Dac khu Co Dao TPHCM pambuak haong Mban Tacei ba pacang caga birau peih ngak danak dak  “ Var lisei zero jien-ndung bak hatai ranam bol lin bhap bini” brei ka 150 baoh sang srak karja kan kandah. Dom paok lisei yaom lac sit min ndung bak hatai anit ranam, rik tame daong ba bui sambai, anit ranam saong pabak prein khang ka mikva yam tagok dalam raidiuk. Meng nan rik tame pambuak khang kajap jang bruk jum pataom anit ranam di bol lin saong bhap bini di kaoh pulao.

Kapol pachreih bac megru Ban Can Tho birau alin brei paok jien bac Lương Định Của thun 2025 ka 177 anek saih di 2 phuong Phú Lợi saong Sóc Trăng yam tapa kan kandah, bac da-a naih joi thun bac 2024 -2025. Dalam nan yaok paok jien bac hu yaom meng 1,5 tal 20 trieu dong. Langiu di nan, mban padang bruk daok alin brei 24 paok jien bac (yaok paok 2 trieu dong) brei ka urang praong thun takre bac da-a naih gheih dalam “ But pajaih bac da-a”. Kuhria abih jien jao brei mbang ini jaik 2 ti dong.

Akaok UB Bhap bini tinh Dong Thap Trần Trí Quang saong urang ngak praong di so, dom gah gam haong  karja palei mai rivang duah thau bruk glut jaleih ar kraong Tien, di taneh puk 1, palei Tân Tịch, phường Cao Lãnh. Dahlau di nan, bhum taneh nan rah tabiak glut jaleih taneh ar kraong Tien, atah 100 met, mbang tame dalam taneh labaih 20 met; ngak glut jaleih 7 baoh sang trun kraong ia, kuhria khat lahik labaih 2 ti dong. UB bhap bini phuong Cao Lãnh jak ba bhap bini panduan ba bhap bini nao labik hu salamat saong daong jien panduan ba ka mikva. Tui nan, jak ba doanh nghiep, urang ngak pahala samar daong yaok baoh sang khat lahik 10 trieu dong.

Jaik 2.000 urang dalam nan hu dom kapol nyaom saong rilo bhap bini di phuong Binh Phuoc, tinh Dong Nai daong ramik ngak hacih alam moi truong - ngak ka dunya hacih jang. Bingun ini tinh Dong Nai jeng hu ba tabiak dom bruk kham ngak ka siam nan lac: thun 2030, taong abih hareik khang di yaok baoh sang brei pataom, dalam nan takik abih 70% brei ngak jeng pandap karei, pandar veik piah atau ngak jeng nang luong; trun 50% hareik katak nhua pandar sambang di dom do thi, labik rivang main yulit  thun 2025; pala birau saong iek gang labaih 100 trieu phun hijao vaktu 2021 -2030; taong abih 100% labik KCN brei hu jalan tathuak ia nerak hlang hacih dahlau tuh tabiak gah langiu alam moi truong…

Uan raok Harei Sen Dolta di bhap bini bangsa Khmer, So Y te tinh Vĩnh Long pambuak haong dom do vi peih ngak danak dak iek ruak oh mek jien, brei jru saong alin pandap ka bhap bini rahra di baoh sang dalam sarak karja, urang raidiuk kan kandah, urang taha, ralo lac bhap bini Khmer di 4 xã Trà Côn, Ngãi Tứ, Tập Sơn, Long Hiệp. Langiu di nan, danak dak daok jhul pakhang bruk pathau khan bruk bhian iek ruak, daong paglong jalan sahaneng di bhap bini dalam bruk pacang caga dom janih ruak njom mbak.  

Trieu Tien pahadar harei padang Dang Lao động Triều Tiên harei 10/10 anak tal ngan haong dom mbang pasram kalin peih ngak praong prang. Tui thaok binguk meng ngaok trun, urang ngak bruk, mac jamraih saong radaih phao karaong hu pataom di mblang pasram bol lin jaik Mblang kapal haok Mirim di ban ine Bình Nhưỡng kuhria meng akaok bilan 7. Bruk jak ba urang saong ngak bruk saong jamraih mac moc piah pasram lin praong jang dut haong dom thun jaik ini. Trieu Tien hu da-a dom urang jakar ngak praong pakat glong di dom negar langiu mai pataom mbaok.

Jabat daong urang ti nan Palestine di Liên Hợp Quốc khan lac, hu 1 trieu 9 rituh ribau urang njauk pandar tabiak truh dải Gaza. Jabat nan jeng hu khan veik ka bruk pandik pandua saong tayak tayaic di bhum taneh rambah rambeip, gam iew kakuh brei padeih mesruh metak chip.  Bruk mesruh gauk di Gaza mbiah tal ini ba tal labaih 65.000 bhap bini metai lahik, takik abih lac 160.000 urang karei njauk rambuac saong ngak khut tayah abih dom hatang di labik ini.

Kan kandah di mbang lahik internet harei 19/9 klaik klaoh dom mac ngak harak gal di dom mblang kapak ahaok chau Au tuk yaok pluh mbang kapal ahaok padeih par atau kadun tukvak. Bruk ngak lahik internet pamong tame phan mem kayua Kong ty kong nghe kapal ahaok hu jabat ngak bruk di My pablei, piah ba tame ngak harak gal, mbat pakat the tagok kapal ahaok saong pasang iek ndap nda kaya kan. Bruk klaik klaoh hu rah tabiak di dom mblang kapal haok  praong dom urang ngak bruk pak ini njuak ngak meng tangin yau tavak tangin the ndik tame ahaok atau ba tui mac tinh laptop caga./.