Dự thảo Hukum CCCD ( pasiam veik) brei pabak bruk ba tame dom khaw tin tani tanat oh salih, hu bhian pandar di bhap bini langiu khaw tin dalam Cơ sở dữ liệu căn cước hu ba tame thẻ căn cước; thẻ căn cước hu pandar piah pabak thông tin di bhap bini saong dreih yau bruk pasang tabiak dom janih harak gar kayua jabat hu tham quyen pabak brei, hu khaw tin  saong hu in tabiak atau ba tame  dalam thẻ căn cước.

UBMT negar Việt Nam tỉnh Long An, Cty Xổ số kiến thiết Long An pambuak bruk haong karja palei bahrau jao 5 baoh sang jum pataom brei ka dom sang kathaot daok di 3 xã tapen negar di ban sit Kiến Tường. Dom baoh sang hu jao brei jeng hu ngak siam mekre, khang kajap, praong meng 40 - 60 m2. Jien padang ngak yaok baoh sang meng 80 - 130 triệu đồng. Bruk daong sang daok ka dom sang kan kandah di bhum tapen negar hu daong ka bhap bini tani tanat raidiuk, patagok bruk ngak mbang, meng nan ba gauk tame padang puk palei siam mekre, kaya meda, khik ramik sron mbon puk paga, khik kajap quyền ngak po bhum tasik di taneh ia.

Danak dak jalan cao tốc Mỹ Thuận - Cần Thơ hu peih tabiak ngak di akaok thun 2021, labik akaok jalan pambuak haong danak dak tatua Mỹ Thuận 2, labik puac di tatua  Chà Và di tỉnh Vĩnh Long. Urak ini, dom po buh jien tame ngak daok kham merat pataom tame padang ngak dom bruk, kham brei radaih peih nduac di puac thun ini. Danak dak hu yaom jien buh tame ngak labaih 4.800 tỷ đồng, atah abih tih jaik 23 km. Jalan hu ngak brei radaih peih nduac 100km/h ka vaktu  padang ngak sakah 6 jalan. Vaktu ka 1 hu ngak 4 jalan radaih, peih nduac 80 km sa tuk.

Mikva urang ngak nong tỉnh Bà Rịa - Vũng Tàu daok yam tame bilan yuak padai Hè Thu. Meng yaom pablei 7.000 tal jaik 8.000 đồng/kg padai yau urak ini, kuhria rah tapa yaok ha, urang ngak nong laba hu meng 30-35 triệu đồng - glaong jang thun blaoh meng 10-15 triệu đồng. Tapa nan mikva chreih chrai caga trun pajaih ka bilan pala hadei. Bilan pala thun ini, urang nong tỉnh Bà Rịa - Vũng Tàu meda trun pajaih labaih 9.400ha padai, tukvak tam drak hu ngak salah blaoh di harei 10/9 tal.

Langyah ka bruk lac di Ban raya HCM mbang halei hu hajan ye ia dauk, dui atah rilo thun tapa, Sở Padang ngak Ban raya brei thau, dalam tukvak tapa, Ban raya peih ngak dom jalan brei sumu gauk piah langyah bruk dauk ia, rik daong pasiam raidiuk bhap bini; abih di nyu lac dom labik dauk biak trak…Bruk ba tal dauk ia lac kayua jalan tathuak ia hu buh jien tame ngak rilo tukvak, hu rilo jalan tathuak ia ngak meng kiak candaih, oh ginup tathuak ia; ralo labik oh hu jalan tathuak ia. Gam haong kayua BĐKH yau nan ye hajan biak khang, rilo  ia ba tal dom labik oh tathuak sumu.

Gah padam pui Tây Ban Nha daok ba abih prein yava tabiak piah pacang cakak khuah glai khang di sa mblang bein negar daok angaok pulao Tenerife dalam tuk langik pandiak thu, tui nan, karja brei ba jaik 4.500 rahra tabiak truh labik mbuan gaok bala. Dom urang jakar mboh lac, ini mbang khuah kan kandah abih dalam sajarah di pulao Canary dalam 40 thun tapa. Pandiak thu yau pui khuah dalam bilan pandiak thun ini hu maong lac sa dalam dom makna ba tal dom bruk khuah glai khang di châu Âu.

Taneh ia Prang meda hu sa mbang pandiak khang abih dalam bilan pandiak ini dalam dom harei anak tal. Dom urang ilamu mboh lac, ini meda lac sa dalam dom mbang pandiak khang abih tuk langik di rilo labik meda tagok tal 42 độ C. Anak bruk pandiak khang tagok glaong, Thủ tướng Prang hu panuac ieu brei padang chip sa kapul langyah srau kadau di rilo mintri, saong brei peih jalan ieu phone samar drah oh abih jien brei ka dom urang gaok bala meng pandiak thu. 

Karja kayua Taliban dang akaok di Afghanistan hu tabiak adat pakauk abih dom đảng phái chính trị di taneh ia ini. Akaok Mintri Tư pháp di karja Taliban ndom lac, dom đảng ini oh hu labik dang, oh hu bruk ngak halei dalam hukum Islam Shariah, oh kein laba hagait ka taneh ia. Kuhria meng di tuk tagok pan karja di thun 2021, Taliban hu ba tabiak rilo adat hukum pacang veik rilo bruk ngak di rahra, abih di nyu lac ngan saong urang kumei haong uranaih kumei. Dom bruk ini daok gaok bruk oh njauk hatai di Liên Hợp quốc saong menuac sia dunya./.