Dom harei tapa, dam dara dom tinh peih ngak rilo bruk di Bilan Dam dara saong danak dak “Bilan Klau tapen negar” ngan haong  kadha “Dahlak anit Taneh ia di dahlak”. Dalam Bilan Dam dara thun ini, dom dam dara Tay Ninh  peih bruk padang 280 kapol  nyaom dam dara halan hatian  ngan haong 420 danak dak, bruk ngak, kuhria tui jien  labaih 5 ti dong; padang 94 kapol nyaom dam dara halan hatian “ Pato akhar huroh ka mikva pandar taka so” ngan haong 100 bruk pasram , pato pandar taka so ka 3.500 rahra; daong ka 2.200 bhap bini bangsa takik…

Trung uong Doan Dam dara CSHCM pambuak haong Bo Tu lenh Bol lin Bien phong peih ngak ngak Danak dak “ Bilan klau tapen negar” pakat negar ngan haong kadha “Dahlak anit Taneh ia di dahlak” di Balai Bien phong pabah mbang negar Mỹ Quý Tây, huyen Đức Huệ, tinh Long An. Dalam danak dak, Mban peih bruk pambuak haong dom urang ngak pahala daong rilo paok pandap ka gah bol lin bien phong, bhap bini saong uranaih di labik tapen negar; peih ngak rilo danak dak dam dara brei ka mikva daok tapen negar.

Bilan Dam dara thun ini, dom dam dara Ban Can Tho peih ngak jalan hala dok Taneh ia, kuhria abih tih jalan atah 50km, ngan haong 4.200 hala dok. Langiu Thanh Doan Can Tho daok peih ngak yaok rituh danak dak, bruk ngak hu pato ilamo ky thuat ka bhap bini pak ini; padang 22 kapol nyaom “ Pato akhar huroh ka mikva pandar taka so” piah patagok bruk ngak di dam dara  daong paglong ilamo, bruk pandar mac jamraih saong thau salih pandar taka so ka bhap bini…

Labaih 200 bac si, nha si, duoc si, urang y te daok ngak bruk di Sang iek ruak Chợ Rẫy, Sang iek ruak Đại học Y Dược Ban raya Hồ Chí Minh, Sang iek ruak Tagei mbaok Ban raya Hồ Chí Minh...gam labaih 200 urang halan hatian, sinh vien Sang bac Dai hoc Cuu Long, tinh Vinh Long birau iek ruak  ka labaih 3.500 urang taha metui, urang jaoh jo, uranaih metui amaik ame, urang ngak kong, sinh vien saong urang rai diuk kan kandah daok di Vĩnh Long. Langiu di nan, tacei pato iek glang prein yawa, bhap bini hu brei jru oh mek jien, daong radaih taduan raok saong pandap hadiah, lisei huak oh abih jien. Tapa danak dak nan, Mban peih bruk caong khin kalk rabha kan kandah  haong urang kathaot, uranaih metui saong jaoh jo, ba mbuan lagaih ka mikva taduan hu bruk daong iek ruak.

Di tinh Tien Giang urak hangin barak yuh khang ba tal ia mbak njom tame glong saong dalam meng akaok thun tal ini. Di bah ribong Xuân Hoà (huyen Chợ Gạo) ia mbak glong abih lac 2,54 g/lít, bein bingu Thủ Khoa Huân (Ban Mỹ Tho) 1,58 g/lít. Anak bruk nan, di Danak Ngak taba ia mbak Gò Công, ribong Xuân Hòa, Rạch Chợ (huyen Chợ Gạo) daok hlang ia, dom pabah ribaong  daok veik di huyen Gò Công Đông tal ban phố Mỹ Tho brei kareik  pacang ia mbak, caga ia taba. Mbiah tal ini, pandiak bhang njom ia mbak oh ka hagait kan kandah tal bruk pala drak saong ia pandar di bhap bini.

An Do meda yam tapa sa dalam dom bilan Klau pandiak abih kuhria meng dahlau mai, pandiak hu kuhria mboh glong jang 40 do C. Dom bhum pala padai mi di brum kreh saong bhum barak tagok tal 6°C dut haong tanut bhian. Bruk pandiak tagok ini meda ngak kan kandah tal padai mi, ritak saong asar cải menyek. Rajaei An Do duh hatai ka pandiak tagok glaong abih dut haong meng dahlau mai daok ba tabiak dom kan kandah ngan haong siam mekre pandap mbang saong sarak kinh te dalam tukvak anak tal.

Rajaei Indonesia ndom lac gah pabak brah jeng tani tanat ka rahra dalam bilan daok eik Ramadan thun 2025, hu khik brei ginup brah caga haong blei ngu coc di rahra dalam negar. Langiu di nan jabat chuc nang tame dom bruk ngak darak pasar pandap mbang yaom lap di dom labik. Bruk ini piah pasang iek yaom brah, saradang haong dom pandap njauk ka hu karei mbuan tagok yaom samar drah dalam tukvak rah tabiak harei adat agama thun ini.

Tong thong Donald Trump hu mbaoh tangin ka bruk brei ka sap Anh jeng sap bahsa di Mỹ. Mỹ oh ka hu sap bahsa di pakat lien bang, min labaih 30 bang sit ndom lac sap Anh lac sap bahsa di bang nan. Tui sarak, bruk mbaoh tangin brei ka sap Anh jeng sap bahsa jeng patagok yam kaom taneh ia saong ngak tabiak sa xa hoi siam lagaih haong pambuak pagam jang. Langui di nan, bruk ndom sap Anh daok daong ka dom rahra My hu mbaok tame bol bhap rahra, dom bruk bhap bini di taneh ia haong rik daong ka xa hoi./.