Pahadar 135 thun Harei menek Chu tich Ho Chi Minh (19/5/1890 - 19/5/2025), page harei 19/5/2025, Kapol urang jakar BCH Trung uong Ndang, Karja, Quoc hoi, Rajaei, UBTƯMT negar Viet Nam pok bingu tame Kalan jirah kakuh Chu tich Ho Chi Minh. Anak rup tau gireik di Chu tich Ho Chi Minh, kapol urang jakar hadar tal dhar phol praong glong, bruk ngak cach mang di Wa Ho ngan haong Đảng saong bangsa taneh ia drei. Bingu di Kapol urang jakar hu baoh akhar huroh: “Miat miat  hadar dhar phol Chu tich Ho Chi Minh praong uranam”.

Page ini 19/5, Thanh uy TPHCM peih Nyaom biai Kuhria iek veik dalam 10 thun ngak tui Sarak 05 di Mentri Chinh tri saong meyaom kapol nyaom, urang ngak bruk naih joi dalam bruk bac da-a saong ngak tui jalan diuk rai siam mekre di Ho Chi Minh tukvak 2016 - 2025. Tapa 10 thun peih ngak TPHCM hu 748 bruk ngak birau, bruk ngak gheih lagaih saong 409 asar kadha birau patagok, ba mai bruk lagaih ka xa hoi. TPHCM peih bruk padang ngak hu jaik 5.700 sarak hukum, labik Prang iek kaya drap ar ilamo Ho Chi Minh dalam dom jabat ngak bruk, sang bac, labik agama, dalam bhap bini.

Pahadar 135 thun Harei Menek di Chu tich Ho Chi Minh, kapol urang jakar tinh Ca Mau, gam bhap bini mai rivang Labik kakuh Chu tich Ho Chi Minh saong peih bruk ja ba papal phun, uan harei menek WaHo. Ngak tui panuac pato di Wa Ho, dalam dom thun tapa, Dang bo, karja, bol lin saong bhap bini dalam tinh Ca Mau oh padeih kham merat, ngak siam bruk dak padang Đảng saong dom pakat chinh trị, pataom tame ngak brei cakrok patagok kinh te – xa hoi, paglong raidiuk mbang ngui jeng yau jalan sahaneng di bhap bini.  

Dom harei tapa, rilo kraong ribong di tinh Tien Giang hu biak rilo njam hang tamuh kapal, ngak kan kandah dalam bruk nao mai angaok kraong ia  saong phun ini mbuan tamuh veik. Tukvak tapa, Kong ty TNHH MTV Khai thác thủy lợi tỉnh Tiền Giang saong karja dom bhum palei dalam tinh hu peih ngak rilo jalan ramik phun njam hang min oh ka abih hacih, urak ini bhian tamuh gilac veik.

Vien Khoa hoc Thuy loi gah Meraong negar birau khan lac thun ini meda lac ia ndik biar, ngan haong tabung glong ia ndik di Tân Châu labaih meng 3,2m – 3,5m, di Châu Đốc glong 3,0m – 3,3m, jaik tanut pakat 1 di dom harei akaok bilan 10. Yau nan min, ia meda tagok glong oh bhian kayua ia ndik gam hajan saong ia tathik ndik tagok glong. Yau nan ye, jabat chuyen mon kakei dom bhum palei brei pasang iek dom jalan pacang caga, ngak pakajap ar binek ia, dut iek ia dalam mblang hamu piah plaik njiak khat lahik dalam bruk pala drak saong drap ar di bhap bini.

Jabat ngak bruk di Tong thong dahlau diah Joe Biden khan lac ong Biden ruak ung thu tuyen tien liet mbang tame talang, ruak samar trak. Ong Biden, thun ini 82 thun, padeih ngak bruk di Nhà Trắng meng bilan 1 thun 2025 hadei tamat abih tukvak ngak bruk, gam lac tong thong hu umo thun glong abih kuhria meng lavik mai di taneh ia My. Tui dom urang ruak ung thu, tapa dut iek ruak di ong Biden lac ruak trak. Tuk ruak ung thu tuyen tien liet mbang tame talang ye kan jru dhit abih ruak.

Ceik pui Lewotobi di Indonesia pruh rilo mbang, jeng ceik bau dhur mun  glong tagok tal 6.000 met dalam dom harei tapa. Urang jakar Indonesia pathau khan tagok tanut glong bhong meriak, pakat glong abih, pakauk dom kapal ahaok par glong 6.000 met jaik ceik pui. Piah khik brei salamat bhap bini daok jaik nan, dom urang jakar hu padang labik mbuan gaok bala, pakauk bhap bini saong tuai damuai  tame labik ini atah 6.000 met jaik ceik pui.

Yaok ribau bhap bini brei panduan ba nao labik karei tuk langik hajan khang trun pasak ngak nong praong di gah Barak tinh Buenos Aires, Argentina, ngak ia ribuk dauk biak dalam. Thaok  binguk kayua Rayo papar binguk brei mboh bhap bini di ban Zarate nao mai meng gilai pajeng bak ndap nda. Sa sruh radaih bus  atah pajeng 44 tuai damuai njauk ia ribuk ba theik. Hajan praong ngak gal tavak suai oh hu paik ratak dau nanh. Argentina lac taneh ia pablei tapung ratak dau nanh tabiak negar langiu  rilo abih di dunya./.