Dah page ini (28/9), ribuk ka 4 tuh tame Thừa Thiên Huế, Đà Nẵng, Quảng Nam saong Quảng Ngãi haong prein hangin trun daok 117 km/h (pakat 11), rilo phun hijao jaoh jaleih, sang tapar tabung, yaok ribau bilai biến áp lahik dien. Hadei di tuk tame baoh taneh, ribuk ka 4 trun jeng áp thấp nhiệt đới. Di mbang nyaom di Mban pato tacei jalan jalan ngak di dah page ini, hadei di tuk pang dom tinh, ban pathau khan ka bruk khut tayah di dom puk palei kayua ribuk ka 4, Phaok Thu tuong Lê Van Thanh hu panuac ieu dom puk palei samar drah, pasang iek veik dom labik njauk khut tayah saong hu jalan daong ka bhap bini, padang veik sang danaok, gam tui di nan jeng khik siam mekre salamat dom binek, kraong ribaong.

Di nyaom biai pataom iek veik bruk peih ngak danak dak patrun kathaot khang kajap tukvak 2016 - 2020 saong thun 2021 kayua UBND ban raya HCM peih tabiak tuk biar harei kabroi (27/9), Bí thư Thành ủy TPHCM Nguyễn Văn Nên ndom lac, dalam jit praong COVID-19 hu brei mboh daok hu biak rilo urang kan kathaot, daok diukrai dalam rambah rambup di dalam ban raya bo ban raya oh ka thau hu abih, oh ka hu kuhria tal. Kayua yau nan ye, bruk patrun kathaot di TP dalam tukvak anak tal brei thau hu bhap bini caong hu hagait piah daong, kham merat jang piah daong ka urang kan kathaot yam tagok. Bí thư thành ủy jeng hu panuac caong paglaong bruk pakacah gauk daong ka urang kan kathaot, oh caik ka urang halei daok veik gah likuk.

UBND tỉnh Bình Phước bahrau brei thau bruk padang ban sit Chơn Thành saong dom phường di ban sit di harei 1/10/2022 anak tal. Yau nan, tal urak ini tỉnh Bình Phước hu 3 ban sit lac Bình Long, Phước Long, Chơn Thành saong ban Đồng Xoài. Ini lac bruk hu makna praong dalam jalan cak rok patagok đô thị di tỉnh Bình Phước, peih tabiak rilo jalan lagaih praong ka bruk cak rok patagok kinh tế, ilamo, xã hội di ban sit Chơn Thành saong tỉnh Bình Phước.

Bộ Chỉ huy quân sự tỉnh Long An bahrau nao ravang, alin hadiah pandap ka uraniah metui kayua jit Covid-19 daok dalam huyện Cần Giuộc haong Cần Đước. Di dom labik nao ravang, Bộ Chỉ huy quân sự tỉnh Long An hu brei pandap (3 triệu đồng sa urang haong sa pok pandap kayua Bộ tư lệnh Quân Khu 7 daong brei), pachreih ba dom kamuan saong gauk gar yam tapa kan kandah, yam tagok dalam raidiuk. Lambaok sang dom adei ,metui brei mboh hatai kham merat raong pato dom adei hu siam mekre, hu bac da-a ginup, jeng menuac hu kein laba ka puk paga, palei negar.

Jit ruak pandiak tabiak darah di Ninh Thuận daok mboh tagok khang. Dalam labaih 1 bilan ini mai, yaok adit, dalam tinh hu tal 139 urang njauk ruak pandiak tabiak darah Dengue. Urak ini Ninh Thuận daok tamuh týp D2 - týp hu jru mek glaong mbuan ngak mebuk saong ba tal metai, abih di nyu nan lac di dom urang tamuh ruak veik haong ruak pandiak tabiak darah Dengue. Kayua yau nan ye, UBND tỉnh Ninh Thuận njauk pato tacei Sở Y tế paglaong bruk pasang iek, piah samar drah duah mboh dom urang lac medil njauk ruak; gam tui di nan jeng caga ginup pandap panda piah caga taduan urang ruak, brei daok karei piah taong ruak, patakik dom urang metai tuk hu jit ruak tamuh tabiak.

Jru xịt dhung pacang Covid-19 kayua Thái Lan roh duah saong ngak tabiak meda hu mbaok di mangaok darak pasar meng harei 1/10 tal, njauk di tuk taneh ia ini trun pakat di Covid-19 meng “jit njom mbak nguy hiểm” trun jeng “jit njaom mbak njauk tui iek”. Jru xịt dhung pacang Covid-19 ini meda pacang hu virus SARS-CoV-2 gam tame gah dalam dhung, daong patrun dom virus dalam gilaong dhung. Piah hu siam mekre dalam bruk pacang caga ruak, jru hu xịt 3 mbang yaok harei, yaok mbang atah di gauk 6 mon. yau nan, Thái Lan jeng taneh ia camereip abih di duya brei adat ngak pablei jru xịt dhung pacang Covid-19.

  Tổng thống Hàn Quốc Yoon Suk-yeol hu pato tacei dom jabat hu pambuak tal pasang iek dom sarak di urak ini, piah patagok bruk manek piah pacang caga bruk “khủng hoảng dân số”. Dalam 16 thun tapa, Rajaei Hàn Quốc hu buh tabiak 280.000 tỷ won (196,2 tỷ USD) piah langyah bruk dân số. Min, abih tih anek kamar hu menek tabiak dalam quý II thun ini laik trun 0,75 ranaih, bier di abih dalam sajarah. Kayua yau nan ye tổng thống Hàn Quốc ieu kakei njauk duah tabiak jalan lang yah ka bruk patrun bruk manek saong caga ka samar umo  taha di manuac urang tagok tal 100 thun.

Cuba tabiak bruk brei adat “kết hôn đồng giới” tui hatai caong di bhap bini dalam mbang duah thau hatai sahneng di bhap bini dahlau nan 1 harei ka “Bộ luật gia đình”. Hukum bahrau ini jeng brei adat metian anek brei ka urang karei, taduan anek raong, pacang taong paoh dalam sang, jhul patagok bruk likei kumei samu gauk ka trách nhiệm dalam sang di likei haong kumei. Cuba lac taneh ia ka 8 dalam bhum Mỹ Latinh taduan bruk tok gauk đồng giới./.

Urang lang: Thu Thảo & M.P – 28/9/2022