Di mbang nyaom biai haong dom mintri, dom gah, dom tinh, ban piah ba tabiak jalan buh jien tame padang ngak jalan cao tốc Ninh Bình - Nam Định - Thái Bình saong Gia Nghĩa (Đắk Nông) - Chơn Thành (Bình Phước) hu peih tabiak di harei 12/3, Thủ tướng Phạm Minh Chính brei thau: ini lac 2 jalan hu makna praong, ngak jeng prein khang, peih tabiak bruk cak rok patagok bahrau ka bhum taneran kraong Hồng, Bhum Đông Nam Bộ saong dom tinh, ban karei. Abih di nyu nan lac dom tinh, yau ye Nam Định, Thái Bình, Bình Phước hu rilo kein lagaih, prein khang min bruk cak rok patagok daok gaok rilo kan kandah kayua jalan mbak nao mai ka oh samu gauk, abih di nyu nan lac kurang jalan cao tốc piah pambuak gauk. Thủ tướng ieu kakei bruk caga buh jien tame njauk siam lagaih, tani tanat, chất lượng jang.

Rilo bein pala panat Thái di miền Tây daok hu laba rilo tuk yaom panat tagok tal 52.000 đồng/kg pablei rai saong yaom 40.000 đồng/kg meyah blei abih oh kuhria baoh sit atau praong. Yaom panat daok tagok glaong nan ye rilo menuac ba gauk salih tapa pala panat. Di tỉnh An Giang, thun ini hu 714ha taneh pala panat, năng suất hu 20 tấn/ha. Di tỉnh Vĩnh Long jeng daok hu labaih 550 ha panat Thái, saong daok tagok samar. Ong Lê Quốc Điền – Phaok Yam ndok Sở NN&PTNT Đồng Tháp kakei mikva jhui ba gauk salih phun pala, kayua phun mbang baoh lac janih phun pala suai lavik, oh lac pala dalam dua klau harei bo khin tak lac tak, khin pala lac pala.

Kapul y bác sĩ haong dom urang daong jien meng TPHCM bahrau peih mbang iek ruak, alin brei jru oh mek jien ka nội khoa, ngoại khoa; pasang iek saong tacei jalan iek ruak dom janih ruak karei saong pato tacei ilamo, jalan pacang caga ruak kik ka rahra di tỉnh Bến Tre. Di mbang iek ruak, alin jru oh mek jien, Phó akaok UBND TPHCM Võ Văn Hoan hu payua panuac thau dhar phol tal mikva Bến Tre hu rik tame bruk cak rok patagok di TPHCM dalam tukvak tapa. Tapa nan, hu labaih 300 paok pandap di kapul hu jao tal tangin rahra gaok kan kandah di Bến Tre, kuhria tui yaom jien abih tih lac 200 triệu đồng.

Palei menyim Mỹ Nghiệp (ban sit Phước Dân, huyện Ninh Phước) lac palei ngak meng kan hu angan di urang Cam daok di tỉnh Ninh Thuận. Urak ini, dalam palei hu sa HTX, 25 labik menyim khan bai hu 400 baoh sang hu mbaok tame, ba bruk ngak gam gam ka 800 urang ngak dalam palei. Piah paglaong kein laba, dom labik menyim daok jhul khang bruk pambuak gauk ngak, daong gauk paglaong tangin gheih ngak, gam menyim tui jalan meng kan gam ba mac moc jamriak tame ngak, piah paglaong năng suất, chất lượng pandap, cakrok kinh tế saong khik ramik dom yaom glaong ilamu menyim meng kan di urang Cam.

Dom thun jaik di ini, Bình Phước tamuh tabiak bruk raong cim yến kayua ini lac bruk ngak ba mai  kein laba biak glaong, ba jien mek tame tui kuhria yaok tỷ đồng yaok thun. Dalam tỉnh urak ini hu labaih 1.400 labik pachreih hu anek cim, raong cim yến... Dom sang raong cim yến bhian pambuak haong sang daok haong danak dak ka rahra karei dalam bhum rahra nan ye ngak kan kandah tal raidiuk di rahra vil val nan, abih di nyu nan lac sap danei biak catang meng loa ieu pachreih  cim yến. Gam tui di nan jeng ngak tachrauk nerak alam môi trường, tamuh tabiak jit ruak meng aih saong bilau cim yến laik trun… bruk dom baoh sang eng drei raong cim yến ngak kan kandah ka bruk khik ramik. Langiu di nan, kayua ka oh hu quy chuẩn dalam bruk padang ngak sang yến nan ye bruk khik ramik saong pabak harak adat brei raong cim yến daok gaok rilo kan kandah. 

Mbang nyaom ka 1 Quốc hội Trung Quốc mbang 14 hu tamat di Bắc Kinh  harei ini (13/3) hadei di 8 harei meteh ginum biai. Mbangg nyaom hu brei tapa 7 dự thảo sarak saong 1 Hukum pasiam veik. Trung Quốc ba tabiak bruk patagok kinh tế thun 2023 lac jaik 5% - tanut tagok hu maong lac piah khik kajap salamat anak dom salih bahrau biak kan thau dahlau di bruk dunya. Brei panuac tamat mbang nyaom, Chủ tịch Trung Quốc Tập Cận Bình ndom lac, rahra Trung Quốc daok dang anak bruk chat tagok biak praong , meng dang tagok, kaya tagok tal khang tagok, brei mboh bruk pasiam veik bangsa di taneh ia ini hu yam tame sajarah oh salih karei hu.

Tui hãng tin Reuters, dom cty praong di Nhật Bản tui kuhria meda pathau khan tanut tagok jien bilan khang abih dalam 26 thun tapa, hadei di tuk tamat mbang ginum biai di gah doanh nghiệp saong công đoàn urang ngak dalam adit ini. Dalam thun 2022, Nhật Bản hu bruk lạm phát tagok glaong abih. Yaom cai pandar tagok khang ngak ka bruk caong tagok jien bilan di urang ngak dak harei dak glaong. Thủ tướng Nhật Bản Kishida Fumio brei thau lac, tagok jien bilan lac jalan piah pachreih bruk patagok bahrau saong pachreih  kinh tế cak rok patagok.

Takik di abih 22 urang metai tuk sa sruh ghe pajeng urang di cư tableik di langiu tasik Madagascar. Gah chức năng khan lac, sruh ghe pajeng abih tih 47 urang tableik harei 11/3 meng bloh. 23 urang hu sraong tagok. Di Madagascar bhian hu bruk tableik ghe pajeng urang vượt biên suan hukum. Di puac thun 2021, sa bala pandik harao dreih nan ngak brei 85 urang metai, dalam nan hu 5 uranaih./.