Harei kabroi (21/9), di Sang Quốc hội, Ủy viên Trung ương Đảng, Akaok Hội đồng Bangsa Y Thanh Hà Niê K'đăm hu ginum biai haong Kapul urang lambaok Ủy ban Bangsa Quốc hội Lào kayua Akaok Ủy ban Khamchanh Sotapaserth ba akaok kapul daok ravang, ngak bruk di Việt Nam. Dalam ginum biai, dua gah hu khan brei gauk thau dom bruk ngak hu kuhria meng mbang ginum biai dahlau. Akaok Hội đồng Bangsa Y Thanh Hà Niê K’đăm caong khin lac, Akaok Ủy ban Bangsa Khamchanh Sotapaserth meda patui veik jhul khang bruk pambuak gauk abih gah, taom gaok, bac megru nao mai piah ba gauk padang ngak saong cak rok patagok dom talei pambuak bruk di dom jabat ngak bruk bangsa di Quốc hội Việt Nam saong Quốc hội Lào.

Rayo sap ndom VN daok di TP.HCM harei kabroi peih bruk taom mbaok pahadar 35 thun harei padang tabiak. Mai pataom mbak, hu ong Đỗ Tiến Sỹ, UVTW Đảng, Bí thư Đảng ủy, Taong Yam ndok Rayo sap ndom VN; Phaok TGĐ Rayo sap ndom VN Trần Minh Hùng; dom urang pan akaok Quân khu 7, dom sở, ban ngành TP.HCM, dom tỉnh Đông Nam bộ saong rilo rai urang jakar, urang ngak di Rayo. Brei panuac di tuk nan, ong Đỗ Tiến Sỹ, TGĐ rayo sap ndom VN taong yaom lac, rayo sap ndom VN (VOV) daok di TP.HCM hu rilo rik daong siam lagaih tame bruk pathau khan di VOV di TP.HCM saong Đông Nam bộ, abih di nyu lac dalam bhap bini bangsa takik, tuk halei jeng padang talei pambuak bruk khang kajap haong dom tinh ban, dom puk palei piah samar khan brei thau dom bruk dom kadha, daong ka dom jabat karja ramik veik sarak, jalan ngak ka nyu lagaih. Dom thun jaik di ini, kuhria rah tapa, yaok thun VOV TP.HCM hu labaih 4.000 khau tin, kadha vak tui jalan rilo janih. 

Danak dak 7 di Danak dak bruk ngak negar ka cak rok patagok kinh tế - xã hội bhum bangsa takik saong bhum ceik tukvak 2021-2030, hu padang ngak peih tabiak piah rik tame langyah bruk dinh dưỡng di bhum bangsa takik. Dom urang hu mbang tui danak dak lac rahra pak bhum mikva bangsa takik saong bhum ceik, abih di nyu nan lac urang kumei matain, urang amaik, uranaih saong urang umo praong thun; Pasak y tế huyện; urang jakar y tế, rahra, urang ngak di Pasak y tế huyện, urang ngak di bilai y tế xã, viên chức rahra xã, urang ngak gah y tế puk palei; urang pambuak haong rahra, amuk mbui di puk palei. Dom asal kadha praong di danak dak lac Padang ngak saong cak rok patagok y tế labik mikva bangsa takik saong bhum ceik; Paglaong chất lượng rahra bhum mikva bangsa takik saong bhum ceik; Sangka iek glang prein yava, dinh dưỡng amaik saong uranaih piah trun manieng bruk metai lahik di urang amaik, metai lahik di uranaih, paglaong thaik thaok, rup pabhap saong prein yava di urang bangsa takik.

Anak bruk lac dom menuac njauk ruak pandik meta bhong daok tagok samar, akaok UBND tỉnh Sóc Trăng Trần Văn Lâu hu tacei pato Sở Y tế patagok bruk pasang iek, samar mboh saong langyah samar ruak pandik meta bhong, oh caik ka nyu njom mbak praong. Gam haong nan, pambuak bruk, tacei pato dom jabat, dom gah, dom puk palei hu pambuak tal, peih ngak siam dom jalan pacang caga ruak pandik meta bhong di dom labik khik iek anek naih, sang bac, xí nghiệp… Tok dalam 3 harei tapa, dom menuac njauk ruak pandik meta bhong mai iek ruak di dom sang iek ruak dalam tỉnh Sóc Trăng lac jaik 120 urang, dalam nan rilo meng lac anek naih. Meyah kuhria meng akaok bilan 9 tal ini, dom sang iek ruak dalam tỉnh hu taduan raok saong taong ruak ka jaik 300 urang njauk ruak pandik meta bhong. 

