Meng prein khang saong praong takik mboh, ribuk ka 3 ba mai dom khat lahik biak praong ka dom tỉnh gah Brak. Kuhria tal urak ini, ribuk ka 3 saong hajan ia sua hadei di rabuk ngak brei 24 urang matai saong lahik, 229 urang njuak rambus. Dalam nan, hu 9 menuac matai kayua ribuk, 12 urang matai kayua glut jaleih taneh saong 3 urang matai kayua ia ba seik. Lào Cai lac labik hu menuac metai rilo abih lac 6 urang, patui di nan lac Quảng Ninh, Hòa Bình, Hải Phòng, Hải Dương, Hà Nội, Yên Bái, Lạng Sơn. Ribuk saong hajan ia sua hadei di ribuk ka 3 ngak ka labaih 8.000 sang khut, 25 kapal gilai kram pak di labik pataok di tỉnh Quảng Ninh. Jaik 110 rabau ha padai; jaik 18 rabau ha njam patam baoh kraoh njauk ia dauk, khut khat. 

Di nyaom biai online haong 26 tỉnh ban meng Thanh Hóa tal dom tỉnh gah Barak ka bruk pasiam veik dom kan kandah kayua rabuk ka 3 rahtabiak harei kabroi, Thu tuong Phạm Minh Chính ndom cambaih dom bruk ngak anak tal caong khin brei ngak, nan lac: Pataom tame glaong ka bruk daong menuac urang, pasang iek, duah urang lahik, daong dom urang njauk rambus, daong kuhria bruk ngak ndam ka dom menuac matai. Oh luai ka rahra halei kurang mbang, kurang cuk, kurang labik daok, oh luai caik ka urang ruak halei oh hu labik iek ruak. Pasiam veik dom khut tayah gah điện, ia, vien thong saong dom gah karei karei.

Dom tỉnh Tây Bắc jeng daok gaok rilo trak damak meng rabuk ka 3. Dalam langik tasik biak kan kandah, ia dauk, glut jaleih rilo labik, dom puk palei daok pataom prein tame pacang, gam ramik pasiam dom khut khat, kham merat khik caga siam mekre salamat ka rahra. Tỉnh Lào Cai hu tabiak panuac brei thau ka dom bala nan meda rah tabiak di dalam tỉnh kayua hajan praong, ia hajan dalam oh ka tal 12 mon jeng yam tapa tanut 100mm, glaong di abih tal jaik 300mm. Ban Yên Bái hu ieu pataom jaik 1.000 menuac, gam haong rilo radaih, gilai, caga daong ka bhap bini tuk ia kraong Hồng daok tagok biak glaong. 

Likau tapa dom khau tin karei njauk caik hatai sangka: Brei thau ka mbang pakacah tamat THPT 2025 ngak tui danak dak pato megru phổ thông hu ba tame pandar meng thun 2018, Thứ trưởng Phạm Ngọc Thưởng brei thau, Mintri Pato Megru brei thau mbang pakacah tamat THPT 2025 khik kajap bruk njul nyac, patrun trak damak, patrun takik jien padai, khik kajap chat luong, khik kajap taong yaom khach quan chat luong pato saong bac saong pabak du lieu hu ginup hatai jia ka dom labik pato megru dai học cao dang dalam bruk pilih ruah anek saih. Mintri hu ba tabiak 4 asal kadha: Brei thau ka jalan pakacah tamat THPT meng thun 2025 ba nao di harei 28/11/2023, samar drah jang sa thun meteh piah anek saih thau.  

Urak ini, urang ngak nong tỉnh Tiền Giang daok yuak padai bilan Hè thu aval. Hu rilo labik padai yuak hu tal 8 tấn/ha, glaong di abih kuhria dalam rilo thun tapa. Bruk njauk biai nan lac, yaom padai dom janih bilan ini jeng daok glaong, urang ngak padai hu laba rilo, yau ye : yaom padai Đài Thơm 8, OM 18, Hương Châu 6 meng 8.300-8.500 đồng/kg. Daok padai Nàng Hoa 9 yaom labaih 8.500 đồng/kg. Tui labik, tui jalan ngak di urang ngak nong bo jien laba yaok ha padai mangaok mala 30 triệu đồng sa vụ.  

Di Trung Quốc, rabuk khang Yagi ngak brei 4 urang metai saong 95 urang njauk rambus, ngak lahik điện, klaih klaoh khau tin ndom meyai di dom tinh Hải Nam saong Quảng Đông. Taneh ia ini hu khan lac parabha brei 200 triệu Nhan dan te (labaih 28 trieu USD) meng kadung jien karja taneh ia piah daong pasiam veik dom cuang kandah di rabuk Yagi. Labaih meteh trieu urang daok di tinh Quảng Đông hu paduan ba nao dahlau di tuk rabuk ka 3 Yagi tame mai. Di Hồng Kông (Trung Quốc), labaih 270 urang hu brei duah labik dauksaong labaih 100 mbang ahaok par oh brei par kayua rabuk.

Tui dom urang ilamu, 4 harei dahlau, rabuk Yagi lac rabuk nhiệt đới hu ngin khang glaong di abih lac 90 km sa tuk. Min rabuk nyu khang tagok di labik ia pandao di bhum Đông Nam Á haong ngin khang tagok tal jaik 240 km sa tuk. Dom urang ilamu mboh lac nhiệt độ ia tasik vil val Philippines labaih 31 ndo C. Dalam tuk nan,  ia tasik pandiak meng 29 ndo C tagok meda pabak ginup prein ka rabuk hu prein khang di abih.

Kapul Super Poll brei thau ka bruk duah thau hatai sahneng di di rahra Thai Lan, brei mboh 62% dom menuac hu sua tangi thei jeng caong ka Rajaei bahrau kayua Thu tuong Paetongtarn Shinawatra pan akaok hu khik tani tanat dalam 3 thun daok veik di nhiem ky urak ini. Langiu di nan, rahra Thai Lan caong khin Rajaei daok patui veik bruk brei ngak dahlau bruk langyah kol duas me-in jru phiel saong urang duas kong nghe glaong./.