UBND tỉnh Trà Vinh birau peih bruk brei thau sarak di Thu tuong Rajaei  saong taduan Harak  brei angan huyen Cầu Ngang saong huyen Duyen Hải mek hu tanut chuan palei pala birau. Ini lac 2 huyen hu ralo bhap bini Khmer daok saong hu rilo xã biak kan kandah dahlau daih. Urak ini, tỉnh Trà Vinh kham merat mek hu tanut chuan Tỉnh palei pala birau dahlau thun 2025, dalam nan hu 3 labik pakat huyen  mek hu tanut chuan palei pala birau paglong saong 1 labik mek hu tanut chuan palei pala birau kieu mau.

Ribuk ka 1 jeng daok biak khang saong tui kuhria mboh dahlau, melam ini 17/7, dah pagaiy 18/7 nyu nao tame Vịnh Bắc Bộ. Meng melam ini (17/7) tal harei 20/7, di bhum Bắc Bộ hu hajan praong tal biak praong. Caik hatai caga hajan praong ngak brei dauk jalan dhuan, sang danaok, mbuan hu ia sua, glut jaleih taneh di bhum ceik. Anak ribuk ka 1 daok khang yau nan, Thủ tướng Rajaei hu Harak ieu mBan tacei jalan pakat negar ka pacang caga bala meng langik tasik saong dom Mintri, dom gah, dom tinh ban, ba tabiak ngak khang bruk pacang caga haong ribuk ka 1.

Urak ini, dalam taneh ia hu 2 ribau 458 labik, bhum pacang hu jit ruak di 57  tỉnh, ban hu brei sarak hacih jit ruak. Tal urak ini,  Cục Thú y hu daong dom bhum palei, D.N padang dom chuỗi, labik raong hacih sa-at, oh hu jit ruak ka athur, manuk ada tui tanut chuan di Gah Thú y dunya di bhum ĐNB. Tapa nan, peih praong bruk ngak, dak padang dom labik salamat jit ruak di dom bhum palei dalam negar. Dom D.N raong glang  khin hu njauk brei pambuak haong jabat gah thu y dom pakat saong dom gah pambuak tal di bhum palei ba tabiak jalan ngak, danak dak padang ngak dom bruk raong glang pacang hu jit ruak.

Dalam tuk rilo labik glut jaleih oh ka hu ngak pasiam veik ye di labik tapen kraong Phú An (di xã Phú An, huyện Cai Lậy, tỉnh Tiền Giang) bahrau rah tabiak glut jaleih atah jaik 100m ngak kan kandah tal raidiuk, bruk nao mai, ngak mbang di rahra. Hadei di tuk glut jaleih, urang jakar haong gah pambuak tal di palei hu mai pasang iek piah pathau khan tagok pakat angaok, brei pacang veik piah khik salamat ka rahra labik glut jaleih. Dahlau di nan, di kraong Ba Rài dalam huyện Cai Lậy saong kraong Phú Phong (huyện Châu Thành), jeng hu rilo labik glut jaleih praong mbuan ngak brei ia sraiy tapa, ngak jhak tal taneh pala durian di mikva urang ngak nong.

Adit blaoh, Ban raya HCM hu veik labaih  1.600 urang ruak tangin, takai, cambuai tagok jaik  2,5 mbang dut saong bilan dahlau. Di Sang iek ruak Nhi đồng 1, Ban raya HCM, piah pabak sumu bruk taong ruak tangin, takai, cambuai ka dom uranaih tame iak ruak, y, bác sĩ njauk ngak bruk rilo tukvak jang saong pabak urang ngak bruk. Dom bac si taong yaom lac, ruak tangin, takai, cambuai daok  yam tal jaik tabung glaong jit ruak saong sang iek ruak jeng brei hu jalan pacang caga piah plaih tapa prein. Urak ini, Mentri Y tế hu ba hồ sơ likau brei harak tut angan  pandar vaccine pacang ruak tangin takai cambuai brei pasang iek dahlau, piah jru tal tangin urang pandar hu siam di abih.

Japon, Mỹ saong Hàn Quốc hu peih bruk pasram mesruh haong gauk di labik tasik Japon. Bruk ngak nan, hu maong lac piah pacang caga bruk cuh tên lửa đạn đạo di Triều Tiên. Bruk hu ba tabiak ngak iek lac, tuk Triều Tiên cuh tên lửa đạn đạo, langiu di bruk tame pacang caga, bruk duah thau saong khan brei ka gauk thau dom khau tin jeng hu peih ngak haong gauk. Tui Mintri Khik caga Japon, bruk Triều Tiên cuh tên lửa đạn đạo di harei 12/7 meng blaoh, brei mboh an ninh daok jeng bruk catang jang, nan ye bruk pasram mesruh mbang ini lac khik caga siam mekre dunya tui hukum dunya.

Hajan praong ba tal ia dauk ia sua di gah Kreh negar Han Quoc dalam dom harei tapa ngak brei 31 urang metai, 7.540 urang njauk panduan ba nao labik karei chip. Jabat Khi tuong Han Quoc kuhria mboh dahlau di nan hu khan brei thau hajan praong  meda rah tabiak harei ini veik, rilo labik daok di bhap bini brei thau lac njauk panduan nao labik karei dahlau. Kapol Jalan pasei  taneh ia ini jeng hu khan lac brei padeih taong abih dom mbang peih radaih pui suai saong dom mbang radaih cao tốc, rilo mbang peih radaih  cao tốc karei meda padeih suai kayau glut jaleih taneh, ia ribuk sua oh hu salamat.  

Mintri Y tế Công cộng Thái Lan hu ba tabiak panuac suh sah ka bruk dom urang njauk ruak pandiak tabiak darah dak harei dak rilo jang saong mbuan hu tal 150.000 urang dalam thun ini. Taneh ia ini hu 835 urang njauk ruak pandiak tabiak darah dalam sa adit camereip di bilan 7. Rilo urang njauk ruak pandiak tabiak darah hu mboh di bhum taphia Thái Lan - Myanmar, labik hu labaih 9000 urang tị nạn Myanmar daok daok piah plaih mesruh metak. Abih tih dom urang njauk ruak pandiak tabiak darah di Thái Lan tagok tal labaih 30.000 saong hu 33 urang metai kuhria meng akaok thun tal ini. Tui Cục Pasang iek jit ruak Thái Lan, dom urang njauk ruak pandiak tabiak darah urak ini glaong jang jaik 3 mbang dom bilan ini thun blaoh saong menuac metai jeng galong jang 0,11%./.