Dang akaok Nyaom biai ka bruk peih ngak karja bhum palei dua pakat; tukvak peih ngak dom danak dak jalan mbak hu makna praong; danak dak patagok khang kajap 1 trieu ha padai di bhum taneran kraong Cuu Long, Thu tuong Phạm Minh Chính kakei lac, tapa danak dak brei lagaih bruk pablei padai brah ka urang ngak hamu, plaik njiak “ ngak hu padai, pablei oh hu”; rik tame daong caga bruk langik salih karei kan kandah, tani tanat bruk ngak mbang ka bhap bini.

Mentri Y te likau brei daong jien tapak atau ndap nda ka dom baoh sang ndih tapui  dua urang anek kumei saong urang kumei ndih tapui ginup 2 urang anek dahlau 35 thun, phun jien kuhria mboh labaih 151 ti dong saong 560 ti dong. Langiu di nan, Mentri Y te caong khin urang kumei hu padeih veik 1 bilan langiu tukvak padeih tuk ndih tapui anek ka 2; pasang hu padeih 5 harei veik langiu tukvak padeih tui sarak daong ka diuk ndih tapui anek.

Rilo bhap bini di bhum Bà Rịa - Vũng Tàu saong  Bình Dương (klak) huac kanda bruk peih ngak tui dom sarak daong jaik abih tukvak, meda ba tal urang kurang jien blei BHYT atau BHXH tui caong khin di drei. So Y te TPHCM khan lac sarak daong blei bao hiem tui hatai caong khin ka bhap bini meda brei ngak patui veik tal tuk hu sarak birau salih karei.

Tinh Dong Thap hu quy hoach 4 labik pabah kraong tasik dalam nan hu 12 tapen kraong. Tui kuhria, phun jien buh tame ngak dom tapen pabah kraong tasik tal thun 2030 lac labaih 5.000 ti dong, dalam phun jien buh tame ngak ha tang jalan pabah tapen kraong ribaong duh ka manuac sia saong phun jien tame ngak pabah lamnge. Bruk padang ngak rilo pabah kraong pabah tasik piah pabak prein khang piah tinh Dong Thap patagok kinh te - xa hoi, abih di nyu lac bruk pabei ndap nda kaya kan tapa rilo taneh ia di dunya.

Di bhum 3, phuong Gía Rai, tinh Cà Mau rah tabiak glut jaleih ar kraong biak trak ba tal ngak rilo sang danaok, drap ar di 5 baoh sang ba theik trun kraong, kuhria khat lahik drap ar labaih 410 trieu dong. Di labik nan, gah chuc nang daok samar pasiam bruk glut jaleih, tui nan daong ka bhap bini ramik drap ar ba nao labik khik hu salamat. Yau nan min, di labik ini, daok rah tabiak dom labik talah ra-ai ngak jhak tal dom baoh sang jaik taphia.

Mentri Y te Thai Lan birau khan lac hu anek ruak saong njom  mbak samar di bien the birau meng virus SARS-CoV-2 hu ngan XFG. Hu kuhria abih tih 23 mbang njom ruak hu mboh di taneh ia ini kuhria meng dahlau mai. Tui urang ilamo, XFG hu ralo karei di protein karoi - asar nan piah daong virus nyaom tame te bao anek manuac saong bruk ini meda bien the nan mbuan njom mbak rilo jang saong meda plaik njiak jru pacang kayua vaccine atau njom ruak.

Langik pandiak daok me-om bak ban ine Matxcova saong rilo ban karei di Nga dalam dom harei tapa, bruk pandiak glong jaik 350C. Ini lac mbang pandiak catang di Nga kuhria meng thun 1890. Langik padiak catang ngak jhak tal prein yawa. Dom urang bac si kakei brei oh tabiak gah langiu kreh pandiak, menyum rilo ia jang saong ngui cuh khan ao lipih. Brei thau dahlau bruk bala apui khuah hu ba tabiak  di dom labik hu pandiak glong. Tui kuhria mboh pandiak meda tagok glong veik.   

Gah Langik tasik Dunya khan brei thau labaih 330 trieu urang daok di  labaih 150 taneh ia di dunya gaok kan kandah kayua ribuk cuah saong dhur mun yaok thun. Bruk ba tal ribuk  dhur mun saong cuah ngak jhal tal anek manuac,  bruk ngak mbang saong alam moi truong baoh taneh, daok dak harei dak huac jang. Ribuk cuah saong ribuk ba tal tamuh ruah jalan suan yawa saong baoh hatai, tui nan ngak trun bruk tabiak baoh  phun pala tal 25%, ba tal bruk eik lipa saong klak palei negar nao labik karei./.