Dua Mintri Công Thương saong Jien padai hu brei ramik veik yaom xăng meng di maong 4 bier harei kabroi 21/9. Tui nan, xăng E5RON92 oh glaong jang 24.197 đồng/lít, tagok 726 đồng/lít dut saong yaom pablei urak ini, bier jang xăng RON95-III 1.551 đồng/lít; Xăng RON95-III oh glaong jang 25.748 đồng/lít, tagok 877 đồng/lít dut saong yaom urak ini. Manjek diesel 0.05S oh glaong jang 23.594 đồng/lít, tagok 539 đồng/lít dut saong yaom pablei urak ini; manjek Dầu hỏa oh glaong jang 23.816 đồng/lít, tagok 628 đồng/lít dut saong yaom pablei urak ini. Manjek mazut 180CST 3.5S oh glaong jang 17.847 đồng/kg tagok 143 đồng/lít dut saong yaom urak ini.

Thủ tướng bahrau di Thái Lan Srettha Thavisin harei kabroi brei thau, ong hu taom gaok Giám đốc điều hành Cty ngak radaih ô tô điện Tesla Elon Musk di New York, Mỹ piah ginum biai ka bruk ngak radaih điện. Thái Lan lac pasak lắp ráp ô tô praong ka 4 di châu Á. Taneh ia ini hu tabiak rilo sarak daong ka dom Cty ngak radaih điện saong pin, gam haong nan, brei cakak trun yaom kak je ka urang blei radaih điện dalam taneh ia piah khik labik lac pasak ngak ô tô dalam bhum. Radaih điện daok hu prein dui pachreih di Đông Nam Á, darak pasar kayua dom urang ngak ô tô Nhật Bản daok dang akaok. Radaih điện Tesla hu rilo menuac takre di Thái Lan. 

Gilang paraik cak rok patagok châu Á (ADB) hu tabiak pathau khan patrun bruk kuhria patagok di Campuchia dalam thun ini bier jang dut saong kuhria meng akaok thun, meng 5,5% trun 5,3%, rilo meng lac kayua bruk patagok di ngak kong suai gilac, dalam tuk kuhria patagok kinh tế di Campuchia thun 2024 jeng daok di tanut 6,0%. Tui pathau khan hu brei thau di harei 20/9 di Gilang paraik cak rok patagok châu Á (ADB) ka cak rok patagok Châu Á, dom pandap panda pablei tabiak negar langiu yau ye khan aw, takhaok dép saong pandap du lịch di Campuchia trun 18,6% dut saong 6 bilan akaok thun ini. Min, bruk laik trun ini hu pabak sa binah meng pablei tabiak negar langiu dom pandap oh lac khan aw tagok 22,9%, rilo meng lac pandap panda radaih ô tô, blah pin ia harei saong pandap caik dalam sang.

Đại sứ quán 10 taneh ia Châu Á daok di Rumani, lac Việt Nam, Trung Quốc, Bangladesh, Iran, Indonesia, Malaysia, Pakistan, Nhật Bản, Ấn Độ saong Hàn Quốc bahrau peih harei ilamu châu Á 2023 di Miuyim palei negar Rumani. Mai pataom mbaok, hu lambaok Mintri Ngoại giao, Mintri Ilamu Rumani, dom Mintri, dom gah, doanh nghiệp, urang jakar, urang ngak di dom Đại sứ quán châu Á, dalam nan hu Việt Nam. Brei panuac tuk peih mbaok, Đại sứ Iran, Chủ tịch urak ini di kapul Châu Á saong Vụ trưởng Vụ Ilamu Mintri Ngoại giao Rumani hu taong yaom glaong makna di bruk, maong ini lac jalan piah ka urang Rumani hu thau jang ka ilamu dom taneh ia Châu Á, dalam nan hu Việt Nam, tapa nan daong kak kajap jang talei pambuak bruk di dom taneh ia châu Á haong Rumani.