilo taneh ia pablei khak tabiak negar praong daok takik pablei tabiak  piah pabak ka darak pasar dalam negar,  nan ye ngak kan kandah tal bruk pabak di dunya. 

Sở Ngak nong saong Patagok palei pala tỉnh Tiền Giang hu panuac kakei urang ngak nong oh kaoh klaak bein phun thanh long kayua darak pasar pablei tabiak negar langiu daok siam veik, yaom thanh long daok tagok veik. Tui dom chuyên gia ngak nong, piah ka phun cakrok khang kajap, urang nong njauk rami ramik veik bruk ngak, njauk hu mbaok tame dom Hợp tác xã, kapul pambuak bruk, kayua ngak sa drei, ngak sit sot ye pablei biak kan, gam haong nan njauk peih praong bruk ngak tui jalan VietGAp, Global GAP. 

UB bhap bini tỉnh Ninh Thuận birau peih bruk taduan Harak brei angan Labik khik piah sinh quyển dunya Núi Chúa di UNESCO saong Harak xếp hạng Inem krung dunya labik gheih mekre Vịnh Vĩnh Hy di Mentri Ilamu The thao saong Dulich. Labik khik piah sinh quyển dunya Núi Chúa, praong labaih 106.000 ha, pataom hu klau labik lac; glai, tasik, meteh cuah sa mạc saong lac tanut chuan tok hu hasa ka he sinh thai glai thu lagu đặc trưng, siam gheih biak karei di Viet Nam saong Đông Nam Á. Lac “baoh sang praong” di labaih 1.500 janih phun kayau; 765 janih athur, dalam nan hu 46 janih daok biak takik hu angan dalam tapuk Bhong meriah Viet Nam saong Angan bhong meriah dunya.

Urang lambaok di Mỹ ka bruk Triều Tiên, Đại sứ Sung Kim meda ravang Hàn Quốc meng harei 18/04 piah ginum biai ka hatai sahneng di dunya ngan saong dom bruk cuh iek tên lửa đạn đạo jaik ini di Triều Tiên. Mbang ravang Hàn Quốc di Đại sứ Sung Kim brei mboh panuac sanya di Mỹ saong Hàn Quốc patagok talei pambuak bruk dalam dom kadha pambuak tal Triều Tiên piah jhul patagok bruk oh hu hạt nhân saong mek hu hòa bình miat miat angaok pulao Triều Tiên.

Dom urang metai di Philippines kayua ribuk Megi rah tabiak di harei 10/4 tagok tal 148 urang, tuk kapul duah daong urang gaok bala hu duah mboh rilo rup tau di dom palei dauk dalam gluh baok. Di ban Abuyog, labaih 100 urang daok lahik saong mboh lac biak takik duah hu urang daok diuk. Langik jhak saong gluh baok ngak ka bruk kham duah daong urang gaok bala dak kan kandah jang .

Roh duah di pasak y tế praong abih di Israel brei mboh, mbang klauk vaccine COVID-19 ka 4 meda ngak brei trun bruk njaom dom triệu chứng, tame sang iek ruak, ruak trak tagok saong metai di dom urang umo praong thun. Prein pacang di mbang klauk ka 4 jeng oh dui atah jang 30 harei, min jeng oh trun nao samar drah./.

Urang lang: Ái Nghiêm- Mousaphuong- 15/4