Tỉnh Đoàn Sóc Trăng saong Báo Sài Gòn Giải Phóng hu pambuak bruk peih ngak danak dak sambai raok Tet Trung thu ngan haong kadha “ Gom truac hadah dom caong khin” ka dom adei uranaih hu raidiuk kan kandah, anek kamuan bangsa takik  di ban sit Vĩnh Châu. Danak dak peih ngak katut panak, njauk lagaih, hu makna. Mban peih bruk hu alin brei  240 gom truac hadah, 200 baoh ahar trung thu, 2.000 baoh siphau katap, 20 paok jien bac yaok paok 1 trieu dong saong 10 sruh radaih juah ka anek saih bhum negar tapen tasik, bhum urang bangsa takik hu radiuk kan kandah.

Di tỉnh Vĩnh Long, dom gah dom pakat jeng hu peih ngak rilo bruk ba bui sambai Tết Trung thu ka dom adei anek saih. Tui Sở LĐ-TB&XH tỉnh, Trung thu thun ini, jien blei pandap alin hadiah jaik 3 tỷ đồng meng kadung jien karja saong jak ba rahra rik daong. Meng paok jien ini, tỉnh hu padang 165 labik bui sambai trung thu haong jaik 7.000 adei sang kan kandah. Taphia nan, dom pakat kapul dam dara tỉnh Vĩnh Long jeng hu ngak gom alin hadiah brei dom adei daok di bhum atah bayah, bhum bhap bini bangsa takik.

Bhum Taneran kraong Cuu Long hu labaih 370.000 ha taneh pala phun mbang baoh, rik tame biak praong ka bruk pablei baoh kayau tabiak negar langiu  di Viet Nam. Urak ini, njam patam baoh karaoh hu tame rilo darak pasar dunya, yau baoh durian ( that, la-ar khan), la-u  that hu tame darak Trung Quốc; darang, thanh long, la-u that tame darak pasar Hoa Kỳ; vải, darang tame darak pasar  Nhật Bản; pa-ok, kruac bung  tame Hàn Quốc; kruac aih, kruac bung tame darak Newzealand hu daong ka bruk pablei baoh kayau njam patam tabiak negar langiu dalam tukvak  tapa  tagok gam. Dalam abih tih dom hiep dinh pablei salih tự do hu mbaoh tangin, hu bruk njam patam baoh kabaoh  brei hu tanut chuan pandap hacih sa-at. Nan ye, gah janih njam patam  baoh karaoh pataom tame padang angan je, khik brei njauk tui tanut chuan piah hu tame dom darak pasar praong kan tame.  

Harei ngak adat Nghinh Ông Cần Giờ daok rah tabiak tal abih harei 18/9. Bruk nan kayua Mban padang ngak dom harei Lễ praong di TP.HCM pambuak bruk haong UBND huyện Cần Giờ peih ngak di tuk pahadar 111 thun harei ngak adat Nghinh Ông Cần Giờ saong 11 thun adat ini hu pok brei angan lac Inem krung ilamu oh mboh di mata pakat negar. Harei ngak adat Nghinh Ông Cần Giờ hu peih ngak dalam praong prang di tuk ia bulan bak baoh bilan 8 yaok thun, likau brei ngin kandang, tasik joa, likau sa thun taong cap kaya ikan hu biak rilo. Thun ini, dom bruk ngak adat Nghinh Ông Cần Giờ hu ngak sit veik piah klah rabha kan kandah haong mikva bhum gah brak negar daok gaok kan kandah meng rabuk ka 3.

Kayua kan kandah di hajan khang dui atah gam haong hangin khang ba tal jaik 10.000 ha taneh ngak padai He thu di tỉnh Hậu Giang jaleih ba tal kan yuak saong khat lahik padai. Dom harei tapa, So Ngak nong saong patagok palei pala tỉnh Bạc Liêu hu tacei ba dom đơn vị pambuak tal sumu brei peih tathuak ia, ba mbuan lagaih ka bruk njuk pruh ia  ka urang ngak hamu. Langiu di nan, hu daong ka mac tame yuak padai hu mbuan lagaih daong ka bhap bini.

Triều Tiên kuhria peih mbang nyaom ka 11 Quốc hội mbang XIV di bilan 10 tal di ban ine Bình Nhưỡng. Mbang nyaom ini brei pataom tame bruk pasiam saong pabak Hukum negar, ginum biai bruk pasang iek Hukum Công nghiệp nhẹ, Hukum Kinh tế đối ngoại saong pasang iek bruk peih ngak Hukum pasang iek chất lượng. Dahlau di nan, di bilan 1, dalam mbang nyaom ka 10 Quốc hội mbang XIV, ong Kim Jong Un hu panuac ieu pasiam veik Hukum negar, dalam nan ndom tal dom bruk ka taneh riya saong bruk yasa dua gah Barak - Meraong Triều Tiên.  

Ribuk Bebinca, ribuk khang tuh tame ban Thượng Hải, Trung Quốc di page harei kabroi, ngak khat lahik biak ralo. Labaih 414.000 urang hu panduan ba nao labik karei, dom sang bac brei kareih pabah mbang saong bhap bini hu kakei brei daok dalam sang. Labaih 60.000 urang daong drah samar saong lin daong padam khuah hu mai daong Thượng Hải. Dom mbang kapal haok, kapal gilai saong jit vu radaih pui di Thượng Hải saong dom tỉnh jaik taphia brei padeih, ngak gar jalan nao mai dalam 3 harei Tet Trung thu di Trung Quốc. 

Ba Lan brei pabak pok jien daong labaih 260 triệu USD piah daong dom menuac gaok bala kayua hajan ia sua khang di bhum gah meraong. Rabuk Boris ba tal ia dauk ia sua di rilo labik, ngak brei takik di nyu 4 urang matai saong 2.600 urang panduan nao daok di labik karei. Dom taneh ia karei yau ye Hungary, Áo, Cộng hòa Séc, Romania saong Slovakia jeng hu hajan praong saong ngin khang ngak brei 14 urang matai. Di Tây Bắc Hungary, rajaei hu ba labaih 350 urang lin nao padang ngak paga pacang ia sua, kayua ia kraong Danube saong dom kraong karei daok mbuan tagok glaong./.