Angan di harei pataom papar sap thun ni lac "Sami samar salih bahrau, palagaih yam tagok

Harei ini, Quốc hội patui veik ginum biai di hội trường ka bruk: taong yaom pabak bruk peih ngak jalan ba tabiak piah cak rok patagok kinh tế xã hội saong kadung jien kanja; bruk pataom iek veik bruk peih ngak Sarak ka 42/2017 di Quốc hội ka bruk langyah dom bruk masraiy laba glaong di dom gah tín dụng. Brei tapa quyết toán kadung jien karja thun 2020; Bruk peih ngak patak pataom, pacang palai pajoa thun 2021. Dahlau di nan, di mbang ginum biai rah tabiak di harei kabroi (1/6), rilo urang QH ba tabiak panuac lac: mayah dui atah tukvak pandar Sarak 42 thun 2017 di Quốc hội, Piah ngak jeng jalan hukum tani tanat ka bruk langyah dom bruk brei masaiy mek laba glaong di dom gah tín dụng, pabak hu panuac ieu kakei langyah ba tabiak bruk daong ka doanh nghiệp saong bhap bini.

Rayo sap ndom Việt Nam hu peih vòng sơ khảo Harei pataom papar sap pakat negar mbang ka 15 tui jalan tapak song online. Angan di harei pataom papar sap thun ni lac "Sami samar salih bahrau, palagaih yam tagok". Mban peih bruk taduan hu 349 kadha meng 86 jabat, dalam nan hu ginup abih 63 rayo papar sap papar binguk dom tỉnh, ban hu mbaok tame. Harei papar sap pakat negar mbang ka 15 hu peih tabiak meng harei 4/8/2022 tal harei 6/8/2022 di TPHCM song rilo bruk biak hadah krah.

Tổng Lãnh sự quán Thái Lan haong Jabat Pablei salih saong Công nghiệp Thái Lan di Việt Nam bahrau brei tapa danak dak “Baoh hatai anit ranam” di Kapul daong urang ruak kan kathaot ban raya HCM hu jao 140 pok jien bac yaom abih tih 700 triệu đồng brei ka dom anek saih dalam ban metui madar kayua jit COVID-19. Ini lac bruk ngak hu makna, brei mboh bruk sangka, hatai anit ranam uranaih, rik daong pabak talei rohim siam mekre di 2 taneh ia Việt Nam-Thái Lan.

Urak ini, tỉnh Long An hu jaik 3.000 uranaih hu raidiuk biak kan kandah, labaih 12.000 uranaih mbuan laik tame jalan biak kan kandah. Kapul urang kumei tỉnh hu pambuak dom urang ngak pahla, peih ngak danak dak “Mẹ đỡ đầu” saong brei pandap ka 4 uraniah metui kayua jit COVID-19. Langiu di nan, kadung jien uraniah tỉnh jeng hu brei 75 pok jien bac ka uranaih kan kathaot kham merat yam tapa, bac da-a naih joi, 75 pok pandap ka uranaih hu raidiuk biak kan kandah saong uraniah mbuan laik tame raidiuk biak kan kandah.

Dalam thun 2021, tanut salih bahrau hành chính di tỉnh Bình Dương dang ka 13 dalam 63 tỉnh, ban, tagok 0,94 điểm, yaom lac dang akaok dom tỉnh gah meraong min nyu trun 9 tanut duk haong thun 2020. Meng ini tal thun 2025, tỉnh Bình Dương pamaong tal bruk lac padang nền hành chính dân chủ, chuyên nghiệp, bahrau, lagaih, siam, kein laba, duh ka bhap bini; paglaong kapul urang jakar siam hatung hatai, hu prein ngak bruk, hu ilamu njauk tui bruk ngak, hu angan je pabak bruk cakrok kinh tế - xã hội.

Tamat nyaom biai pakat glaong oh sanya dahlau di Liên minh châu Âu (EU) peih tabiak di Bỉ, dom urang pan akaok njauk gauk pachreih tui bruk pakauk binah praong dom menyek blei tame meng Nga. Tui nan, taong abih menyek di Nga tame EU meng jalan tasik njauk pakauk chip, dalam tuk menyek nao tapa jalan nding raok Druzhba jeng daok brei tapa. Tuk Ba Lan saong Đức ngak tui sanya padeih blei menyek Nga tapa jalan nding raok Druzhba di puac thun ini, menyek di Nga pakauk tame EU meda tagok tal 90%.

Tổng thống Mỹ Joe Biden brei thau pok jien daong quân sự bahrau brei ka Ukraine. Hãng tin AP brei thau, ini lac pok jien daong quân sự praong abih, dalam nan hu gam dom hệ thống tên lửa bahrau, tên lửa ba jalan biak njauk tapak, biak tantu cambaih laih, dom rocket phản lực phóng loạt, biak rilo siu phao… Min, Ukraine hu sanya haong Mỹ lac taneh ia ini oh pandar dom tên lửa hu Mỹ daong piah taong tame Nga.

Harei 1-6, (lac mesup harei 2/6 tui mon Hà Nội) 4 urang metai, dalam nan hu sa urang pan phao cuh saong rilo urang karei njauk rambus dalam mbang cuh phao dalam mblang bein sa sang iek ruak di ban Tulsa, bang Oklahoma, Mỹ. Bruk nan rah tabiak sa adit hadei di bruk Salvador Ramos, umo 18 thun, cuh phao di sang bac tiểu học Robb daok di ban Ulvade, bang Texas di Mỹ, ngak brei 21 urang metai./.

Urang lang: Thu Thao & Hani Pha – 02/06